June 2026

Dinalaw ng tinaguriang Magnificent 7 ng House of Representatives si Senador Leila De Lima sa Philippine National Police o PNP Custodial Center sa Kampo Crame, Quezon City.

Kinabibilangan ito  nina Representatives Edcel Lagman, Gary Alejano at  Edgar Erice.

Muling binigyang diin anila ng senadora ang pagnanais nitong makadalo at makaboto sa ilang deliberasyon sa mataas na kapulungan ng kongreso.

Iginiit ng Magnificent 7 na kung pinapayagan ng Korte ang ilang nakapiit sa custodial center na dumalo sa mga birthday party at iba pang okasyon, dapat ding payagan si De Lima na makadalo sa ilang sesyon na bahagi ng kanyang tungkulin bilang mambabatas.

By Drew Nacino | With Report from Jonathan Andal

Dead on the spot ang hinihinalang tulak ng iligal na droga at kapangalan ng isang senador matapos makipagbarilan sa mga pulis na aaresto sa kanya sa Caloocan City.

Kinilala ang suspek na Si Joel Villanueva, alyas Itok, na nanlaban matapos makatunog na mga pulis ang kanyang ka-transaksyon sa isang buy-bust operation sa Barangay 18, pasado alas-2:00 kaninang madaling araw.

Si Villanueva na sumuko sa ilalim ng Oplan Tokhang ay pinatalsik sa trabaho bilang barangay tanod dahil sa paggamit ng shabu at nakulong noon sa kasong murder.

Batay sa imbestigasyon, nagpaputok si Itok gamit ang calibre 45 pistol dahilan upang gumanti ang mga miyembro ng Drug Enforcement Unit kung saan tinamaan sa ulo ang suspek.

Narekober mula kay Villanueva ang pitong (7) sachet ng shabu, drug paraphernalia at ang ginamit nitong baril.

 By Drew Nacino

Nakararanas pa rin ng panggigipit at pananakot mula sa mga security guard ng La Panday Farm and Foods Corporation ang mga magsasakang pinagkalooban ng lupa sa Tagum City, Davao del Norte.

Ayon kay Antonio Tuyak, tagapagsalita ng Madaum Agrarian Reform Beneficiaries Incorporated o MARBAI, gabi-gabi silang pinaliligiran ng mga armadong guwardya.

Binakuran ng mga MARBAI farmer ang isandaan apatnapung limang  (145) ektaryang  farm sa Barangay San Isidro matapos ang kanilang matagumpay na pagpasok  sa naturang lugar sa tulong ng binuong task force ng Department of Agrarian Reform (DAR).

Nanindigan naman ang may-ari ng La Panday na iligal ang pag-okupa ng mga magsasaka sa nasabing lupain dahil may kasunduan na umano sila sa Agrarian Reform Group na Hearbco-1.

Gayunman, itinanggi ng Hearbco ang pahayag ng pamunuan ng La Panday farms sa pagsasabing ginagamit lamang sila ng kumpanya upang idepensa ang pagpapakalat ng mga armadong grupo sa naturang lugar.

By Drew Nacino | With Report from Aya Yupangco

Sinupalpal ng grupong Pinagkaisang Samahan ng mga Tsuper at Operator Nationwide o PISTON ang kautusang nagbabawal sa mga sign board at rosaryo sa mga windshield ng mga sasakyan.

Ayon kay PISTON President George San Mateo, wala namang masama kung ipagbawal ang anumang nakasasagabal sa tinatawag na “line of sight” ng drayber.

Gayunman, “over-reacting” na anya kung ipagbabawal ang mga rosaryo at signage sa windshield ng mga public utility vehicle tulad ng jeep.

Iginiit ni San Mateo na lalong mahihirapan ang mga pasahero kung hindi nila makikita ang signage na nagsasabi ng ruta ng mga PUV na kanilang sasakyan.

Una ng inihayag ng Land Transportation Franchising and Regulatory Board o LTFRB na lilimitahan nila ang bilang ng mga signage sa mga PUV bilang bahagi ng Anti-Distracted Driving Law.

By Drew Nacino