June 2026

Nangako si bagong MMDA o Metro Manila Development Authority Chairman Danilo Lim na lilinisin niya ang ahensya sa ilalim ng kaniyang pamumuno.

Unang gagawin ni Lim ang pag-iimbentaryo sa mga kagamitan, tauhan, kontrata gayundin ang mga transaksyon ng MMDA.

Tiniyak din ni Lim na hindi siya magpapakulo para sa publicity lalo’t pangunahin niyang misyon ay buwagin ang kurapsyon sa nasabing ahensya.

Sisikapin din ni Lim na makapagpatupad ng mga polisiya na makatutulong sa pagresolba sa matinding trapiko sa kalakhang Maynila.

By: Jaymark Dagala

Pagkakataon na ng Pilipinas na mapakinabangan ang tulong na ibibigay ng malalaking mga bansa tulad ng China at Russia.

Ito ang paniniwala ng mga eksperto at analyst kasabay ng pagpunta ni Pangulong Rodrigo Duterte sa Russia para sa kaniyang limang araw na pagbisita ruon.

Ayon kay Philippine-Russian Business Assembly President Marietta Limlingan, malaking tulong sa ekonomiya ng Pilipinas ang pagbubukas ng pintuan nito sa Russia para sa kalakalan.

Inaasahang lalagda rin ang Pangulo sa isang letter of intent sa Russia para sa pagbili ng mga modernong kagamitan ng militar tulad ng ginawa ni Defense Secretary Delfin Lorenzana sa China nuong isang linggo.

By: Jaymark Dagala

Nahaharap ngayon si dating San Juan City Vice Mayor Francis Zamora ng reklamong vote buying at undue influence sa Commission on Elections, kaugnay ng isinusulong na recall petition laban kay incumbent Mayor Guia Gomez.

Dumulog sa tanggapan ng Comelec law department ang dalawang residente ng San Juan na sina Lucila Robles at Veradel Surmieda para ireklamo si Zamora ng paglabag sa Section 261 ng Omnibus Election Code.

Ayon sa dalawang complainant, idinaan sa educational assistance ang pamimili ng boto kung saan pinalitaw ng kampo ni Zamora na ang dokumento na kanilang nilagdaan ay para sa 4P’s o Pantawid Pamilyang Pilipino Program ng pamahalaan.

Kalakip din sa isinumite ng mga complainant ang photocopy ng tatlong piraso ng P1,000 na natanggap umano nila mula kay Zamora.

Kapalit umano ng natanggap nilang P2,000 hanggang P3,000 ang pagpirma nila sa petition for recall.

Matatandaang noong nakaraang linggo, naghain ang mga tagasuporta ni Zamora ng recall petition sa COMELEC sa hangad na mapalitan si Gomez sa pwesto na inaakusahan nila ng katiwalian, incompetence at abuse of power.

By: Meann Tanbio / Aya Yupangco

Malamig ang tugon ng ilang Senador sa panawagan ni Senadora Leila de Lima na Statement of Support kaugnay ng kanyang hangarin na mapagbigyan siyang makadalo sa sesyon at sa botohan ng ilang mga  mahahalagang panukalang  batas.

Inamin ni Senate President Aquilino “koko” Pimentel na wala pa siyang tugon sa liham ni De Lima na humihingi ng Statement of Support, pero pinayuhan niya aniya ito na magsumite ng mosyon sa Korte.

Sinabi naman ni Senate Majority  Floorleader Tito Sotto na minsan na silang nagbalak noon na magpasa ng resolusyon na nananawagan sa Korte na payagan si dating Minority Floorleader Juan Ponce Enrile  na makadalo sa mga sesyon ng Senado, pero hindi sila pinayagan.

Maging si Senador Richard Gordon ay walang nakikitang pangangailangan para magpahayag  ang Senado ng suporta kay De Lima.

Ayon kay Drilon, magbibigay ito ng maling signal at iisiping binibigyan ng special treatment sa Senadora.

By: Meann Tanbio / Cely Bueno

Pirmado na ni Pangulong Rodrigo Duterte ang appointment paper ni dating Scout Ranger Commander Brig. Gen. Danilo Lim bilang bagong chairman ng MMDA.

Nilagdaan ng Pangulo ang appointment papers ni Lim bago siya umalis patungong Russia kahapon.

Si Lim ay dating Deputy Commissioner for Intelligence ng Bureau of Customs mula September 2011 hanggang July 2013.

Tumakbo rin siyang Senador noong 2010 national elections sa ilalim ng Liberal Party, subalit  natalo.

Samantala, mananatili naman si Tim Orbos bilang General Manager ng MMDA.

By: Meann Tanbio