Isandaang porsyento (100%) nang handa at naka-kondisyon na si Fighting Senator Manny Pacquiao para sa laban nila ni Australian Boxer Jeff Horn sa Hulyo 2.
Tiniyak ito ni Assistant Trainer Buboy Fernandez matapos sumalang sa sampung (10) rounds ng sparring si Pacman noong Huwebes kung saan tig-tatlong (3) rounds ito kina Pinoy Boxer Sonny Katiandagho at Australian na si George Kambosos, Jr. at apat (4) na rounds naman kay Mexican Adrian Young.
Ayon kay Fernandez, matapos marating ni Pacquiao ang peak, pababa na ang kanilang training at kailangan na lamang itong i-maintain hanggang sa mismong araw ng laban.
Tikom naman ang bibig ni Fernandez hinggil sa fearless forecast niya kaugnay sa Pacquiao – Horn bout at mahalagang mapasakamay pa rin nila ang korona.
Lilipad papuntang Australia ang Team Pacquiao sa Hunyo 24 sakay ng isang 300 seater plane mula sa General Santos City.
By Judith Estrada – Larino
Halos animnapu (60) katao na ang nasawi sa evacuation centers sa Marawi City dahil sa dehydration at iba pang sakit.
Ipinabatid ito ni Health Secretary Paulyn Ubial na nagsabi ring apatnapung (40) kaso ay dahil sa dehydration samantalang labingsiyam (19) na nasawi ay dahil sa mga sakit na nakukuha mula sa pagsisiksikan sa mga evacuation centers.
Ayon kay Ubial, ilan sa mga nasawi ay mayroon na talagang sakit bago pa dumating sa mga evacuation center.
Namomonitor aniya ng DOH ang mga kaso ng gastroenteritis, upper respiratory diseases, diarrhea at skin diseases sa mahigit dalawampung libo (20,000) katao o mahigit apat na libong (4,000) pamilyang nasa evacuation centers.
Pumapalo sa animnapu’t walo (68) ang evacuation centers sa Iligan City, Cagayan de Oro City at Lanao del Sur na siyang mayroong pinakamalaking bilang ng evacuees.
By Judith Larino
Nag-iwan ng mga bomba ang Maute group sa maraming bahay na kanilang kinubkob sa Marawi City.
Ayon kay Lt. General Carlito Galvez, commanding general ng WESMINCOM o Western Mindanao Command, ito ang dahilan kayat natatagalan sila sa kanilang clearing operations sa mga barangay na nabawi na nila mula sa Maute group.
“Noong nagke-clearing po ng bahay, yung special forces po natin ay nagkaroon ng IED shrapnel, mga pako po ang tama nila, ang nakikita natin na ang ginagawa ng ating mga kalaban is nag-iinplace ng IED so yun ang medyo nagde-delay sa aming speed kasi nakalagay sa mga bahay.” Ani Galvez
Ayon kay Galvez, sa nagdaang limang araw ay malaking ground ang nakuha nila mula sa kamay ng Maute sa Marawi City.
Gayunman, tumanggi si Galvez na sabihin kung hanggang kelan pa tatagal ang labanan.
“Ang Moncado colony nakuha na natin, partly po ng buong colony na yun, may mga areas lang na nahirapan kaming kunin in almost 2 days ngayon nakuha na natin, marami tayong body counts na nakuha, sniper kills na nagawa, may mga sub leaders tayo na na-identify.” Dagdag ni Galvez
Maute hostages
Samantala, tukoy na ng militar ang kinaroroonan ng mga bihag ng Maute group sa Marawi City.
Ayon kay Lt. General Carlito Galvez, commanding general ng WESMINCOM o Western Mindanao Command, maliban sa mga bihag, natukoy nilang may mga residente pa ring naiipit sa ilang mga lugar.
Ang mga sibilyan at ang mga bihag anya ang pangunahin sa kanilang kunsiderasyon kayat hinay-hinay lamang sila sa pag-usad sa mga lugar na kontrolado ng Maute group sa Marawi City.
Matatandaan na sa unang araw pa lamang ng pag-atake ng Maute sa Marawi City noong Mayo 23 ay binihag na nila si Father Teresito Suganob at iba pang tauhan ng kanyang simbahan sa Marawi City.
“Ang primary considerations natin ay mga hostages at lives ng mga trapped civilians, yan po talaga ang medyo nagpapatagal sa atin kasi habang lumalapit tayo sa pinaka-sentro alam po natin ang locations ng ating trapped civilians, andun pa rin po, there are still a lot of civilians inside, may mga monitoring kami, we cannot divulge the information due to operation matter.” Pahayag ni Galvez
By Len Aguirre | Ratsada Balita (Interview)
Dapat magsalita na ang doktor ng Pangulo o ang Pangulong Rodrigo Duterte mismo sa tunay nitong kalagayan.
Ayon kay Professor Clarita Carlos, isang political analyst, matatapos lamang ang mga ispekulasyon na may grabeng karamdaman ang Pangulo kung mismong ang doktor nito ang magsasalita hinggil sa pangangailangan nitong magpahinga pansamantala.
Wala naman anyang masama kung sabihin sa publiko na masama ang pakiramdam o may trangkaso o sobra ang pagod na naramdaman ng Pangulo dahil sa dami ng kanyang trabaho.
“Kung may nararamdaman ang Presidente, may trangkaso siya etc., magsabi na kayo kasi the President is a human being, like ngayon kausap mo ako, I’m sure may telepono siya sa tabi, puwedeng sabihin niya, mga kababayan buhay pa po ako, huwag kayong mag-alala, nagpapahinga lang ako kesyo may masakit sa katawan ko, ganun na lang para matapos ang mga conjectures na yan, kasi alam mo ang conjectures mas dramatic kesa sa kung ano ang nangyayari. Imbes na kumuha ka ng litrato eh pagsalitain mo na siya.” Pahayag ni Carlos
Una nang ipinalabas ng Malacañang ang mga larawan ni Pangulong Rodrigo Duterte kasunod ng mga espekulasyon na may sakit ang Presidente kaya hindi ito nakikita ng publiko.
Sa larawan ay makikita ang Pangulo na nakipagkamay pa sa mga opisyal ng Philipppine Air Force o PAF sa Pasay City bago ito tumulak sa Davao City.
Sa account naman ni Special Assistant to the President Bong Go, nag- post ito ng larawan nila ng Pangulo kung saan ay tinukoy pa nito na nagtatrabaho ang Pangulo sa Bahay Pagbabago.
Umugong ang espekulasyon na may malubhang sakit ang Pangulo matapos na bigong dumalo ang Pangulo sa pagdiriwang ng Araw ng Kasarinlan sa Rizal Park.
By Len Aguirre | Ratsada Balita (Interview)
Nagdadalang-tao ngayon sa edad na 46 ang komedyanang si Pokwang o Marietta Subong sa totoong buhay.
Ito ay ayon sa kanyang manager at malapit na kaibigan na si Ogie Diaz.
Sa Facebook post ni Ogie, binati nito si Pokwang sa kanyang pagbubuntis sa magiging panganay nila ng boyfriend na si Lee O’Brian.
Sa kasalukuyan ay wala pang kumpirmasyon mula sa komedyana.
Matatandaang taong 2015 nang ibahagi ni pokwang na nakunan siya sa dapat ay panganay nila ni Lee.
By Krista de Dios
Apat (4) ang patay habang walo (8) ang sugatan sa panibagong suicide bombings sa Kabul, Afghanistan.
Naganap ang pag-atake sa isang Al-Zahra Shiite Mosque habang abala ang marami sa pagdarasal sa kasagsagan ng Ramadan at pagbisita ni United Nations Secretary-General Antonio Guterres.
Ayon sa mga awtoridad, pinasabog ng mga salarin ang kanilang sarili sa kusina makaraang pagbawalan ng mga pulis na pumasok sa mosque.
Inako naman grupong islamic state ang panibagong pambobomba.
By Drew Nacino
Tutulong na sa militar at pulisya sa pagbibigay seguridad laban sa mga teroristang grupo partikular ng ISIS-Maute sa Cotabato City ang tinatayang isanlibong (1,000) barangay tanod.
Inarmasan ang mga nasabing tanod para sa domestic anti-terrorism campaign at pagbabantay sa tatlumpu’t pitong (37) barangay sa lungsod.
Pinangasiwaan naman nina Cotabato City Mayor Cynthia Guiani-Sayadi, Col. Jose Gongona ng Task Force Kutawato, Senior Supt. Victor Valencia, hepe ng Cotabato City Police at mga opisyal ng 5th Special Forces Battalion ang pulong ng mga volunteer community watchmen.
Tiniyak ng mga tanod na karamiha’y Muslim na kanilang papatayin ang sinumang miyembro ng ISIS o Maute maging ang mga sympathizer nito.
By Drew Nacino
Nireskabakan ng Barangay Ginebra San Miguel Gin Kings sa Game 3 ng semi-finals ng PBA Commissioners’ Cup ang TNT Katropa.
Itinumba ng Gin Kings ang Katropa sa score na 125-101 upang ipako ang kartada sa 2-1, sa best of 5 series, sa kanilang paghaharap sa Araneta Coliseum, kahapon.
Iniangat ni Justin Brownlee ang Ginebra makaraang magpakawala ng 31 points habang kumamada ng 16 points si RR Garcia para sa TNT.
Bagaman nakabawi ang Barangay Ginebra sa Game 3, abot-kamay pa rin ng Katropa ang pagbabalik sa finals ng PBA Commissioners’ Cup.
Muling maghaharap ang dalawang koponan sa Game 4, sa Cuneta Astrodome, sa Pasay, bukas.
By Drew Nacino
*Photo: PBA Images
