Ipag-uutos ni Agriculture Secretary Manny Piñol ang pagpapataw ng temporary ban sa limampu’t limang (55) importer ng mga bawang.
Ito ay matapos na kwestyunin ni Senate Committee on Agriculture and Food Chairman Cynthia Villar kung bakit nananatiling accredited ang mga nasabing importers gayung kabilang sila sa mga tinukoy na cartel operators ng DOJ o Department of Justice.
Ayon kay Piñol, kanyang kakausapin ang mga abogado ng kagawaran at agad na magpapalabas ng temporary ban laban sa mga nabanggit na importers.
Dagdag ni Piñol, nakapag-iisyu lamang siya ng permanent ban kung magkakaroon na ng ligal na batayan para ipataw ito sa mga nasabing importers.
Matatandaang, kinastigo ni Villar ang Department o Agriculture at DOJ sa pagdinig ng Senado dahil sa kabiguang tuluyang masugpo ang kartel ng bawang sa bansa.
By Krista de Dios