Iminungkahi ni House Committee on Ways and Means Chairperson at Marikina 2nd District Rep. Miro Quimbo ang pagkakaroon muli ng formal structure gaya ng Joint Legislative Leadership Caucus upang mapabilis ang pagpasa ng mga panukala, partikular ang mga LEDAC priority measures ng administrasyon.
Sa pulong-balitaan sa Kamara, sinabi ni Quimbo na malaking tulong ang naturang hakbang upang agad na maisulong ang mga prayoridad na panukala na makatutugon sa pangangailangan ng mga Pilipino at magpapalakas sa ekonomiya ng bansa.
Ayon kay Quimbo, unang ikinasa ang Joint Legislative Leadership Caucus noong panahon ni dating House Speaker Sonny Belmonte upang maihanda at agad na matalakay ang mga panukalang batas na maaari nang aprubahan.
Binubuo ang Legislative Caucus ng Speaker of the House, Senate President, majority at minority leaders ng Senado at Kamara, gayundin ng chairpersons ng Finance at Ways and Means Committees.
Paliwanag pa ni Quimbo, sa tulong ng mekanismong ito ay mas marami pang mahahalagang panukala ang maaaring maipasa sa loob ng susunod na dalawang taon.
Para kay Quimbo, magandang gamitin muli ang naturang caucus upang mapabilis ang pagpasa ng mga priority measures ng pamahalaan. | via Geli Mendez (Patrol 30)
