June 2026

Hinamon ni Albay Representative Edcel Lagman si Pangulong Rodrigo Duterte na manindigan kontra China.

Ayon kay Lagman, hindi katanggap-tanggap ang pahayag ng Pangulo na helpless siya matapos magbanta si Chinese President Xi Jinping na makikipag giyera sa Pilipinas kapag nagpumilit ito sa soberenya ng bansa sa West Philippine Sea.

Hindi aniya mangangahas ang Chinese leader na basta na lamang manggiyera dahil sa international sanctions at counter-military actions na matatanggap nito mula sa mga kaalyado ng Pilipinas.

Naniniwala si Lagman na ang pangakong tulong sa bansa ng China ang dahilan kung bakit pinalagpas lamang ng Pangulo ang nasabing banta, gayong mayroon ng pasya ang arbitral tribunal sa naturang usapin.

By: Meann Tanbio

Pinagtibay ng Court of Appeals ang pagsibak kay dating PNP Chief Director General Alan Purisima kaugnay ng umano’y anomalya sa kontrata sa courier service para sa delivery ng mga lisensya sa mga may-ari ng baril.

Sa inilabas na desisyon ng C.A. 16th division, ibinasura ang petisyon ni Purisima dahil sa kawalan ng merito.

Si Purisima ay dumulog sa C.A. matapos siyang hatulan ng Ombudsman na guilty at ang iba pang opisyal ng PNP nuong Hunyo 2015 dahil sa grave abuse of authority, grave misconduct at serious dishonesty.

Bukod sa pagkakasibak sa serbisyo, binawi rin ng Ombudsman ang kanilang retirement benefit at bawal na ring pumasok muli sa gobyerno.

Nag-ugat ang kaso sa pagkaka-award ng PNP ng kontrata sa Werfast Documentary Agency Incorporated para mag-deliver ng mga lisensya ng baril nang hindi dumadaan sa public bidding.

By: Meann Tanbio / Bert Mozo

Tumulak na si Pangulong Rodrigo Duterte sa Russia para sa  limang  araw  na  official visit.

Sa kanyang departure  speech kahapon, binigyang  diin  ng  Pangulo ang   halaga  ng  kanyang  misyon   na  bahagi ng  mas  pagpapaigting ng  relasyon sa Russia  at  pagsulong  ng  ekonomiya.

Ayon sa Pangulo, hindi maaaring isantabi ang  Russia  dahil maraming  oportunidad na maaaring  mapakinabangan ng  Pilipinas.

Pakingan: Bahagi ng pahayag ni Pres. Duterte

Ibinida rin ng Pangulo  ang  inaasahang  pagpupulong  nila  ni Russian President  Vladimir Putin at Russian Prime  Minister  Dimitri Medvedev.

Pakingan: Bahagi ng pahayag ni Pres. Duterte

Kasabay nito, nagparunggit ang Presidente  sa isang bansa na hindi direktang pinangalalan na matagal na naging  kaalyado  ng  Pilipinas, subalit  walang pagbabagong naranasan ang bansa  kaya’t  sa  pagkakataong  ito ay  ibabaling  ang  atensiyon  sa  mga  bansang  handa at totohanang  tutulong  sa  pag-angat  ng kabuhayan ng  mga  Pilipino.

Pakingan: Bahagi ng pahayag ni Pres. Duterte

By: Meann Tanbio / Aileen Taliping

Nilinaw ng Manila City government na hindi nila aarmasan ang mga traffic enforcer ng lungsod.

Ayon kay Manila Traffic and Parking Bureau Chief Dennis Alcoreza, malaking responsibilidad ang kaakibat ng pagbibitbit ng baril lalo’t dapat ay mentally at emotionally fit ang isang indibidwal bago maging kwalipikadong mag-armas.

Hindi anya malayong magkaroon ng mas malaking problema sa mga kalsada kung tutugunan ang hirit na armasan ang mga traffic enforcer sa Maynila.

Bukod pa ito sa gastos sa pagsasanay ng mga traffic enforcer sa paghawak ng baril.

By Drew Nacino | With Report from Aya Yupangco

Isusumite na ng Philippine National Police – Internal Affairs Service (PNP-IAS) kay PNP Chief, Diector General Ronald Dela Rosa ang kanilang rekomendasyon sa kasong administratibo ni Supt. Maria Christina Nobleza, labinlimang (15) araw mula ngayon.

Ito ang inihayag ni PNP Inspector-General, Atty. Alfegar Triambulo matapos ma-expire ang sampung (10) araw na palugit na ibinigay ng IAS kay Nobleza para magsumite ng kanyang depensa sa kaso.

Ayon kay Triambulo, ibabatay ni Dela Rosa ang hatol nito kay Nobleza mula sa ibibigay nilang rekomendasyon.

Grave misconduct o conduct unbecoming of an officer ang kinahaharap na kaso ni Nobleza na naaresto sa Bohol noong Abril kasama ang boyfriend nitong Abu-Sayyaf member na si Reenor Lou Dungon.

Magugunitang inamin ng babaeng police official na si Nobleza na tinangka nilang tulungan ang isang nagtatagong bandido sa Bohol.

By Drew Nacino | With Report from Jonathan Andal

Inatasan na ni Justice Secretary Vitaliano Aguirre ang isang grupo ng National Bureau of Investigation o NBI na magtungo sa Caloocan City upang mangalap ng mga ebidensya matapos ang pananambang kay Caloocan Assistant City Prosecutor Diosdado Azarcon.

Inaalam na rin ng DOJ o Department of Justice kung may mga kontrobersyal na kasong hinahakawan ni Azarcon na posibleng naging ugat ng pamamaslang dito.

Kinondena naman ng kagawaran ang panibagong insidente ng pagpatay sa mga government prosecutor.

Batay sa imbestigasyon, malapitang binaril ng mga lalaking naka-motorsiklo ang biktima sa ulo at balikat paglabas nito ng bahay sa kanto ng 9th Avenue at Galauran Street, sa Barangay 63, Grace Park West, alas-8:00 ng umaga ng Lunes.

By Drew Nacino | With Report from Bert Mozo