June 2026

Inihirit ni Attorney Gigi Reyes sa Sandiganbayan na atasan ang prosekusyon na magsumite ng listahan ng mga testigo nito bago o sa katapusan ng buwang kasalukuyan.

Sa isang mosyon, hiniling ni Reyes sa Anti-Graft Court na kailangan nila ng kopya ng sequential list ng Office of the Special Prosecutor o OSP upang mapaghandaan nila ang tuloy-tuloy na paglilitis sa kaso.

Sinasabing tatalakayin na ng Sandiganbayan ang naturang mosyon sa Lunes, Nobyembre 23.

Sa January 13, 2016 ay sisimulan na ng korte ang marathon hearing laban kay kina Reyes, Janet Lim-Napoles, Ronald John Lim at John Raymund de Asis kaugnay pa rin ng pork barrel scam.

By  Jelbert Perdez 

Sasabayan bukas ng Pangulong Benigno Aquino ang pag-alis ng iba pang leaders na dumalo sa APEC Summit dito sa Pilipinas.

Dadalo naman ang Pangulong Aquino sa ASEAN Summit sa Kuala Lumpur Malaysia na nagsimula noong November 18 at magtatapos sa a-bente dos ng buwang ito.

Maliban sa Pilipinas, miyembro rin ng ASEAN o Association of Southeast Asian Nations ang Brunei Darussalam, Cambodia, Indonesia, Laos, Malaysia, Myanmar, Singapore, Thailand at Vietnam samantalang observer status naman ang Papua New Guinea.

Samantala, kabilang sa mga dumalo sa APEC Summit na bukas pa nakatakdang umalis ay sina Papua New Guinea Prime Minister Peter O’Neill, Korean President Park Geun-Hye, President Ma Ying Jeou ng Chinese Taipei, Prime Minister John Key ng New Zealand, Prime Minister John Key ng New Zealand, Japanese Prime Minister Shinzo Abe at Canadian Prime Minister Justin Trudeau.

By  Len Aguirre 

Hindi umano naibibigay ng pamunuan ng Philippine National Police o PNP ang mga pangangailangan ng mga pulis na itinalagang magbantay sa APEC Summit.

Natuklasan ng DWIZ Patrol na sinasabing hindi sapat ang supply na nakukuha nila sa kanilang pagkakatalaga sa APEC security task force sa Mall of Asia o MOA.

Una nang nangako ang PNP na sisikapin nitong maibibigay sa tinatayang 3,0000 pulis ang kanilang mga pagkain, personal hygeine, at iba pang mga pangangailangan.

Gayunman, iginiit ng dalawang PO1 o police officers 1 na ayaw magpabanggit ng pangalan na kahapon ay almusal lamang ang kanilang natanggap habang limitado naman ang mineral water na ibinibigay umano sa kanila.

Nabasa rin umano sila nang umulan kahapon dahil tanghali na naibigay sa ang kanilang mga kapote.

By  Jelbert Perdez | Allan Francisco  

Ituring na lang umano ng mga naaabalang motorista ang kanilang pagkakaipit sa trapik bilang kontribusyon sa APEC Summit.

Ito ang pahayag ng Philippine National Police o PNP kasabay na rin ng muli nitong paghingi ng paumanhin sa mga napeperwisyo dahil sa mga hakbanging panseguridad na ipinatutupad ng mga otoridad.

Ayon kay PNP Spokesman Chief Supt. Wilben Mayor, sadyang bahagi ng security plan ang traffic rerouting at lockdown protocol sa iba’t ibang panig ng kalakhang Maynila.

Muli naman itong nanawagan sa publiko na kung walang importanteng lakad ay mas makabubuting manatili na lamang sa tahanan o umiwas sa mga lugar kung saan may mga APEC activity.

By  Jelbert Perdez | Jonathan Andal  

Sa kabila ng kaliwa’t kanang batikos sa social media dahil sa delubyong idinulot ng APEC Summit, bumida pa rin ang good vibes ng maraming Pinoy.

Naging viral sa mga social media ang ilang tinaguriang good samaritan na nagmagandang loob na gamitin ang kanilang sariling sasakyan, maihatid lamang ang mga kababayang walang masakyan dahil sa mga isinarang kalsada.

Abot-abot din ang pasasalamat ng isang lalaki sa isang pulis na nagpasakay sa motorsiklo nito, mahabol lamang ang kaniyang domestic flight bago tuluyang ipatupad ang no-flyzone sa paliparan.

Ilang may-ari rin ng establisyemento ang nagkusang loob na mamudmod ng inuming tubig sa mga istranded at naglalakad na pasahero.

Bumida ang mga larawan sa iba’t ibang bansa at umani naman ito ng papuri sa mga banyaga.

By  Jaymark Dagala  

Nag-rally ang mga Overseas Filipino Workers na nakabase sa Hong Kong laban sa APEC Summit na ginaganap sa Pilipinas.

Dalawampung (20) OFW’s ang nagtipon sa harap ng konsulado ng Pilipinas sa Hong Kong upang tuligsain ang APEC Summit na anila’y tigatulak ng pandaigdigang imperyalismo.

Ayon kay Dolores Balladares-Pelaez, Chairperson ng United Filipinos in Hong Kong, ang APEC ay isa sa mga dahilan kung bakit patuloy na inaabuso at ginagawang alipin ang mga OFW’s sa ibayong dagat.

Samantala, binatikos naman ng Migrante Sectoral Party ang paggastos ng P10 bilyong piso ng pamahalaan para sa APEC Summit.

Napakalaking diskriminasyon anila ito sa P10 milyong piso lamang na inilaan para sa overseas voting registration ng may 10 milyong overseas Filipino voters.

By  Len Aguirre   

Dismayado ang maraming grupo matapos na isnabin nina Pangulong Noynoy Aquino at Canadian Prime Minister Justin Trudeau ang isyu ng basura ng Canada na itinambak sa Pilipinas.

Ayon kay Von Hernandez, dating Executive Director ng Greenpeace Southeast Asia, pinakawalan nina Aquino at Trudeau ang pagkakataong ipakita sa mundo kung paano ang maging tunay na lider sa pamamagitan ng pagtama ng isang mali.

Sa panig ni Alan Tanjusay, Spokesman ng Trade Union Congress of the Philippines o TUCP, binatikos nito ang pag-iwas nina Aquino at Trudeau sa responsibilidad.

Tinatayang 103 container vans ng basura mula sa Canada ang pumasok sa bansa mula June 2013 hanggang 2014.

Lumalabas na ang pagpasok ng basura ng Canada sa Pilipinas ay nag-ugat rin sa mga naunang APEC Summit.

By  Len Aguirre