June 2026

Nagsimula nang magdatingan ang iba’t ibang heads of state kasama ang mga delegado nito na dadalo sa Asia Pacific Economic Cooperation o APEC Summit.

Unang dumating sa Ninoy Aquino International Airport o NAIA si Vietnam President Truong Tan Sang na sinundan naman ni US President Barack Obama.

Sinundan naman ang mga ito nila South Korean President Park Geun Hye, Australian Prime Minister Malcolm Tumbull, Hong Kong Chief Executive Leung Chun Ying, Chinese President Xi Jinping, Mexican President Enrique Penia Nieto at Malaysian Prime Minister Najib Razak.

Sinalubong ang mga nabanggit na heads of state ng mga nakatoka sa kanilang miyembro ng gabinte gayundin ng kaniya-kaniyang embahador na nakatalaga sa Pilipinas at sa mga nasabing bansa.

Inaasahan naman darating ngayong hapon sila bagong Canadian Prime Minister Justin Trudeau, New Zealand Prime Minister John Key, Japanese Prime Minister Shinzo Abe, Thailand Prime Minister Prayuth Chan-Ocha at Hassanal Bolkia ng Brunei Darussalam.

Inaasahan din ang pagdating nila Indonesian Vice President Jusuf Kalla at Russian Prime Minister Demetry Medvedev bilang kinatawan nila Indonesian President Joko Widodo at Russian President Vladimir Putin na kapwa nagpahayag ng hindi pagdalo sa nasabing pagtitipon.

By Jaymark Dagala | Raoul Esperas (Patrol 45)      

Kasunod ng pagdating ni US President Barack Obama, nasa Pilipinas din ang US guided missile destroyer na USS Fitzgerald.

Dumaong sa bahagi ng Manila Bay ang USS Fitzgerald matapos ang routine check nito sa South China Sea.

Layon ng nasabing US Warship na bantayan ang pananatili ni US President Barack Obama sa kaniyang pagdalo sa Asia Pacific Economic Cooperation o APEC Summit.

Limang araw mananatili ang US guided missile destroyer sa bansa bago ito bumalik sa bansang Japan kung saan nakabase ang US 7th fleet.

By  Jaymark Dagala  

Napigilan ng mga kagawad ng Philippine National Police o PNP ang mga militante na nagtangkang pumasok sa bisinidad ng US Embassy sa Roxas Boulevard sa Maynila kaninang umaga.

Sa Padre Faura pa lamang sa pagitan ng Roxas Boulevard at M.H. Del Pilar ay nakaharang na ang mga pulis laban sa mahigit 50 miyembro ng Anakbayan, League of Filipino Students, at Alay Sining.

Ayon kay Col. Albert Barot, hepe ng Manila Police District o MPD Station 5, bawal sa naturang lugar ang mga raliyista kaya’t agad nilang itinaboy ang mga ito.

By Jelbert Perdez | Aya Yupangco (Patrol 5) 

Naging emosyonal at napaiyak si Senator Grace Poe sa harap ng mga tao sa Laguna nang tanungin hinggil sa disqualification case na kinakaharap niya sa Senate Electoral Tribunal o SET.

Gumaralgal ang boses at tumulo ang luha ng Senadora nang kuwestiyunin ang umano’y kakayahan niyang maglingkod matapos manalo sa pagka-senadora noong 2013 elections.

Sinasabing ngayong araw na ito ay magdedesisyon na ang tribunal sa naturang kaso na inihain ng isang Rizalito David.

By  Jelbert Perdez | Cely Bueno (Patrol 19)  

Kinilala ni Pangulong Benigno Aquino III ang kahalagahan ng pribadong sektor para sa pag-unlad ng ekonomiya ng isang bansa.

Sa kanyang talumpati sa APEC Small and Medium Enterprises Summit, binigyang pugay ng Pangulo ang malaking papel ng maliliit at katamtamang mga negosyo sa pag-unlad ng isang bansa.

Dito aniya sa Pilipinas halos 99 na porsyento ng mga negosyo ay mga micro, small and medium enterprises at halos 64 na porsyento ng trabaho ay nagmula sa mga ito.

Tiniyak ng Pangulo na patuloy ang pagsisikap ng pamahalaan na matulungan ang mga maliliit na negosyo sa bansa.

Sa pamamagitan aniya ito ng mas malalim na partisipasyon ng mga MSME’s sa mga APEC member countries.

By  Len Aguirre  

Boluntaryong nagpasalang sa DNA test ang 3 katao mula sa Iloilo bilang tulong kay Senador Grace Poe.

Ayon kay Atty. George Garcia, abogado ni Poe, umaasa pa rin sila na sa pamamagitan ng DNA ay matutunton nila ang tunay na pamilya ni Poe at mapapatunayan ang pagiging natural born Filipino ng senador.

Ang pahayag ni Garcia ay kasunod ng pasya ng SET o Senate Electoral Tribunal na pagbotohan na ang disqualification case laban kay Poe na inihain ni Rizalito David, isa ring presidentiable.

By  Len Aguirre  

Ang pangulo ng Vietnam ang unang dumating na lider para dumalo sa APEC Summit ngayong araw na ito.

Dakong alas-8:30 nang lumapag sa Ninoy Aquino International Airport (NAIA) ang eroplano ni Vietnam President Truong Tan Sang.

Bago ang leaders meeting bukas, November 18 ay magkakaroon muna ng bilateral meeting ang Pangulong Noynoy Aquino at Truong.

Nakatakda ring lumagda sa isang strategic partnership agreement ang dalawang lider para palakasin ang kooperasyon ng magkakapitbahay na bansa sa Asya sa iba’t ibang larangan kabilang na ang defense at maritime security.

By  Len Aguirre