Pinangalanan na ang magiging bagong pinuno ng Armed Forces of the Philippines o AFP na ipapalit kay AFP Chief of Staff Eduardo Año na itinalaga naman ni Pangulong Rodrigo Duterte bilang kalihim ng DILG o Department of Interior and Local Government.
Ayon sa pahayagang Manila Standard si Eastern Mindanao Command Chief Lt. General Rey Leonardo ang susunod na AFP Chief.
Si Guerrero ay miyembro ng Philippine Military Class of 1984.
Matatandaang inanunsyo ni Pangulong Duterte ang pagtalaga nito kay Año bilang DILG Secretary bago ito lumipad patungong Cambodia.
By Ralph Obina
Muling magsasama sa isang show ang mag-ex na sina Gretchen Ho at Robi Domingo.
Kahit na mag-ex na lang daw ang dalawa ay matagumpay naman nilang natapos ang taping ng kanilang show sa Channel 23 na “University Town.”
Aminado si Gretchen na mahirap noong una dahil, siyempre, fresh pa sila sa break-up at nandoon pa raw ‘yung awkwardness.
Gayunman, sinabi ng dalaga na pinag-usapan na nila ito at kailangan nilang gawin nang maayos para sa ikagaganda ng show.
Sa panig naman ni Robi, hindi raw siya sanay na maging sentro ng intriga ang kanyang love life lalo pa’t nadamay maging si Sandara Park sa kanilang break-up ni Gretchen.
By Jelbert Perdez
Sinibak na sa puwesto ang hepe ng Mabalacat PNP o Philippine National Police at ang hepe ng Drug Enforcement Unit o DEU nito kasunod ng pagkakasangkot ng ilan nilang mga tauhan hinggil sa umano’y tanim-droga.
Ayon kay PNP Region 3 Director Chief Supt. Aaron Aquino, tinanggal sa pwesto sina Mabalacat Chief of Police Supt. Juritz Rara at ang DEU Chief nitong si Sr. Insp. Melvin Florida dahil sa command responsibility.
Bukod sa kanila, sinibak din ang hepe ng Bacolor PNP na si Chief Insp. Sonia Alvarez at ang hepe ng Provincial Drug Enforcement Unit nito na si Chief Insp. Philip Pineda.
Isinailalim na sa provincial administrative holding center ang apat (4) na nabanggit na opisyal habang sila’y iniimbestigahan.
By Meann Tanbio | with report from Jonathan Andal (Patrol 31)
Dalawampung (20) miyembro ng Abu Sayyaf Group ang patay matapos bombahin ng militar mula sa ere ang kampo ng mga bandido sa Barangay Pamatskaen, Sumisip Basilan.
Sinasabing doon nagkukuta ang Abu Sayyaf sub-leader na si Furuji Indama.
Ayon kay 4th Special Forces Battalion Commmanding Officer Lt. Col. Andrew Bacala, ginamitan nila ng supersonic fighter jets ang mga bandido, bukod pa sa mga kanyon at baril.
Narekober ng militar ang mga materyales sa paggawa ng bomba, mga pagkain at tatlong (3) live IEDs o improvised explosive devices kung saan isa (1) ang sumabog na ikinasugat ng2 sundalo.
Tuluyan na ring nakubkob ng militar ang kampo ng mga bandido alas-10:00 ng umaga kahapon.
Nakasagupa naman ng mga sundalo ang mga tumatakas na bandido 300 metro mula sa nakubkob na kampo ng Abu Sayyaf.
By Meann Tanbio | with report from Jonathan Andal (Patrol 31)
Pinapurihan ni Tourism Secretary Wanda Tulfo-Teo ang AFP at PNP sa ipinatutupad na seguridad sa Palawan.
Ito’y kasunod ng travel advisory warning hinggil sa diumano’y planong pagdukot ng mga teroristang grupo sa Palawan.
Ayon kay teo, maituturing pa rin ang Palawan bilang “Safe Tourist Destination”.
Kasabay nito, nanawagan ang kalihim sa iba pang bansa na maging patas at responsable sa pagpapalabas ng travel warnings.
By: Meann Tanbio
Inihayag ng NBI o National Bureau of Investigation na nagtatago sa Eastern Visayas si self-proclaimed Davao Death Squad hitman Edgar Matobato.
Ayon sa nbi Region 11, nagpadala na ang NBI Central Office ng ilang agents na maghahanap kay Matobato matapos silang makatanggap ng impormasyon na doon ito nagtatago.
Hindi naman binanggit ng NBI kung saan sa Eastern Visayas nagtatago si Matobato na sinasabing may kamag-anak sa lugar.
Aminado naman ang NBI na mahihirapan silang hanapin si Matobato dahil maraming NPA sa lugar.
By: Meann Tanbio
Nanawagan si Senador Sherwin Gatchalian na dapat na suriin muna nang husto ng Departmemt of Justice ang isusumiteng listahan ni Janet Lim Napoles.
Sa gitna ito ng pahayag ng abogado ni Napoles na isisiwalat nito lahat ng iba pang mga politiko at opisyal ng gobyerno na sangkot o nakinabang sa PDAF Scam
Bukod dito, sinabi ni Gatchalian na dapat ay suportado ng mga konkretong ebidensya o mga dokumento ang mga isisiwalat nito bago ito payagan na makapagbigay ng testimonya
Giit ni Gatchalian, si Napoles ang sentro ng tinaguriang biggest scam sa bansa kaya’t malamang ay kaya nitong panindigan at pakitaan ng mga konkretong ebidensya ang mga tutukuyin nito na iba pang sangkot sa PDAF Scam.
By: Meann Tanbio / Cely Bueno
Bukas si Senador Bam Aquino sa plano ng Department of Justice na muling imbestigahan ang PDAF Scam kung saan kinukunsidera pang gawing state witness si Janet Lim Napoles.
Sa kabila nito, umaasa si Aquino na hindi ito gagamitin upang gipitin ang mga hindi kaalyado ng Administrasyong Duterte.
Giit ng Senador, hindi na bago na gamitin ng gobyerno ang isang upang tumestigo sa kalaban nila kapalit ng paggaan ng parusa.
Tulad aniya ng nangyari kay Senador Leila de Lima gayundin ang pagbasura sa parusang Reclusion Perpetua sa serious illegal detention sa kaso ni Napoles at pagkonsidera pang gawin itong state witness.
Samantala, suportado din ni Aquino ang balak ni Senador Francis Escudero na paimbestigahan muli sa Senado ang PDAF Scam bast’t tiyakin lang aniya na ito ay magiging genuine investigation.
By: Meann Tanbio / Cely Bueno
Walang balak ang Senado na magpatawag ng special elections para sa magiging kapalit ni Senador Alan Peter Cayetano matapos itong maitalaga bilang kalihim ng Department of Foreign Affairs.
Ayon kay Senate President Aquilino “koko” Pimentel, hayaan na lamang na mapalitan ang seat ni Cayetano sa Senado sa magaganap na halalan sa 2019.
Hinikayat din ni Pimentel ang Commission On Elections na paghandaan na lang ng maaga ang naturang halalan.
Samantala, maging si Senate Minority Leader Franklin Drilon ay nagsabing impraktikal at magastos ang pagpapatawag ng special elections para lang maghalal ng isang Senador na dalawang taon na lamang ang natitirang termino.
By: Meann Tanbio / Cely Bueno