June 2026

Isasara ang ilang bahagi ng edsa para sa mga delegado ng Asia Pacific Economic Cooperation Summit, simula November 17 hanggang 20.

Ayon kay Cabinet Secretary Jose Rene Almendras, na nangangasiwa sa Edsa Technical Working Group para sa APEC meeting, isasara ang kalsada mula Shaw Boulevard, Mandaluyong hanggang SM Mall of Asia, Pasay City.

Posible anyang tumagal ng hanggang 30 minuto ang full closure o sa kada oras na darating ang isang delegado lalo’t hindi naman masasabi ang eksaktong schedule ng dating ng mga ito.

Tinatayang 36,000 sasakyan ang maaaring maapektuhan ng road closures kaya’t umaapela sila sa mga bibiyahe na huwag ng dumaan sa EDSA kung wala namang importanteng pupuntahan.

Suspendido ang trabaho sa government sektor at klase sa lahat ng antas sa Metro Manila sa November 17 hanggang 20 habang sa private sector ay walang pasok simula November 18 hanggang 19.

Samantala, asahan na ring isasara ang mga kalsada sa paligid ng airport sa Nobyembre 17.

Kaugnay nito, magsasanib-puwersa ang 20 ahensya ng pamahalaan kabilang na ang ilang local government ang kasama sa inter-agency management team na titiyak na magiging maayos at payapa ang gaganaping APEC Summit sa bansa ngayong buwan.

Ipinabatid ni PNP Spokesman Chief Supt. Wilben Mayor na kasama ang kanilang hanay sa mga naatasan sa seguridad ng mga delegado at sa mga lugar na paggaganapan ng nasabing summit.

Binigyang-diin ni Mayor na hindi biro ang halos ay 10,000 mga delegado na dadagsa sa bansa mula November 16 hanggang sa matapos ang pulong sa November 20.

Iba-iba rin aniya ang security requirements para sa 21 state leaders na mangunguna sa APEC Summit.

By  Drew Nacino  | Meann Tanbio 

Nagbabala ang department of health hinggil sa paggamit ng antibiotics ng walang reseta ng doktor.

Ayon sa DOH, kapag nag-self medicate o basta-basta uminom ng antibiotic ay posibleng hindi na tatalab sa susunod na pagkakataon ang iba pang gamot dahil magiging “drug resistant” na ang mikrobyo sa katawan.

Kailangan umanong magpakonsulta at magpareseta muna sa doktor bago bumili ng antibiotics sa lisensyadong botika. Nakasaad din na kailangan ay kumpletuhin ang iniresetang gamutan kahit bumuti na ang pakiramdam sa mga unang araw ng pag-inom ng antibiotics.

Hindi rin kailangang manghiram ng reseta para lang makabili ng antibiotics.

Ang antibiotics ay mga gamot na tumutulong labanan ang ating mga impeksyon. Ang maling paggamit nito ay maaaring magdulot ng masamang epekto. Wala nang tatalab na gamot kapag tayo ay nagkasakit at magiging “drug resistant” na ang mikrobyo.

By: Mariboy Ysibido

Inihayag ng kampo ni Senadora Grace Poe na mabibigo na silang magbigay ng sample ng kaniyang DNA ngayong araw.

Kasabay ito ng deadline na ibinigay ng Senate Electoral Tribunal na dumirinig sa disqualification case laban sa kaniya na inihain ng presidential candidate na si Rizalito David.

Tumungo sa tanggapan ng SET ang abogado ni Poe na si Atty. George Garcia kung saan, isinumite nito ang manifestation gayundin ang dokumentong nagsasabing hindi nag-match ang DNA samples ng senadora sa mga hinihinala niyang kamag-anakan.

Dahil dito, inihayag din ni Garcia na handa na ang senadora sa kung anuman ang magiging kahihinatnan ng kaso kaya’t payag na rin silang umusad ito.

By  Jaymark Dagala | Jill Resontoc (Patrol 7)

Ikinakasa na ng tambalan nila Senadora Miriam Defensor Santiago at Bongbong Marcos ang kanilang 12 senatorial slate.

Sa panig ni Senador Bongbong Marcos, ilan sa mga nais niyang isama sa nasabing slate ay ang pinsang si Leyte Rep. Ferdinand Martin Romualdez, Rep. Manny Pacquiao at Manila Vice Mayor Isko Moreno.

Sa inisyal na pahayag naman ni Senadora Santiago, sinabi ni Marcos na nais nitong mapabilang sa kanilang listahan ang OFW advocate na si Susan Toots Ople.

Sinabi pa ng Senador na batay sa orihinal na plano, sinabi ni Marcos na tig-anim silang kandidato ni Santiago sa pagkasenador ngunit napagkasunduan nila na pag-isahin na lamang ang mga ito.

By Jaymark Dagala | Cely Bueno (Patrol 19) 

Tiniyak ng Malakaniyang na hindi magiging sagabal ang APEC meeting sa operasyon ng mga tanggapan sa kahabaan ng Roxas Blvd.

Ito’y sa kabila ng pagpapasara sa nasabing kalsada kasabay ng gagawing pagpupulong ng iba’t ibang heads of state na gagawin sa PICC.

Ayon kay Deputy Presidential Spokesperson Abegail Valte, may mga naitalaga nang alternatibong ruta na maaaring daanan ng mga motorista sa kasagsagan ng aktibidad.

Nasubukan na aniya ang mga ito nang bumisita sa bansa si Pope Francis noong Enero ng taong kasalukuyan.

By Jaymark Dagala | Aileen Taliping (Patrol 23) 

Nagbabala ang Philippine Health Insurance Corporation o PhilHealth sa mga tobacco companies.

Ito’y sa sandaling hindi magsitalima ang mga ito sa batas na nagtatakda ng paglalagay ng graphic warning o mga larawang nagpapakita ng mga peligrong dulot ng paninigarilyo sa mga pakete nito.

Ayon kay PhilHealth President Atty. Alex Padilla, mahaharap sa kasong administratibo o kriminal ang mga nasabing kumpaniyang hindi susunod sa nasabing batas.

Bukod sa kaso, pagmumultahin din ang mga tobacco companies at posibleng matanggalan pa ng lisensya ang mga ito.

Ngunit aminado si Padilla na mahihirapan sila pagdating sa mga nagbebenta ng tingi-tinging sigarilyo partikular na iyong mga tinatawag na tagatak boys.

May hanggang Nobyembre ng susunod na taon ang mga nagtitinda ng tobacco products para tumalima sa nasabing batas.

By  Jaymark Dagala | Jonathan Andal 

Nababahala ang samahan ng mga recruitment agency sa lumalalang problema sa laglag bala sa NAIA.

Ayon kay Amanda Araneta, isa sa mga opisyal ng Now or Never Movement, maingat silang magpaalis ngayon ng mga OFW dahil may mga aplikante silang mga skilled worker na biktima na rin ng laglag bala.

Inamin din ni Araneta na may ilang mga OFW silang pinapaalis na sadyang nagdadala ng bala sa paniniwalang pangontra umano ito sa kulam o black magic.

Kaya naman mahigpit nilang binibilinan ang kanilang mga papaalis na aplikante hinggil sa nangyayaring hulihan sa paliparan kaya’t sila na mismo ang naghihigpit sa kanilang binubulatlat ang mga ito para makasiguro na walang dalang bala ang mga ito.

By  Jaymark Dagala | Aya Yupangco (Patrol 5)