Nawawala pa rin ang isang Pilipinang nakatira sa nasunog na apartment sa London.
Ayon kay Senador Joel Villanueva, miyembro ng kanilang religious group na JIL o Jesus is Lord ang Pinay na si Nanay Ligaya Moore.
Tinukoy umano ng kanilang mga miyembro sa JIL na mag-isang namumuhay si Moore sa London habang ang pamilya naman nito ay nasa Pilipinas.
Sa kabila nito ay hindi pa kinukumpirma ng DFA o Department of Foreign Affairs ng kung ilan ang bilang ng mga Pinoy na nadamay sa naturang sunog.
Patuloy aniya sa pag-ikot ang mga opisyal ng Philippine embasssy sa London para magbigay ayuda sa mga Pilipinong biktima.
By Rianne Briones
Patay ang pito (7) katao habang sugatan ang hindi bababa sa animnapu (60) sa nangyaring pagsabog sa harap ng isang kindergarten sa China.
Ayon sa ulat, karamihan sa mga nabiktima ng pagsabog ay ang mga magulang na susundo sana sa kanilang mga anak sa paaralan.
Nakita naman sa mga raw videos na inupload sa social media ang duguang mga tao kabilang ang ilang mga bata.
Nagpapatuloy ang imbestigasyon ng mga awtoridad para alamin kung sino at ano ang naging dahilan ng naturang pagsabog.
By Rianne Briones
Inihirit ng ilang mambabatas na ilabas ng Malacañang ang tunay na estado ng kalusugan ni Pangulong Rodrigo Duterte.
Kasunod ito ng halos isang linggo nitong pananahimik at hindi pagpapakita sa publiko.
Sinabi ni Magdalo Partylist Rep. Gary Alejano, obligasyon ng Malacañang na magbigay ng mas malinaw na paliwanag sa tunay na kalagayan ng Pangulo.
Aniya, itinuturing na national security issue ang kalusugan ng Pangulo kaya’t hindi makabubuti na magkaroon ng iba’t ibang ispekulasyon sa tunay nitong kalagayan.
Kaugnay nito, inihirit ni Buhay Partylist Representative Lito Atienza sa Malacañang na magpalabas ng medical bulletin hinggil sa kondisyon ng Pangulo.
Aniya, ang medical bulletin ng Pangulo ay makapagpapalinaw at magpapatigil sa mga ispekulasyon sa kalusugan ng Pangulong Duterte.
Una nang ipinalabas ng Malacañang ang mga larawan ni Pangulong Rodrigo Duterte kasunod ng mga espekulasyon na may sakit ang Presidente kaya hindi ito nakikita ng publiko.
Sa larawan ay makikita ang Pangulo nakipagkamay pa sa mga opisyal ng Philipppine Air Force sa Pasay City bago ito tumulak sa Davao City.
Sa account naman ni Special Assistant to the President Bong Go, nag- post ito ng larawan nila ng Pangulo kung saan ay tinukoy pa nito na nagtatrabaho ang Pangulo sa Bahay Pagbabago.
Umugong ang espekulasyon na may malubhang sakit ang Pangulo matapos na bigong dumalo ang Pangulo sa pagdiriwang ng Araw ng Kasarinlan sa Rizal Park.
By Rianne Briones / with report from Aileen Taliping (Patrol 23)
Nagsimula nang i-proseso ng Department of Justice o DOJ sa pamamagitan ng Board of Claims ang pagbibigay ng kompensasyon sa mga apektadong residente sa patuloy pa ring bakbakan sa Marawi City.
Pinangunahan ni DOH Undersecretary Reynante Orceo at BOC Chairman Jorge Catalan ang pagtanggap ng aplikasyon kahapon sa Camp Evangelista sa Cagayan de Oro City.
Makatatanggap ng hanggang sampung libong (10,000) cash ang mga bakwit para sa kanilang hospitalization, medical treatment, loss of wage, loss of support at iba pa.
Una nang nangako ang Department of Social Welfare and Development o DSWD ng tig-P5,000 bilang cash assistance kada pamilya.
Ayon kay DSWD Secretary Judy Taguiwalo, P1,000 ang kanilang ibibigay sa mga apektadong residente bilang food assistance sa panahon ng Ramadan.
Habang ang nalalabinig P4,000 naman ay para sa transportasyon at iba pang mga gastusin ng mga evacuees sa pagbabalik nila sa kanilang mga tahanan.
Kasunod nito, nagkaloob din ang DSWD ng family food pack na naglalaman ng anim na kilo ng bigas, tatlong de lata ng corned beef at sardinas gayundin ang anim na pakete ng kape.
By Jaymark Dagala / Rianne Briones/ with report from Jill Resontoc (Patrol 7)
Tinapos na ng Supreme Court ang oral arguments sa mga petisyon laban sa idineklarang Martial Law ni Pangulong Rodrigo Duterte sa Mindanao, matapos ang dalawang araw na public debates.
Ayon kay SC Court Spokesman Theodore Te, nagpasya ang mga mahistrado na isara sa publiko ang talakayan sa ikatlong araw ng oral arguments, alinsunod sa hiling ni Solicitor General Jose Calida.
Nakadalo rin aniya sina Defense Secretary Delfin Lorenzana at AFP o Armed Forces of the Philippines Chief of Staff, General Eduardo Año sa closed-door discussions makaraang payagan ng Korte Suprema ang hirit naman ni Albay Representative Edcel Lagman, isa sa mga petisyon laban sa batas militar.
Si Lorenzana ang itinalaga ni Pangulong Duterte bilang Martial Law administrator habang si Año ang implementor.
Gayunman, hindi na idinetalye ni Te kung ano ang mga tinalakay sa oral arguments dahil bahagi ito ng national security.
Alinsunod sa Rule 119, section 21 ng rules of court, pinagbabawalan ang SC na isapubliko ang anumang impormasyon na maaaring maging hadlang o makaapekto sa pambansang seguridad.
By Drew Nacino
Nagpahayag ng pag-asa si Marawi Bisho Edwin Dela Peña na matutuldukan na sa lalong madaling panahon ang krisis na nagpapatuloy sa Marawi City.
Ayon sa obispo, malaki ang kaniyang pananalig na maibabalik agad ng pamahalaan ang kapayapaan at kaayusan sa kanilang lungsod.
Nais na aniya ng mga residente na maka-uwi sa kani-kanilang mga nasirang tahanan upang bumangon at makapagsimulang muli sa kanilang buhay.
Kasunod nito, umapela naman sa publiko si Caritas Philippines Chairman at Nueva Caseres Archbishop Rolando Tria Tirona na patuloy na magpadala ng tulong para sa mga kababayang taga-Marawi na nagsilikas dahil sa kaguluhan.
By: Jaymark Dagala / Aya Yupangco
Tuluyan nang tinanggal ng DOLE o Department of Labor and Employment ang moratorium sa pagpapadala ng mga manggagawang Pilipino sa bansang Qatar.
Ito’y ayon kay Labor Secretary Silvestre Bello III ay resulta ng konsultasyon nito kay Foreign Affairs Secretary Alan Peter Cayetano gayundin sa naging rekumendsayon ng POLO o Philippine Overseas Labor Office sa nasabing bansa.
Mayruon aniyang 28 bagong guro at 20 bagong bus drivers ang magtatrabaho ngayon sa PSD o Philippine School Doha at Philippine International School sa Qatar.
Maliban sa pagtitiyak na ligtas ang mahigit 24,000 Pilipino sa Qatar, sinabi rin ni Bello na patuloy din ang pakikipag-ugnayan ng POLO sa Qatari Authorities para sa repatriation ng mga distressed OFW duon.
By: Jaymark Dagala / Aya Yupangco
Inilipat na sa kostudiya ng BJMP o Bureau of Jail Management and Penology sa Camp Bagong Diwa sa Taguig City ang ina ng magkapatid na Omar at Abdullah Maute na si Ominta Romato alyas Farhana.
Ayon kay Justice Secretary Vitaliano Aguirre, kasama ni Farhana sa pasilidad ng BJMP si dating Mayor Fahad Salic at siyam na iba pa na kinasuhan ng rebelyon sa Marawi City.
Una nang inilipat sa nasabing pasilidad ang ama ng magkapatid na Maute na si Cayamora na naaresto sa isang check point sa Davao City nuong isang linggo.
Magugunitang muling inapela ng kalihim sa Korte Suprema na ilipat ang pagdinig sa kasong rebelyon laban sa mag-asawang Maute at iba pa sa Metro Manila dahil sa usaping pangseguridad.
By: Jaymark Dagala
Nagtutulungan na ang LTFRB o Land Transportation Franchising and Regulatory Board at ang MMDA o Metro Manila Development Authority para maayudahan ang mga apektadong pasahero ng MRT 3.
Ayon kay LTFRB Chairman Martin Delgra, nagpakalat na sila ng mas maraming bus upang maging alternatibo ng mga apektadong pasahero.
Ngunit paglilinaw ni Delgra, may bayad ang mga naturang bus na kapareho ng pamasahe sa MRT at hihinto lamang sa mga istasyon nito sa bahagi ng EDSA.
Bukod pa aniya ito sa mga libreng sakay na ini-aalok ng MMDA na daraan din sa EDSA depende sa destinasyon ng mga pasahero.
By: Jaymark Dagala