Out muna sa Queen’s Club Tournament si French Open champion Rafael Nadal.
Ayon kay Nadal, ito ay para makabawi siya ng lakas at makapaghanda na rin para sa Wimbledon.
Matapos ang matagumpay niyang pagkapanalo sa French Open, pinayuhan aniya siya ng kanyang team at doktor na magpahinga na muna.
Sa naturang torneo, inaasahang ididipensa ni Top Rank Andy Murray ang Queen’s title nito.
Samantala ang Wimbledon naman ay magsisimula sa Hulyo 3.
By Ralph Obina
Tukoy na ng DICT o Department of Information Communication and Technology ang nasa likod ng Independence Day hacking.
Ayaw tukuyin ni DICT Assistant Secretary Allan Cabanlong kung sino ang suspect o suspects subalit nakatakda na aniya nilang i-serve ang warrant of arrest.
Ayon kay Cabanlong tuloy-tuloy rin ang isinasagawa nilang imbestigasyon sa cyber-terrorism.
Tinukoy ni Cabanlong ang mga grupo na humihikayat ng rebelyon at suporta sa ISIS sa pamamagitan ng social media.
PAKINGGAN: Bahagi ng pahayag ni Pangulong Rodrigo Duterte
Free public wi-fi
Samantala, target ng DICT na mapalawak ang pagbibigay ng libreng wi-fi sa publiko na sinimulan na sa lahat ng MRT o Metro Rail Transit stations sa Edsa.
Ayon kay DICT Assistant Secretary Allan Cabanlong, plano nilang isunod na ang LRT o Light Rail Transit at iba pang matataong lugar sa Metro Manila sa sandaling maging maayos na ang free wi-fi sa MRT 3 na bumabagtas sa Edsa.
Sa ngayon ay may libreng wi-fi na ang labing tatlong (13) istasyon ng MRT samantalang gagana naman ang libreng wifi sa pagitan ng mga istasyon ng MRT mula Guadalupe hanggang Cubao area.
PAKINGGAN: Bahagi ng pahayag ni Pangulong Rodrigo Duterte
By Len Aguirre | Ratsada Balita (Interview)
Tiniyak ng Malacañang na kanilang paiimbestigahan ang ulat na may mga pang-aabuso sa implementasyon ng Batas Militar sa Mindanao.
Kasunod ito ng pagkondena ng IBP o Integrated Bar of the Philippines Lanao del Sur sa anila’y iligal na paghalughog sa mga bahay sa Marawi City at iba pang lugar sa Mindanao.
Ayon kay Presidential Spokesman Ernesto Abella, ipinauubaya na sa Department of Justice at Armed Forces of the Philippines ang pagsagot sa mga nasabing alegasyon.
Iginiit pa ni Abella na tama lamang na matigil ang mga pang-aabuso kung mapatunayang may katotohanan ang mga ito.
By Krista de Dios | with report from Aileen Taliping (Patrol 23)
Nakatakdang gawaran ng kauna-unahang honorary citizenship of Manchester ang American singer na si Ariana Grande.
Ito ay matapos na i-organisa ni Ariana ang One Love Manchester concert para sa mga naging biktima ng bomb attack sa kanyang konsyerto sa nasabi ring siyudad.
Ayon kay Manchester City Council Leader Sir Richard Leese, ang nasabing honorary citizenship ay kanilang paraan ng pagkilala sa pagpapakita ng pagmamahal at tapang ni Ariana sa kabila ng nangyari terror attack.
Matatandaang isinagawa ang One Love Manchester concert noong June 4 na dinaluhan ng ilang kilalang international singers sa pangunguna ni Ariana.
At nakalikom ng halos 3 million pounds para sa biktima ng pag-atake sa lungsod.
By Krista de Dios
Masusing sinusuri ng BFAR o Bureau of Fisheries and Aquatic Resources ang mga inaangkat na tilapia fingerlings sa bansa.
Ito ay bilang pag-iingat sa posibleng pagpasok sa bansa ng bagong tuklas na virus na namemeste sa mga tilapia sa ibang bansa.
Ang nasabing virus ay tinatawag na TILV o tilapia lake virus na kumalat sa mga bansang Colombia, Ecuador, Egypt, Israel at Thailand.
Ang TILV ay nagdudulot sa tilapia ng pagkasugat sa mga balat, pagkakatanggal ng kaliskis, malabong mga mata at pagkamatay.
Bagaman, sinabi ng food and agriculture organization ng United Nations na walang masamang epekto sa tao kung makakakain ng tilapia na may TILV.
Posibleng maging dahilan naman ito ng pagkaubos ng mga cultured at wild tilapia sa mga apektadong lugar.
By Krista de Dios
Nagpakawala ng artillery fire ang AFP o Armed Forces of the Philippines kaninang pasado alas-4:00 ng madaling araw.
Sinabi ni Brigadier General Cirilito Sobejana, Jr., commander ng joint task force Sulu na ang pagpapaputok nila ng kanyon ay naka-depende sa monitoring nila sa galaw ng mga terorista.
Partikular na tinukoy ni Sobejana ang pagkilos ng mga terorista sa urban center ng Jolo na ang layon ay ilihis ang atensyon ng AFP sa patuloy na kaguluhan sa Marawi City.
Kasabay nito, humingi ng paumanhin si Sobejana sa mga residente lalo na sa mga bumatikos sa kanilang hakbang dahil isinabay anila ito sa pagdarasal ng mga kapatid na Muslim.
Tiniyak ni Sobejana na hindi na mauulit ang pagsabay ng putok sa pagdarasal ng mga kapatid na Muslim at inatasan na niya ang kanyang mga tauhan hinggil dito.
Una nang kinondena ng mga residente ng Jolo, Sulu ang artillery fire ng AFP sa gitna nang isinasagawang taraweeh prayers sa mosque.
Sa post ng isang Dr. Raden Ikbala, sinabi nitong walang respeto ang mga sundalo sa mga Muslim sa nasabing hakbang.
Dahil dito, nakiusap si Ikbala sa AFP na huwag namang itaon ang pagpapaputok ng kanyon sa oras ng kanilang pagdarasal at paglalakad ng karamihan sa mga Tausug patungong mosque.
Artillery fire ng AFP kinundena
Kinundena ng mga residente ng Jolo, Sulu ang artillery fire ng AFP sa gitna nang isinasagawang Taraweeh prayers sa mosque.
Sa post ng isang Dr. Raden Ikbala, sinabi nitong walang respeto ang mga sundalo sa mga Muslim sa nasabing hakbang.
Dahil dito, nakiusap si Ikbala sa AFP na huwag namang itaon ang pagpapaputok ng kanyon sa oras ng kanilang pagdarasal at paglalakad ng karamihan sa mga Tausug patungong mosque.
By Judith Larino
Patay ang sampung (10) pasahero ng UV express van at sugatan ang limang (5) iba pa sa naganap na aksidente pasado alas-5:00 ng madaling araw sa mahayag Tibungco sa Davao City.
Ayon sa mga awtoridad, bumangga ang nasabing van na may biyaheng Moncayo sa Compostela Valley pa Davao sa isang 10-wheeler truck.
Kaagad binawian ng buhay ang sampung (10) pasahero ng van na karamihan ay lalaki, dahil sa lakas ng impact ng banggaan.
Isinugod naman sa Southern Philippines Medical Center ang mga sugatang pasahero.
Iniimbestigahan pa ang naturang insidente.
By Judith Larino
Sinampahan na ng kasong parricide ang asawa ng pinapatay na alkalde ng Bien Unido, Bohol na si Mayor Gisela Boniel.
Bukod sa asawang si Provincial Board Member Niño Rey Boniel ay may apat na iba pang sinasabing kasama nito sa ginawang krimen.
Nahaharap din si Niño sa kasong kidnapping at serious illegal detention batay na rin sa naging salaysay ng kaibigan ng alkalde na ito ay dinukot at pinatay ng kanyang asawa.
Nanatili namang bigo ang mga awtoridad na makita ang katawan ng alkalde na sinasabing itinapon sa karagatan sa paligid ng Caubian Island sa Lapu- Lapu City.
By Rianne Briones
