Kinumpirma ni Information and Communications Technology Secretary Rodolfo Salalima na sisimulan na ng gobyerno na arestuhin ang sinumang sangkot sa pagpapakalat ng mga propaganda sa social media ng mga teroristang grupo.
Sakali anyang matunton ang mga nagpopost sa social media ng kanilang pagsuporta at simpatiya sa mga terror group ay awtomatikong aarestuhin ang mga ito pero hindi papangalanan.
Ang rebellion at sedition anya ay mga krimen sa ilalim ng lumang penal code at kung sangkot naman sa cyber sedition, nangangahulugan din itong cyber rebellion.
Aminado si Salalima na ang internet lalo ang social media ang pinakamalakas ngayong sandata ng mga terorista dahil dito nila nahihikayat na umanib sa kanilang ipinaglalaban ang kanilang mga supporter o sympathizer.
By Drew Nacino
Umapela sa Korte Suprema si House Deputy Speaker at Capiz Representative Fredenil Castro na irespeto ang Kongreso sa hindi nito pagsasagawa ng joint session kaugnay sa Martial Law sa Mindanao.
Ayon kay Castro, ito ay dahil posibleng magkaroon ng constitutional crisis kung pipilitin ng Korte Suprema na manghimasok sa naging desisyon ng Kongreso.
Aniya, co-equal branch ang hudikatura at lehislatura kaya hindi maaaring basta na lamang ipag-utos ng Korte Suprema na magsagawa sila ng joint session.
Binigyang diin ni Castro na ang desisyon na hindi magkaroon ng joint session ang Kamara at Senado ay kapwa aprubado sa dalawang kapulungan.
By Rianne Briones
Target ng gobyerno na magkaroon ng isang portal lamang ang mga ahensya para gawing centralized ang online services para sa publiko.
Ayon kay DICT o Department of Information and Communication Technology Secretary Rodolfo Salalima, layon nitong mapasimple at mapabilis ang serbisyong ibinibigay ng gobyerno.
Kaugnay nito, nakatakdang lagdaan ni Pangulong Rodrigo Duterte ang isang executive order na nag-uutos sa lahat ng ahensya na ipasa ang kanilang mga datos at sistema sa DICT bilang paghahanda sa gagawing government portal.
Aniya, sa ngayon ay umaabot na sa 125 government agencies ang nagsimula nang maglipat ng kanilang data sa DICT dahil tiwala umano ang mga ito na mas ligtas sa kanila.
By Rianne Briones
Itinanggi ng Armed Forces of the Philippines-Western Mindanao Command (AFP-WESMINCOM) ang ulat ng ISIS na hawak na nila ang malaking bahagi ng Marawi City, Lanao del Sur, simula nang sumiklab ang sagupaan, noong Mayo 23.
Ayon kay WESMINCOM Commander, Lt. General Carlito Galvez, paliit ng paliit ang ginagalawan ng ISIS-Maute kada araw taliwas sa pahayag ng official news agency ng teroristang grupo na Amaq.
Sa katunayan ay walumpung (80) porsyento na ng Marawi City ang nabawi ng gobyerno sa kamay ng teroristang grupo.
Tinatayang dalawandaan (200) pang miyembro ng Maute at Abu Sayyaf ang na-korner na ng militar sa apat na barangay.
By Drew Nacino
Maglulunsad ng joint naval patrols ang Pilipinas, Indonesia at Malaysia sa Sulu Sea simula sa Martes, Hunyo 20 upang mapigilan ang cross-border kidnapping-for-ransom activities.
Ito’y sa gitna ng laban ng tatlong bansa sa grupong Islamic State na mahigit tatlong linggo ng naghahasik ng karahasan sa Mindanao.
Sisimulan ang joint patrol isang araw matapos lagdaan ng mga defense minister at military commander ng tatlong bansa ang memorandum of understanding sa Tarakan, Borneo, Indonesia.
Gayunman, hindi pa malinaw kung papayagan sa ilalim ng memorandum ang panukalang cross-border hot pursuit ng mga hinihinalang kriminal.
By Drew Nacino
Tinanghal na most valuable player ng NBA Finals si Kevin Durant ng Golden State Warriors na tinanghal namang champion.
Pinangunahan ng 39 points, 6 rebounds at 5 assists ni Durant ang Golden State at naungusan ang Cleveland Cavaliers sa kartadang 4-1 sa best of seven series ng finals.
Ito ang kauna-unahang NBA title ng 28-anyos na forward simula nang lumipat sa Warriors noong isang taon.
Aminado si Durant na tanging ang Cavaliers forward at team captain na si Lebron James ang kanyang pinakamalaking hamon simula pa noong 2012.
Samantala, nagpapasalamat ang 2017 NBA Finals MVP sa lahat ng suporta sa kanila ng fans na pinag-aalayan nila ng kanilang championship.
By Drew Nacino
Nananatiling matibay ang relasyon nina Luis Manzano at Jessy Mendiola sa kabila ng usap-usapang on the rocks ang kanilang relasyon.
Ayon kay Luis, hindi dapat nagpapaniwala sa mga nababasa sa internet dahil madalas ay malisyoso lamang ang mga lumulutang na balita.
Aniya, nananatiling matibay ang kanilang relasyon sa katunayan ay personal na nga niyang nakausap at nakuha ang basbas ng British – Lebanese na ama ni Jessy.
Papa na nga daw ang kanyang tawag sa father ni Jessy.
By Rianne Briones
Photo: Screengrab from senorita_jessy / Instagram
Inakusahan ni Iranian Foreign Minister Mohammad Javad Zarif ang Saudi Arabia bilang “pinakamalaking” supporter ng Islamic State of Iraq and Syria o ISIS na naglunsad kamakailan ng pag-atake sa Tehran.
Ayon kay Zarif, mayroon silang “credible intelligence information” na aktibo ang Saudi Arabia sa pagpopondo sa operasyon ng ISIS sa silangang bahagi ng Baluchestan, Iran.
Ginagamit anya ng mga armadong grupo ang isang bahagi ng Baluchistan upang maglunsad ng mga pag-atake na humantong naman sa pagkamatay ng siyam (9) na Iranian border guards noong Abril.
Bagaman naglatag na ng mga aksyon ang Saudi government laban sa Islamic State, magkahalintulad naman ang Islamic ideology ng Saudi Arabia at ISIS na tinatawag na wahhabism o istriktong pagpapatupad ng mga batas ng Islam.
Magugunitang isiniwalat ng wikileaks ang classified memo ni dating US State Department Hillary Clinton noong August 2014 kung saan binanggit ng natalong presidential candidate na ang gobyerno ng Saudi at Qatar ang lihim na nagpopondo sa mga operasyon ng ISIS at iba pang radical Sunni Islamic groups sa Middle East.
By Drew Nacino
