June 2026

Nagkaroon ng kaunting adjustments sa inilatag na seguridad ng APEC Security Task Force matapos ang serye ng pag-atake ng grupong ISIS sa Paris, France.

Ayon kay PNP Chief Director General Ricardo Marquez, dinagdagan ng alerto ang mga lugar na dinadagsa ng mga namamasyal na turista tulad ng Bonifacio Global City sa Taguig City, Rockwell sa Makati City at Ermita sa lunsod ng Maynila.

Ipinabatid ni Marquez na maging ang Armed Forces of the Philippines o AFP ay nagdeploy na rin ng mga tauhan na makakasama ng mga pulis sa pagpapatrolya sa buong Metro Manila.

Tawagin na aniya ng ilan na overkill, pero hindi lang kasi member economies at iba pang mga delegado ng APEC ang kanilang binabantayan kundi pati na ang kaligtasan publiko o buong Pilipinas laban sa tangkang terorismo.

By  Meann Tanbio | Jonathan Andal 

Inimbitahan ni Chilean President Michelle Bachelet si Pangulong Benigno Aquino III na bumisita sa kanilang bansa.‬

Ipinarating ni Bachelet ang kanyang paanyaya sa inialay sa kanyang state luncheon ng Presidente sa Rizal hall ng Malacañang.

Sa kanyang toast, sinabi ni Bachelet na bagamat pinaghihiwalay ang Pilipinas at Chile ng Pacific Ocean, pinag-iisa ang 2 bansa ng karanasan nito bilang parehong nasa tinatawag na “Ring of Fire”.

Dahil dito, mahalaga aniya ang pakikipag-ugnayan at kooperasyon ng dalawang bansa sa panahon ng kalamidad na isa pangunahing layunin ng kanyang pagbisita sa Pilipinas.‬‬

Una rito, naging mainit ang pagtanggap ni Pangulong Noynoy Aquino sa bumibisitang presidente ng Chile na si Michelle Bachelet kaugnay sa dalawang araw na state visit nito sa bansa.

Binigyan ng arrival honors si President Bachelet na sinundan ng expanded bilateral meeting nila ng Pangulo.

Sa joint press statement ng Pangulo ng Pilipinas at ng Chilean President, kapwa tiniyak ng mga ito ang mas malalim pang ugnayan ng Pilipinas at Chile at pagpapalawak sa kalakalan.

Samantala, isang Memorandum of Understanding on Disaster Risk Reduction and Management ang nilagdaan para patatagin ang kooperasyon ng dalawang bansa para sa mga paghahanda kapag may dumarating na sakuna o kalamidad.

Isa pang kasunduan ang nilagdaan sa pagitan ng gobyerno ng Pilipinas at Chile para sa joint study for free trade agreement para mapaigting pa ang palitan ng kalakal sa nabanggit na bansa.

Si Bachelet ang siyang kauna-unahang babaeng pangulo ng Chile at kauna-unahan din sa kasaysayan ng bansa na nahalal sa dalawang magkasunod na termino.

By  Meann Tanbio | Aileen Taliping (Patrol 23)  

Karagdagang 133 flights ang kinansela ng PAL o Philippine Airlines ngayong APEC Summit.

Ayon kay Cielo Villaluna, tagapagsalita ng PAL, kabilang sa dagdag na 133 cancelled flights ang 112 domestic flights at 21 international flights.

Sinabi ni Villaluna na nakatanggap sila ng abiso mula sa Civil Aviation Authority of the Philippines o CAAP na sundin ang “no fly zone” kung saan ipagbabawal ang commercial aviation sa 40 nautical mile radius mula sa Philippine International Convention Center o PICC mula November 18 at 19.

Magbabalik aniya sa normal ang kanilang operasyon sa sbado Nobyembre 21.

By  Meann Tanbio  

Tuluyan nang isinara ng Korte Suprema ang kasong inihain ni dating Cadet Aldrin Jeff Cudia laban sa Philippine Military Academy o PMA.

Ito’y matapos pinal nang ibasura ng kataas-taasang hukuman ang ikatlong motion for reconsideration na inihain ni Cudia na humihiling na ilabas ang kanyang academic records na kinabibilangan ng diploma, certificate of good moral character, honorable dismissal at certificate of discharge.

Binigyang-bigat ng Supreme Court ang honor code sa PMA na may kapangyarihan na gumawa ng paglilitis sa mga administrative cases nang hindi na isinasailalim sa judicial proceedings.

Sinabi rin ng Korte Suprema na sa simula pa lamang bago pumasok sa PMA ay alam na ni Cudia ang kahalagahan ng honor code at ang paglabag dito ay mangangahulugan ng pagsipa sa kanya sa nasabing institusyon.

By  Meann Tanbio | Bert Mozo (Patrol 3)    

Tuloy ang implementasyon ng number coding ngayong linggo.

Ito ayon sa Metropolitan Manila Development Authority (MMDA) ay kahit pa deklaradong holiday ang linggong ito dahil sa pagdaraos ng APEC Summit.

Sa gitna na rin ito nang pagdating ng world leaders na dadalo sa nasabing pulong.

By  Judith Larino 

Niyanig ng magnitude 4.4 na lindol ang ilang bahagi ng Ilocos Norte kagabi.

Ayon sa Philippine Institute of Volcanology and Seismology (PHIVOLCS), natukoy ang sentro ng lindol sa 9 na kilometro hilagang kanluran ng Pagudpud, may lalim na 25 kilometro at tectonic in origin.

Ang nasabing pagyanig ay naramdaman sa intensity 3 sa sa bayan ng Pasuquin at Laoag City at Intensity 2 naman sa Sarrat.

Intensity 4 naman ang naramdamang pagyanig sa kalapit na lugar ng Claveria, Cagayan at Intensity 2 sa Sinait, Ilocos Sur.

By  Judith Larino