Pinabulaanan ng abogadong si Petchie Rose Espera ang pag-notaryo at paghanda ng affidavit ni Orly Regala Guteza, dating Marine at bodyguard ni Ako Bicol Party-list Rep. Zaldy Co, na humarap sa pagdinig ng Senado kaugnay sa maanomalyang flood control projects.
Ayon kay Atty. Espera, dinoktor o “falsified” at hindi otorisado ang kanyang pirma at detalye sa naturang affidavit.
Dagdag pa niya, ang paggamit ng kanyang pangalan at notarial commission kaugnay sa nasabing dokumento ay huwad, mapanlinlang, at nakakapinsala sa kanyang reputasyon bilang miyembro ng bar at bilang notary public.
Matatandaang iniharap ni Guteza sa pagdinig ng Senado ang nilalaman ng affidavit na umano’y notarized ni Atty. Espera kung saan inilalahad niya ang transaksyon ng paghahatid ng ilang maletang naglalaman ng pera sa bahay nina Rep. Zaldy Co at dating House Speaker Martin Romualdez.
