June 2026

Pinagpapaliwanag ng Korte Suprema ang Department of Agrarian Reform hinggil sa land distribution sa Hacienda Luisita.

Sa inilabas na show cause order ng Supreme Court, inatasan nito ang DAR na ipaliwanag kung bakit hindi dapat sila i-cite for contempt dahil sa bigong pag-iimplementa ng land distribution.

Sakop din sa kautusan ang AMBALA o Alyansa ng mga Manggagawang Bukid sa Hacienda Luisita.

Sa isang resolusyon na inilabas noong May 3, binigyan ng SC ang DAR ng 10 araw para magsumite ng kanilang tugon sa motion for contempt na inihain ng RCBC o Rizal Commercial Banking Corp. noong nakaraang buwan.

Sa naturang mosyon, inakusahan ng RCBC si DAR Secretary Rafael Mariano na nilabag ang desisyon ng high tribunal na nag-uutos sa ahensya na ipamahagi ang 500 ektaryang lupa sa Hacienda Luisita sa mga magsasaka.

Nabatid na pagmamay-ari ng RCBC ang 184 hectare property sa Hacienda Luisita.

By: Meann Tanbio

Kinumpirma ni Justice Secretary Vitaliano Aguirre na magkakaroon ng re-investigation sa kontrobersyal na PDAF o Pork Barrel Fund Scam.

Ayon kay Aguirre, lilikha siya ng bagong panel of prosecutors na mangunguna sa pagbubukas ng panibagong imbestigasyon sa PDAF Scam.

Naniniwala aniya siya na  nagkaroon ng selective justice sa pagkakasampa ng kaso laban sa mga pulitiko na umano’y nakinabang sa maanomalyang paggamit ng pork barrel fund.

Sa ngayon, ayon kay Aguirre, kailangan nila ang affidavit ni Janet Lim Napoles na gagamitin niyang batayan sa pagbuo ng DOJ panel.

Matatandaang sa kasagsagan ng imbestigasyon sa PDAF scam ay tatlong senador ang naipakulong ng Aquino Administration na kinabibilangan nina dating Senador Juan Ponce Enrile, Jinggoy Estrada at Bong Revilla, samantalang ilang kaso naman laban sa ilan pang mga mambabatas ang nakabinbin sa Ombudsman at sa Sandiganbayan.

By: Meann Tanbio /  Bert Mozo

Nanindigan si PNP Chief Director General Ronald Dela Rosa na personal ang motibo sa magkasunod na pagsabog sa Quiapo, Maynila noong Sabado

Kasunod ito ng pagtanggi ni Atty. Nasser Abinal na siya ang target ng naturang pagpapasabog.

Si Abinal, ang pinaghihinalaan ng pulisya na target ng bomba dahil sa kanya nakapangalan ang package na sumabog na ikinasawi ng dalawa katao.

Kaugnay nito, sinabi ni Dela Rosa na dapat pag-isipan ni Abinal kung bakit sa kanya naka-address ang ipinadalang package.

Idinagdag pa ni Dela Rosa na bagamat personal na away ang motibong nakikita nila ngayon, mas maigi pa ring tapusin muna ang imbestigasyon bago tuluyang masabi ang ugat ng pagsabog.

By: Meann Tanbio /  Jonathan Andal

Pinababaligtad ni U.S. Lance Corporal Joseph Scott Pemberton sa court Of Appeals ang desisyon nito na pabor sa kanyang conviction kaugnay ng pagpatay sa transgender na si Jeffrey “Jennifer” Laude noong October 2014.

Naghain ang kampo ni Pemberton ng motion for reconsideration sa C.A. sa pamamagitan ni Atty. Rowena Garcia-Flores noong 26 ng abril.

December 2014 nang mahatulan si Pemberton na makulong ng 6 hanggang 10 taon ng Olongapo City Regional Trial Court Branch 74.

Una nang iginiit ni Pemberton na self-defense ang nangyari nang sampalin siya ni Laude matapos niyang matuklasan na hindi ito babae.

Kasalukuyang nakakulong si Pemberton sa isang restricted facility sa Camp Aguinaldo.

By: Meann Tanbio

Naka-i-insulto umano para sa maraming government employee at official na matagal ng nagsisilbi sa pamahalaan sa magiging sweldo ng bagong Presidential Communications Operations Office Assistant Secretary na si Mocha Uson.

Ayon kay Senador Kiko Pangilinan, nakapanliliit para sa mga government employee na may kritikal at mabigat na trabaho, kontraktwual o matagal na sa serbisyo pero mababa ang sahod ang mahigit isandaang libong piso (P100,000.00) na susuwelduhin ni Uson kada buwan bukod pa sa allowance at bonus.

Nakikiisa siya sa nararamdamang panliliit at pagka-insulto ng ilang empleyado ng pamahalaan.

Sinupalpal din ni Pangilinan ang pagbatikos at pangmamaliit ni Mocha sa mga media practioner sa bansa at ginamit pa ang programa sa isang radio station kung saan matinding inalipusta si Vice President Leni Robredo na isang pambabastos.

Ipinaalala naman ng senador na ang public office ay isang public service na nangangailangan ng competent at integridad na public official.

By Drew Nacino |With Report from Cely Bueno