June 2026

Isa (1) patay habang 3 ang sugatan sa nangyaring aksidente sa southbound lane ng Roxas Boulevard sa Pasay City.

Tila niyuping lata ang isang kulay gray na AUV nang sumalpok ito sa isang nakahintong 16-wheeler truck sa nasabing lugar.

Tumagal ng ilang minuto bago tuluyang naialis ang naipit na driver ng AUV na kinilalang si Russel Umbrog na kalaunay hindi na inabutang buhay sa San Juan de Dios Hospital.

Sugatan naman ang 1 babae at 2 lalaki na sakay ng AUV at agad din namang isinugod sa pagamutan.

Sinasabing walang early warning device ang nasabing truck na nasiraan umano sa gitna ng kalsada.

By  Jaymark Dagala  

Bulilyaso o hindi na matutuloy ang proyekto ng Department of Science and Technology o DOST na paglalagay ng libreng wifi sa mga lalawigan.

Ito’y ayon kay Roy Espiritu, Tagapagsalita ng Information and Communications Technology Office ng DOST ay dahil sa walang interesadong investor sa nasabing proyekto.

Dalawang beses na aniyang bumagsak ang bidding para rito na layunin sanang lagyan ng libreng wifi internet connection ang mahigit 800 bayan sa buong bansa

Target sanang matapos ngayong taon ng DOST ang nasabing proyekto ngunit dahil sa hindi na ito matutuloy, kailangan nilang itakda sa susunod na taon ang target para matapos ito.

By  Jaymark Dagala  

Muling nanindigan si Manila International Airport Authority (MIAA) General Manager Angel Honrado na walang sindikatong nag-ooperate sa loob ng Ninoy Aquino International Airport (NAIA).

Ito ay sa kabila ng sunud- sunod na reklamo ng mga pasahero ukol sa tanim bala modus sa NAIA.

Binigyang diin ni Honrado na wala namang ebidensyang magpapatunay na mayroon ngang sindikato sa loob ng paliparan.

Gayunman, inamin ni Honrado na posibleng mayroong oportunista sa NAIA ngunit hindi na ito nagbigay pa ng karagdagang detalye ukol dito.

By  Ralph Obina 

Tatlong (3) taxi ang inararo ng isang bus sa southbound lane ng EDSA malapit sa MRT North Avenue station kaninang madaling araw.

Wasak ang likurang bahagi ng binanggang taxi at sa lakas ng pagkakasalpok, nadamay rito ang dalawa pang taxi na nasa unahan nito.

Ayon sa driver ng isa sa mga nakaparadang taxi, papahinto siya sa MRT station para kumuha ng pasahero.

Sinasabing nawalan umano ng kontrol ang tsuper ng bus kaya nito binangga ang nakaparadang taxi.

Agad tumakas ang bus driver at kundoktor ng commuter bus sa takot na mabugbog ng taumbayan kaya’t iniwang nakahambalang ang sasakyan sa EDSA.

By Jaymark Dagala  

Mahigpit nang ipinagbabawal ng Simbahang Katolika sa Pilipinas ang paglikha at pagbebenta ng mga imahe ng santo mula sa ivory o kahalintulad na bahagi ng katawan ng hayop.

Sa isang kalatas, sinabi ni Catholic Bishops’ Conference of the Philippines o CBCP President Archbishop Soc Villegas, hindi dapat bigyang dahilan ng simbahan ang mga pumapatay ng mga hayop para gawing imahe ng mga santo o banal ang parte ng kanilang mga katawan.

Dahil dito, hinimok ng arzobispo ang mga obispo na magpalabas ng direktiba sa mga pari na huwag basbasan o tumanggap ng mga imahe na yari sa ivory o mga kahalintulad.

Binigyang diin ni Villegas na tulad ng mga tao, nilikha rin ng Diyos ang mg hayop upang maging katuwang nito sa pangangalaga sa kalikasan kaya’t anuman ang rangya o ganda ng hitsura ng mga imaheng mula sa parte ng kanilang katawan ay imoral at hindi katanggap-tanggap.

Magugunitang umaani ng batikos ang simbahan dahil sa nauubos na populasyon ng ilang hayop tulad ng elepante kung saan, ginagamit ang mga husk nito para gawing imahe ng santo.

By Jaymark Dagala 

Sentido kumon lamang ang dapat gamitin ng gobyerno sa pagpapatupad ng batas na nagbabawal sa pagdadala ng baril o bala sa mga paliparan.

Ito ang binigyang diin sa DWIZ ni OFW Advocate Susan Toots Ople bilang tugon sa naging pahayag ni Transportation Secretary Jun Abaya na kailangang baguhin ang batas na nagtatakda sa pagdadala ng armas at bala sa mga paliparan.

Binigyang diin sa DWIZ ni Ople, bagama’t may batas na umiiral, kailangan pa ring tingnan kung ang batas na ipatutupad ay makabubuti o lalong makapagpapahamak sa mga mamamayan ng bansa.

“Pag alam mo na mali yung ipinapatupad mong batas at may mga inosenteng masasaktan ipapatupad mo ba yun? Kung public service ang habol mo, eh public cruelty ang mangyayari kapag ginawa nila yun.” Ani Ople.

Nanay Gloria

Samantala, nanawagan si Susan Toots Ople sa pamahalaan ang i-urong na ang kaso laban sa OFW na si Gloria Ortinez.

Si Ortinez ang 56 na taong gulang na Overseas Filipino Worker (OFW) na hindi pinayagang makabalik sa kaniyang trabaho sa Hong Kong makaraang mahulihan ng bala sa kaniyang bagahe sa NAIA.

Ayon kay Ople, malinaw naman na inosente si Nanay Gloria dahil na rin sa ipinakitang ebidensya ng PNP Aviation Security Group.

“Yung bala na ipinapakita na evidence ng PNP at Aviation Security Group ay iba sa bala na sabi nila ay nandun sa bag ni Nanay Gloria, so dun pa lang ang laki ng discrepancy, yun nga ang panawagan namin iurong na ang kaso, gobyerno lang naman ang magdedesiyon niyan, DOJ naman.” Dagdag ni Ople.

Giit pa ni Ople, masyado nang nasisira ang buhay at kabuhayan ng mga tulad ni Nanay Gloria na nabibiktima ng maling sistema at pamumuno sa mga paliparan.

“Paano mo naman sasabihin na politically motivated eh kita mo may psychological effect na nga yung nangyayari, tulad ni Nanay Gloria hanggang ngayon nandito pa rin siya sa Pilipinas, di makabalik sa kanyang employer sa Hong Kong, at wala pang resulta itong preliminary investigation.” Paliwanag ni Ople.

By Jaymark Dagala | Karambola