Isang miyembro ng Civilian Armed Forces Geographical Unit o CAFGU ang patay sa gitna ng sagupaan ng militar at Bangsamoro Islamic Freedom Fighters o BIFF sa Pigcawayan, North Cotabato.
Ayon kay Capt. Nap Alcarioto, Spokesman ng 602nd Brigade, dalawang (2) CAFGU naman ang nasugatan sa bakbakan.
Pitumpu’t tatlong (73) sibilyan naman ang nailigtas mula sa conflict zone na pawang binihag ng BIFF sa Barangay Malagakit.
Bagaman nakubkob ng BIFF ang Malagakit Elementary School, dakong alas-7:00 kagabi nang umatras ang bandidong grupo at iniwan ang kanilang bihag.
Dahil dito, na-contain na aniya ang kaguluhan pero nananatiling nakaalerto ang militar sa posibleng pag-resbak ng mga bandido.
By Drew Nacino
Pinatawad na ng mga Maranao si Pangulong Rodrigo Duterte dahil sa deklarasyon nito ng Martial Law sa Mindanao at karahasan bunsod ng nagpapatuloy na military operations sa Marawi City laban sa ISIS-Maute group.
Ayon kay ARMM o Autonomous Region in Muslim Mindanao Assemblyman Zia Alonto Adiong ng Lanao del Sur Crisis Management Committee, naramdaman nila ang sinseridad ng Pangulo sa paghingi ng tawad at kanilang pinapupurihan ang malasakit nito bilang commander-in-chief.
Naiintindihan aniya nila ang pangangailangan ng administrasyong Duterte na maglunsad ng matapang na aksyon laban sa teroristang grupo.
Umaasa naman si Adiong na ang paghingi ng tawad ng Pangulo ay magbubukas ng mas maraming oportunidad para sa produktibong komunikasyon sa pagitan ng punong ehekutibo at mga Maranao.
By Drew Nacino
Posibleng lagdaan na ni Pangulong Rodrigo Duterte sa Eid’l Fitr sa Lunes, Hunyo 26 sa Malacañang ang draft ng Bangsamoro Basic Law o BBL.
Gayunman, nilinaw ni Pangulong Duterte na nag-aalangan siyang sertipikahan bilang urgent ang binalangakas na BBL ng Bangsamoro Transition Committee.
Ito, anya, ay dahil hinihintay pa niya ang bersyon ni Moro National Liberation Front o MNLF founding Chairman Nur Misuari.
Tiniyak naman ni pag-aaralan niyang mabuti ang binalangkas na BBL bago isumite sa Kongreso.
PAKINGGAN: Bahagi ng pahayag ni Pangulong Rodrigo Duterte
By Drew Nacino
Hihigpitan na ng pamahalaan ang paggamit ng mga paputok o firecracker tuwing may okasyon tulad ng Pasko at Bagong Taon.
Ito’y makaraang pirmahan na ni Pangulong Rodrigo Duterte ang Executive Order Number 28 na nagtatakda ng regulasyon at kontrol sa paggamit ng mga paputok.
Sa ilalim ng nasabing kautusan, mahigpit nang ipinagbabawal ang paggamit ng paputok sa mga bahay-bahay sa halip ay maglalaan na lamang ng isang lugar ang komunidad para rito.
Nakasaad din sa nasabing kautusan na tanging ang Philippine National Police o PNP lamang ang naatasang magsagawa ng fireworks display sa pakikipag-ugnayan nito sa iba pang mga ahensya ng pamahalaan.
Kabilang sa mga makakatuwang ng PNP ay ang Departments of Health, Interior and Local Government, Environment at Bureau of Fire para sa pagbalangkas ng IRR o Implementing Rules and Regulations.
By Jaymark Dagala / with report from Aileen Taliping (Patrol 23)
Napasok na ng militar ang nalalabing defensive position ng mga natitirang miyembro ng ISIS-Maute sa Marawi City.
Ayon kay Lt. Col. Jo-Ar Herrera, spokesman ng Task Force Marawi, ilang bangkay ng sibilyan at terorista ang narekober kasama ang kanilang mga armas.
Gayunman, hindi idinetalye ni Herrera kung gaano karaming bangkay ang kanilang narekober.
Okupado pa rin anya ng grupo ang ilang gusali at mosque sa apat na barangay sa Marawi.
By: Drew Nacino
Balak ng gobyermo na magtayo ng rehabilitation center na kayang mag-accommodate ng 14,500 illegal drug dependents bago matapos ang taon.
Ayon kay Health Secretary Paulyn Ubial, kabilang sa mga probinsyang tinitignang pagtayuan ng rehab centers ay ang Bataan, Davao, Bohol, Bukidnon, Agusan del Sur, Sarangani, Cavite at Bicutan sa Taguig City.
Ipinabatid ni Ubial na sa kasalukuyan, ang total bed capacity ay 5,000 na nakakalat sa may 13 regional rehabilitation centers sa bansa.
Dagdag pa ng kalihim, inaasahang matatapos sa taong ito ang konstruksyon ng walong mega drug rehabilitation centers na sagot ng pribadong sektor
By: Meann Tanbio
Umapela si Defense Secretary Delfin Lorenzana sa publiko lalo sa mga netizen na i-report agad sa mga otoridad ang mga terrorist-linked social media account at iwasang mag-share ng mga unverified information sa internet na makatutulong sa mga terorista.
Ito ang inihayag ni Lorenzana ilang linggo matapos manawagan ang Armed Forces sa social media giant Facebook na alisin ang mga terrorist-linked account na ginagamit ng radikal na muslim upang ipakalat ang kanilang propaganda.
Ayon kay Lorenzana, dapat mag-ingat ang publiko sa pag-she-share nila ng impormasyon dahil maaari itong magdulot ng panic na isang paraan upang mapalakas ang propaganda ng mga terorista.
Noong Hunyo 29 , 63 accounts na hinihinalang supporter o sympathizer ng ISIS-Maute ang ipina-deactivate NG afp sa Facebook Philippines.
By: Drew Nacino
Nagsanib-pwersa ang National Food Authority at DSWD sa pagsasagawa ng imbestigasyon makaraang makatanggap ng report na mayroon umanong mga pekeng bigas na ipinamahagi sa bayan ng Sta. Fe sa Bantayan Island, Cebu.
Ayon sa ulat, ang mga pekeng bigas diumano ay nakuha ng mga residente ng Sta. Fe mula sa 4P’s o Pantawid Pamilyang Pilipino Program ng gobyerno.
Kaugnay nito, sinabi ni DSWD Central Visayas Information Officer Leah Quintana na hindi sila namigay ng NFA rice sa mga benepisyaryo ng 4P’s sa bayan ng Sta. Fe.
Nilinaw ni Quintana na nang mamigay ang DSWD ng cash assistance para sa 4P’s, namigay din sila ng dagdag na P600 bilang rice allowance.
Hinikayat naman ni Olma Bayno, information officer ng NFA Central Office, ang mga residente ng Sta. Fe na magpunta sa NFA office at magdala ng sinasabing pekeng bigas para maisailalim sa eksaminasyon.
By: Meann Tanbio
Hindi natuloy ang pre-trial sa kasong graft laban kay dating PNP Chief Alan Purisima kahapon na may kaugnayan sa maanomalyang kontrata ng gun license delivery na pinasok ng PNP sa Werfast noong 2011.
Ito’y makaraang humingi ng karagdagang araw ang Sandiganbayan 6th Division para sa pagmarka ng mga ebidensya at mabigyan din ang magkabilang panig ng mas mahabang panahon upang markahan ang mga ebidensya sa naturang kaso.
Sa halip ay itinakda na lang ng Korte ang pre-trial sa August 15.
Hindi ito ang unang pagkakataon na kinansela ng Korte ang pre-trial sa kaso ni Purisima na nauna nang ipinagpaliban noong January 10, April 18 at June 6.
By: Meann Tanbio