Posibleng tuluyan nang masibak sa serbisyo ang tatlong magkakapatid na pulis na nakunan ng video na sumugod sa bahay ng nakagitgitang motorista.
Ayon kay Philippine National Police o PNP Chief Director General Oscar Albayalde, maituturing na grave offense o matinding kasalanan ang ginawa ng magkakapatid na sina PO1 Rendel Soriano, PO3 Ralph Soriano at PO1 Reniel Soriano.
Sinabi ni Albalyade, ipinagharao na sa kasong oral defamation, grave threat at paglabag sa election gun ban ang tatlo.
Inilipat na rin aniya ang magkakapatid na pulis sa Personnel Holding and Accounting Unit sa Kampo Krame habang nagpapatuloy pa ang imbestigasyon laban sa kanila.
Dagdag ni Albayalde, sakaling naman hindi pa masibak sa serbisyo ang magkakapatid na Soriano, posibleng ipadala na lang aniya ang mga ito sa Mindanao.
Magugunitang, inireklamo ang tatlong magkakapatid na pulis matapos kumprontahin ang nakaalitang motorista na may bitbit na baril at naka-sibilyan.
—-