Agad na magtitipon ang mga kinauukulang ahensya ng pamahalaan para talakayin ang rekomendasyon ng United Nations ukol sa human rights situation sa Pilipinas.
Ayon kay Chief Presidential Legal Counsel Salvador Panelo, nagbigay ang UN Human Rights Council o UNHRC ng hanggang Setyembre para tumugon ang gobyerno ng Pilipinas sa inilabas nilang report.
Kabilang sa mga mungkahi ng UN ay alisin ang kondisyon ni Pangulong Rodrigo Duterte sa pagbisita ni UN Special Rapporteur Agnes Callamard para imbestigahan ang ukol sa extrajudicial killings na iniuugnay sa war on drugs ng pamahalaan.
Tinutulan din ng international body ang panukalang pagbuhat ng death penalty sa Pilipinas.
Matatandaang nagpadala ng delegasyon ang Pilipinas sa Geneva Switzerland para idepensa ang war on drugs ng pamahalaan at ipaalam ang tunay na kalagayan ng bansa sa pangunguna ni Senador Alan Peter Cayetano.
By Ralph Obina
Walang negatibong epekto sa ekonomiya ng Pilipinas ang umano’y banta ng terorismo sa pangunahing tourist destinations sa bansa.
Ito ang pagtitiyak ni Trade Secretary Ramon Lopez sa kabila ng travel warning na ipinalabas ng Estados Unidos, Canada, United Kingdom at iba pang mga bansa.
Patunay nito ayon kay Lopez, nananatiling maganda ang economic potential ng Pilipinas kung saan ay tumaas ng tatlumpu’t isang (31) porsyento ang investments sa bansa mula Enero hanggang Abril ng kasalukuyang taon mula sa negative figures na naitrala naman noong nakaraang taon.
Maliban dito, tiniyak ni Lopez na kontrolado ng pamahalaan ang security situation sa bansa na hindi dapat ipangamba ng mga mamumuhunan at mga turista.
By Ralph Obina
Kumpiyansa si Senador Manny Pacquiao na makakapasa sa Senado ang panukalang ibalik ang parusang kamatayan.
Ayon kay Pacquiao may numero naman silang mga pabor sa naturang panukala at kailangan lamang ay maipaliwanag lamang ng husto ang layunin nito.
Naniniwala si Pacquiao na kailangan ng bansa ang death penalty upang solusyunan ang problema sa iligal na droga na lason aniya ng lipunan.
Matatandaang si Pacquiao ang may akda ng tatlong (3) panukala na nagpapataw ng parusang bitay sa mga heinous crimes na kinabibilangan ng dangerous drugs, kidnapping at rape.
By Ralph Obina
Umarangkada na ang Ulama Summit o pagtitipon ng Islamic scholars sa Cotabato City.
Ito ay sa kabila ng pagbabanta mula sa radical terrorist group na Dawla Islamiya na una nang nagpahayag ng katapatan sa grupong ISIS.
Bago ang naturang summit ay nagbanta ang Dawla Islamiya na may mangyayari sa lahat ng mga dadalo dito.
Giit ng grupo, ginagamit lamang ni ARMM o Autonomous Region in Muslim Mindanao Governor Mujiv Hataman ang mga Ulama para sa personal agenda ng opisyal.
Layon ng Ulama Summit na bigyang diin na ang Islam ay hindi maaaring gamiting katwiran para sa pagsasagawa ng terorismo at paghahasik ng takot at karahasan.
Una nang sinabi ni Hataman na patuloy na nakakaapekto sa ekonomiya ng Mindanao ang karahasan at terorismo.
By Ralph Obina
Natupad din ang pangarap ni World Junior-Bantamweight Champion Jerwin Ancajas na makasama sa undercard ng Manny Pacquiao-Jeff Horn megafight sa Hulyo 2.
Ayon sa Panabo City fighter, hindi niya sasayangin ang bihirang pagkakataon na ito upang maipamalas ang bangis niya sa kanilang bakbakan sa ring ni Teiru Kinoshita ng Japan sa Suncorp Stadium sa Brisbane, Australia.
Nangako rin si Ancajas na hindi niya bibiguin ang kanyang promoter na si Pacquiao sa tiwalang ibinibigay nito sa kanya.
Matatandaang nasungkit ni Ancajas ang World Junior-Bantamweight title matapos gibain si McJoe Arroyo ng Puerto Rico noong September 2016 sa Taguig City.
Matagumpay ding nadepensahan ni Ancajas ang 115-pound belt nang mapatulog niya sa ika-pitong round si Mexican Jose Alfredo Rodriguez noong Enero sa Macau.
By Jelbert Perdez
Ibinunyag ng WHO o World Health Organization na isa (1) na ang nasawi buhat nang tumama ang ebola outbreak sa Democratic Republic of Congo noong Abril 22 kung saan dalawang iba pang kaso ang pinaniniwalaang dulot din ng katulad na virus.
Ayon kay WHO Spokesman Christian Lindmeier, iniulat din ng Congo Ministry of Health na siyam (9) na iba pang hinihinalang ebola cases ang naitala sa teritoryo ng Aketi sa hilagang silangan ng Bas-uele Province.
Sinasabing tatlong (3) tao na ang nasawi dahil sa hemorrhagic fever pero isa (1) lamang dito ang kumpirmadong sanhi ng ebola.
Magugunitang dalawang daan (200) katao ang nasawi sa tumamang ebola outbreak sa Congo noong 2007.
By Jelbert Perdez
Hinimok ni Agriculture Secretary Manny Piñol ang publiko na regular na gamitin ang katawagang Philippine Rise mula sa dating tawag na Benham Rise.
Ayon sa kalihim, mahalagang maitatak sa kasaysayan na ito ay tinatawag na parte ng Pilipinas at upang wala nang iba pa ang umangkin dito.
Matatandaang inaprubahan ni Pangulong Rodrigo Duterte ang pagpapalit ng pangalan ng Benham Rise sa Philippine Rise nito lamang Mayo 8.
Ang Philippine Rise ay labin tatlong (13) ektaryang undersea plateu na matatagpuan sa silangan ng Aurora.
By Ralph Obina
