June 2026

Dumistansya ang kampo ni Janet Lim Napoles sa ibinunyag ni Justice Secretary Vitaliano Aguirre na posibleng kinukupkop ng isang tao o grupo ang kapatid nitong si Reynald Lim, kapwa akusado ni Napoles sa kasong serious illegal detention.

Ayon kay Atty. Stephen David, abogado ni Napoles, wala namang binabanggit sa kanya ang kanyang kliyente tungkol sa kanyang kapatid.

Dapat anyang maghain na ng mosyon ang mga abogado ni Lim upang maisara na rin ang kanyang kaso makaraang ma absuwelto na si Napoles na syang principal sa kaso.

Una rito, sinabi ni Aguirre na posibleng itinatago ng isang tao o grupo si Lim upang pigilan itong magsalita ng kanyang nalalaman sa PDAF scam.

“Kasi wala nang reason para magtago pa siya [si Lim] o unless yung sinasabi mo na hostage din siya pero hindi ko alam ganun, wala siyang [si Napoles] sinasabi na ganun…wala…wala…”, bahagi ng pahayag ni David sa panayam ng DWIZ.

By Len Aguirre | Ratsada Balita (Interview)

Status quo muna ang mga nasunspindi at ipinasarang mining companies ni dating Environment Secretary Gina Lopez.

Ayon kay Environment Secretary Roy Cimatu, nais muna niyang malaman ang tunay na sitwasyon sa industriya ng pagmimina.

Posible anyang magpatawag siya ng reauditing pagkatapos ng gagawin nyang paglilibot sa mga minahan.

Matatandaan na mahigit sa dalawampung (20) minahan ang ipinasara noon ni Lopez dahil sa mga di umano’y paglabag sa batas sa pagmimina samantalang mahigit sa pitumpung (70) iba pa ang sinuspindi ang operasyon.

PAKINGGAN: Bahagi ng pahayag ni DENR Secretary Roy Cimatu

Kasabay nito, tiniyak ni Cimatu na hindi niya ikokompromiso ang kapakanan ng kalikasan sa mga negosyate.

Ginawa ni Cimatu ang pagtiyak sa harap ng mga reports na may mga opisyal ng mga minahan sa bansa ang nais na makipagkita sa kanya.

PAKINGGAN: Bahagi ng pahayag ni DENR Secretary Roy Cimatu

Other environmental issues

Marami pang isyung pangkalikasan na dapat tutukan maliban sa pagmimina.

Tinukoy ni Secretary Cimatu, ang problema sa malinis na tubig, ang polusyon, basura, pagkakalbo ng kabundukan at maraming iba pa.

Sinabi ni Cimatu na unang unang naging direktiba nya sa kanyang mga opisyal ay tiyaking maipatutupad ng husto ang Clean Air Act.

PAKINGGAN: Bahagi ng pahayag ni DENR Secretary Roy Cimatu

To environmental groups

Inamin ni Environment Secretary Roy Cimatu na kulang ang kaalaman nya pagdating sa propesyonal na paghawak sa ahensyang may kinalaman sa kalikasan tulad ng dept of environment and natural resources.

Tugon ito ni cimatu sa pagtutol ng ilang environmental groups sa pagtatalaga sa kanya sa denr dahil sa kawalan umano ng karanasan sa mga isyung may kinalaman sa kalikasan.

Binigyang diin ni cimatu na sa kanyang personal na kapasidad ay mayroon naman syang naging kontribusyon upang pangalagaan ang kapaligiran.

PAKINGGAN: Bahagi ng pahayag ni DENR Secretary Roy Cimatu

By  Len Aguirre | Ratsada Balita (Interview)

Nananatiling ligtas puntahan ang Palawan.

Ito ang ginawang pagtitiyak ni Department of Tourism o DOT Assistant Secretary Ricky Alegre kasunod ng mga inilabas na travel advisory ng Amerika, United Kingdom at Canada sa kanilang mga mamamayan na huwag munang magtungo sa nasabing lugar dahil sa banta ng terorismo.

“We are monitoring, ang importante sa amin is yung agad na pag-augment ng puwersa ng AFP (Armed Forces of the Philippines) at PNP (Philippine National Police) sa Palawan, itong terror threat is a modern day hazard, at kung hindi talaga safe pati kami sa DOT will tell the world na huwag munang puntahan ang lugar pero sa monitoring namin sa Palawan, it is safe to go.” Ani Alegre

Idinagdag ni Alegre na isa ang Palawan sa mapayapang lugar sa bansa.

“In our data kasi zero crime incidence ang Palawan, in fact 65 percent of the 1 million visitors in Palawan ay mga domestic tourist, mga kababayan natin at sa top 10 ang pinakamataas sa foreign ay tourists from America.”Dagdag ni Alegre

Bagamat naiintindihan aniya niya na responsibilidad ng ibang bansa na paalalahanan at pangalagaan ang kanilang mga mamamayan ay binigyang diin ni Alegre na mahalagang hindi rin lang dapat basta-basta ang paglalabas ng mga travel advisory.

“Sana naman magbigay ka ng advisory for a few days, nakita mo yung ginawa ng South Korea sa Bohol recently, 1 week lang siya, dated, hindi siya open dated, ang problema mag-iisyu wala nang pag-lift ng inisyung travel advisory.”Pahayag ni Alegre

Iginiit ni Alegre na pinaka-importante pa rin ang pagtutulungan at pagiging alerto ng mga Pilipino bilang isang bansa laban sa mga banta ng terorismo.

“Nakita mo yung nangyari sa Bohol, dahil sa collaboration ng community, barangay at mga authorities ay nahuli (ang mga miyembro ng Abu Sayyaf Group), in fact nagbigay na ng reward.”

By  AR | Ratsada Balita (Interview)

Naaalarma ang NDFP o National Democratic Front of the Philippines sa sunod-sunod na pagtatalaga ni Pangulong Rodrigo Duterte sa mga dating heneral sa kanyang gabinete.

Matatandaang binanggit ng Pangulo na mabubuo na ang kanyang military junta kasunod ng pag-anunsyo nito na itatalaga niya si AFP o Armed Forces of the Philippines Chief of Staff General Eduardo Año bilang DILG o Department of Interior and Local Government Secretary pagkatapos ng pagreretiro nito sa militar.

Ayon kay NDF Founding Chairman Jose Maria Sison, militarisasyon sa gabinete ng Pangulo ang posibleng maging banta sa peace talks sa pagitan ng gobyerno at rebeldeng grupo.

Pinaalalahanan pa ni Sison ang Pangulo na ang Martial Law o maging ang militarisasyon sa gobyerno ay hindi solusyon sa mga problemang kinakaharap ng bansa.

Tinutulan din ng grupong Anakbayan ang pagtatalaga ni Pangulong Rodrigo Duterte ng mga dating heneral sa kanyang gabinete.

Ayon sa grupo, nagiging pang militar na ang mga posisyong dapat sana’y pang sibilyan.

Sinabi naman ni Anakpawis Rep. Ariel Casilao, sa pagtatalaga ng Pangulo ng mga ex- military sa kanyang gobyerno ay tila pagsusulong ito ng authoritarianism at pagbalewala sa karapatang pantao.

Samantala, naniniwala ang ilang eksperto na posibleng ang pagkilos na ito ng Pangulo ay pagpapalakas sa kanyang mga polisiya tulad ng kampanya kontra iligal na droga.

Bukod dito, posibleng istratehiya ito ng Pangulo para mas mapaigting ang suporta ng militar sa mga isinusulong nito tulad ng peace talks sa CPP-NPA at pakikipagmabutihan sa China.

By  Rianne Briones