June 2026

Tila napuno na si Philippine National Police o PNP Chief Director General Ronald Dela Rosa na pagsabihan ang mga pulis na nasasangkot sa illegal drugs.

Sa halip na pangaralan o pakiusapan, hinikayat ni Dela Rosa ang mga pasaway na pulis na manlaban na lang o makipagbarilan sa mga aaresto sa kanilang otoridad.

Nagpakita rin ng pagkabagot si Dela Rosa sa anya’y mabagal na proseso para mapanagot ang mga tiwaling pulis.

Kapag kinasuhan aniya ay nakukuha rin ng mga ito na makapagpiyansa dahil suportado ng  druglord, at kapag nakalabas ay tuloy na naman sa iligal na gawin

Ayon kay Dela Rosa, mas makakabuti kung idaan na lamang sa mas mabilis na paraan ang pagpapanagot sa mga pulis at ito ay sa pamamagitan ng pakikipag duwelo sa mga ito.

By Len Aguirre

May dalawang (2) bilyonaryo na ang senado ng Pilipinas.

Kung dati rati’y si Senador Cynthia Villar lamang ang bilyonaryo sa senado, ngayon ay sinamahan na siya ni Senador Manny Pacquiao.

Batay sa isinumiteng SALN o Statement of Assets Liabilities and Net Worth ng mga senador para sa taxable year 2016, nasa 3.6 billion ang kabuuang yaman ni Villar samantalang mahigit tatlong (3) bilyon ang kay Pacquiao.

Si Senador Antonio Trillanes naman ang pinakamahirap base sa idineklara nyang 6.5 million net worth at sumusunod sa kanya si Senador Francis Escudero na may kabuuang yaman na 6.6 million pesos halos kapantay ng kay Senador Leila De Lima.

Pangatlo sa pinakamayamang senador si Ralph Recto na may kabuuang yaman na mahigit sa 522 million pesos; Sonny Angara, mahigit sa 123 million pesos; Juan Miguel Zubiri, mahigit 121 million pesos; Sherwin Gatchalian, mahigit 92 million pesos; Grace Poe, mahigit sa 88 million pesos; Franklin Drilon, mahigit 80 million pesos; Jayvee Ejercito, mahigit 79 million pesos; Richard Gordon, mahigit 66 million pesos; Tito Sotto, mahigit 63 million pesos; Nancy Binay, mahigit sa 60 million pesos.

Mas mababa naman sa 50 million pesos ang net worth nina Senador Loren Legarda na may mahigit 49 million pesos; Panfilo Lacson, 38 million pesos; Bam Aquino, mahigit sa 33 million pesos; Allan Peter Cayetano, mahigit sa 24 million pesos; Joel Villanueva, mahigit sa 21 million pesos; Senate President Koko Pimentel, mahigit sa 17 million pesos; Risa Hontiveros, mahigit sa 16 million pesos at Kiko Pangilinan, mahigit sa 21 million pesos.

By Len Aguirre | With Report from Cely Bueno

Tiniyak ng Bureau of Jail Management and Penoloy (BJMP) na walang ibinibigay na VIP treatment kay Janet Lim-Napoles sa Camp Bagong Diwa kung saan siya inilipat mula sa Correctional for Women Institution.

Ayon kay Senior Inspector Xavier Solda, spokesman ng BJMP, nasa loob naman ng kampo ng pulisya ang kulungan ni Napoles kaya’t sapat naman ang nakukuha nitong seguridad.

Kumbinsido rin si Solda na hindi na maiilang si Napoles dahil halos isang taon rin naman syang namalagi sa Camp Bagong Diwa bago ito naipadala sa Correctional for Women.

Una rito, si Napoles ay inilipat sa Camp Bagong Diwa matapos itong ipawalang sala ng Court of Appeals (CA) sa kasong serious illegal detention.

Tatlong (3) kaso pa ng plunder ang kinakaharap nito sa Sandiganbayan kaya’t kailangan nyang manatili sa kustodiya ng pulisya.

“Wala na po talaga kaming espasyo sa lahat ng facilities namin, so, she will be colligated with fellow inmates niya and of course there will be adjustments sa security. Yung mga makakasama niya most likely doon halos kakilala niya na rin kasi yun din naman ang mga nakasama niya during her detention sa amin”, bahagi ng pahayag ni Senior Inspector Xavier Solda, spokesman ng BJMP sa panayam ng DWIZ.

By Len Aguirre | Ratsada Balita Program (Interview)

Umaabot na sa 550 percent ang congestion rate sa lahat ng bilangguan sa ibat ibang panig ng bansa.

Ayon kay Senior Inspector Xavier Solda, spokesman ng BJMP o Bureau of Jail Management and Penology, nangangahulugan ito na ang espasyo para sa isang tao ay inookupahan ng anim na preso.

Pahayag ito ni Solda matapos ihayag ng PNP-NCRPO na may dalawampu’t anim na preso na  sa Metro Manila ang nasawi mula lamang nung nakaraang taon dahil sa siksikan sa bilangguan.

Gayunman, sinabi ni Solda na inaaksyunan na ng pamahalaan ang problema sa siksikang mga bilangguan sa bansa.

Sa katunayan, mahigit isa at kalahating bilyong piso anya ang ibinigay na pondo ng Pangulong Rodrigo Duterte para ipagpatayo ng karagdagang pasilidad para sa mga preso.

By Len Aguirre