Napakagandang development para kay TUCP o Trade Union Congress of the Philippines vice president Roland Dela Cruz, ang pagkakapasa sa house committee on labor and employment, ng panukalang four-day work week.
Sinabi ni Dela Cruz na malaki ang pangangailangan para rito, lalo na at kadalasang nauubos ang oras ng mga manggagawa sa pag ko–commute papunta sa kani–kanilang opisina.
Makatutulong din aniya ito, para mabawasan ang araw ng pagliban ng mga manggagawa na inilalaan sa pakikipag transaksyon sa mga ahensya ng pamahalaan.
“Nauubos ‘yung travel time nila, ‘yung oras nila para sa kanilang sarili at pamilya, so if you put the four-day work week, hahaba ‘yung oras ng trabaho but they have more days to spend with their family kasi kailangan din ng work-life balance, hindi naman tayo slave na wala na tayong buhay, trabaho na lang tayo nang trabaho.”
Aminado naman si Dela Cruz na maaring maapektuhan ng panukalang batas ang suweldo ng mga “Arawang” manggagawa.
“Maaapektuhan talaga ‘yan, mayroon tayong tinatawag na hourly paid, daily paid at monthly paid employees. Kung sa hourly paid, tatatas ‘yun pero ‘yung opportunity nila for extra income thru overtime, mawawala. Ang apektado talaga rito ay ‘yung ating mga hourly paid at daily paid employees.”
By Katrina Valle
Tatalikuran na ni Princess Mako ng Japan ang kanyang royal status para pakasalan ang isang commoner.
Ang dalawampu’t limang panganay na apo ni Emperor Akihito ay engaged na sa law firm worker na si Kei Komuro.
Nagkakilala ang dalawa noong 2012 kung saan ay kapwa pa sila nag-aaral sa international university sa Tokyo.
Nang tanungin ng media, tumanggi munang magsalita si Princess Mako at sinabing magbibigay siya ng pahayag sa tamang oras.
By Ralph Obina
Muling tiniyak ng Grab Philippines ang suporta nila sa pagpapatupad ng anti-distracted driving law.
Sa katunayan, sinabi ni Leo Gonzales, public affairs manager ng Grab Philippines na pagkapasa pa lamang ng batas noong nakaraang taon ay naabisuhan na nila ang lahat ng drivers ng Grab.
Tinukoy ni Gonzales ang pagbabawal sa anumang makakapukaw sa atensyon ng driver habang nagmamaneho.
“Number one, dapat clear ang ating windshield walang obstruction to the line of sight, number two, ang mga devices ay hindi rin dapat ilagay sa baba na kailangan pang yumuko ang driver. It has to be placed very near sa line of sight na hindi na igagalaw ang ulo at lumihis pa ang mata sa kalye. Sinabi rin namin na kung gagamit ng Waze app kung maghahanap ng ruta ay dapat itabi muna ‘yung sasakyan.”
Aminado si Gonzales na marami ang maninibago sa pagsunod sa anti-distracted driving law subalit maganda anya ito para sa kapakanan at kaligtasan ng lahat mula sa aksidente sa kalsada.
“For sure, maninibago ‘yung mga drivers like any motorist would do dahil mayroon nang batas na kailangan nilang i-comply. Pero ganun talaga, per something as critical as protecting human life, sapat na po iyan.”
By Len Aguirre
Unti-unti ng pinanghihinaan ng loob o bumababa ang morale ng mga miyembro ng Abu Sayyaf.
Ito, ayon kay AFP Public Affairs Office Chief, Col. Edgard Arevalo, ay batay sa mga nakalap nilang impormasyon mula sa mga sumusukong bandido.
Ang mga sumusuko anyang A.S.G. member ang nagbibigay din ng impormasyon sa militar hinggil sa lokasyon at komposisyon ng mga aktibong bandido sa Basilan, Sulu at Tawi-Tawi.
Unti-unti na anyang nauubos ang pera, supply ng pagkain at armas ng grupo dahil sa kabiguan na magsagawa ng kidnapping activities.
Bukod pa ito sa matinding opensiba ng militar simula noong Enero na ikinasawi na ng mahigit 80 bandido kaya’t napilitan ang tinatayang 50 bandido na sumuko na lamang.
By: Drew Nacino
Tinatayang 401,000 Filipino o point 40 percent ng populasyon ng Pilipinas noong 2015 ang namumuhay bilang alipin sa makabagong panahon.
Ito’y batay sa 2016 global slavery index ng global organization na walk free foundation sa gitna ng inilabas ng American magazine na Atlantic na online story ng yumaong U.S-based Filipino Journalist na si Alex Tizon.
Kaugnay ito sa kasambahay ni Tizon na nagsilbing alipin ng kanilang pamilya sa loob ng 56 na taon.
Ayon sa Walk Free Foundation, nasa 33rd rank na ang Pilipinas kumpara sa 19th place noong 2014 mula sa 167 bansa na may pinaka-malaking populasyon ng mga inaalipin sa pamamagitan ng forced labor, commercial sexual exploitation, child soldiery o pa-aling fishing.
Tinatayang 10 milyong Filipino na nagtutungo sa ibayong dagat ang para mag-trabaho ay nagiging biktima ng human trafficking, commercial sexual exploitation at forced labor sa Asya, Europe, North America at Middle East.
By: Drew Nacino
Simula bukas, Mayo 19, huhulihin na ng Land Transportation Office at iba pang law enforcement agencies ang mga motorcycle rider na nag-aangkas ng mga bata nang hindi sumusunod sa regulasyon.
Alinsunod ito sa Republic Act Number 10666 o mas kilala bilang “Children’s Safety on Motorcycles Act of 2015”
Sa ilalim ng R.A. 10666, bawal nang sumakay sa mga motorsiklo ang mga bata na 18 taong gulang pababa, lalo’t kung hindi abot ng kanilang mga paa ang foot peg ng motorsiklo.
Hindi na rin sila papayagang umangkas sa anumang uri ng two-wheeled motorcycle units kundi pa nila kayang humawak sa bewang ng nagmamaneho.
Exempted naman dito ang mga motorcycle rider na may angkas na bata na nangangailangan emergency medical attention.
Ang R.A. 10666 ay pinirmahan ni dating Pangulong Noynoy Aquino noong July 21, 2015.
By: Meann Tanbio
Inaprubahan ng National Food Authority council ang pag-aangkat ng bigas sa pamamagitan ng G2P o Government to Private Scheme para magkaroon ng imbak na bigas ang ahensya sa pagsapit ng lean months mula Hulyo hanggang Setyembre.
Ayon kay Secretary to the Cabinet at NFA Council Chairman Leoncio Evasco, sa ilalim ng G2P scheme, papayagan ang mga private supplier mula sa ibang bansa na lumahok sa bidding process
Kaugnay nito, sinabi sa DWIZ ni NFA Spokesperson Marietta Ablaza na magpupulong ngayong araw ang NFSC o National Food Security Committee hinggil dito.
Ayon kay Ablaza, dito malalaman kung ilan ang kinakailangang volume o dami ng aangkating bigas.
By: Meann Tanbio / BNSP
Plano ng Pilipinas at China na pumasok sa isang kasunduan kung saan papayagan ang exchange of prisoners o prisoner swap.
Ayon kay Philippine Ambassador to China Jose Santiago Sta. Romana, sakaling malagdaan ang naturang agreement, aabot sa 200 Pilipino na nakakulong ngayon sa China dahil sa kasong drug trafficking ang maaaring magsilbi ng kanilang sentensya dito sa Pilipinas.
Bilang kapalit, ang mga nakakulong naman na Chinese nationals sa Pilipinas ay papayagang makapagsilbi ng sentensya sa kanilang bansa.
Ang panukalang Prisoner Swap Pact ay kabilang sa mga napag-usapan nina Pangulong Rodrigo Duterte at Chinese President Xi Jinping sa kanilang bilateral talks noong Lunes.
By: Meann Tanbio
Sisimulan na sa mga susunod na araw ang tv program ni Pangulong Rodrigo Duterte sa government TV station.
Sa teaser na ipinalabas ng Presidential Communications Office, magiging co-host ng Pangulo sa programang “Mula sa Masa Para sa Masa” ang batikang TV journalist na si Rocky Ignacio.
Ayon kay Presidential Communications Office Secretary Martin Andanar, layunin ng nasabing programa na iparating sa publiko ang mga proyekto at adhikain ng pamahalaan mula mismo kay Pangulong Durterte.
Gayunman, sinabi ni Andanar na wala pang eksaktong petsa kung kalian sasahimpapawid ang nabanggit na TV program ni Pangulong Duterte.
By: Meann Tanbio / Aileen Taliping