June 2026

Nakaalis na ng bansa si Malaysian Prime Minister Najib Razak na isa sa mga dumalo sa pagtatapos ng APEC Summit.

Tahimik at mabilis lamang ang naging pagdating ni Razak sa Ninoy Aquino International Airport Terminal 2 hanggang sa makasakay ito sa kaniyang eroplano.

Mahigpit din ang naging tagubilin ng APEC National Organizing Committee sa mga mamamahayag hinggil sa anumang panayam sa Malaysian Prime Minister.

Hindi na rin nagbigay pa ng anumang pahayag si Razak hinggil sa iba’t ibang usapin partikular na ang Malaysian national na pinugutan ng bandidong Abu Sayaf sa Jolo, Sulu.

By Jaymark Dagala | Raoul Esperas (Patrol 45) 

Inatasan ng Department of Education o DepEd ang lahat ng mga paaralan sa Metro Manila na magsagawa ng make up classes.

Ito’y para makahabol sa mga paksang aralin matapos ang apat na raw na suspensyon ng klase dahil sa APEC Summit.

Ayon kay DepEd Sec. Bro. Armin Luistro, bahala na ang mga school superintendents kung kailan nila itatakda ang mga make up classes.

Kinakailangan lamang aniyang makumpleto ang 201 araw ng klase na nakapaloob sa academic year 2015- 2016.

By Jaymark Dagala 

Asahan nang matatapos ang kalbaryo ng maraming mga taga-Metro Manila bukas, araw ng Biyernes.

Ito’y dahil sa inaasahang pag-alis ngayong araw ng mga heads of state at mga delegado na dumalo sa Asia Pacific Economic Cooperation o APEC Summit.

Ayon kay PNP Spokesman C/Supt. Wilben Mayor, tatanggalin na nila ang lockdown sa mga pangunahing kalsada bukas kapag nasiguro na nilang wala nang natira pang delegado ng APEC sa bansa.

Kaya naman sa huling pagkakataon, umapelang muli si Mayor sa mga taga-Metro Manila na makiisa at unawain ang ipinatutupad na security measures kasabay na rin ng paghingi nila ng paumanhin sa mga naperhuwisyo dahil sa matinding trapik.

By  Jaymark Dagala | Allan Francisco  

Kuntento ang karamihan sa mga foreign media na nag-cover sa ginawang Asia Pacific Economic Cooperation o APEC Summit dito sa Pilipinas.

Sa ginawang panayam ng DWIZ patrol sa mga foreign media mula Japan at Singapore, maayos at organisado ang inilagay na international media center.

Bagama’t may mga dala na silang mga gamit na may kinalaman sa komunikasyon, kuntento naman ang mga ito sa ibinigay sa kanilang internet connection kahit pa may pagkakataong bumabagal ito.

Ikinagulat naman ng iba pang foreign media ang higpit ng ipinatutupad na seguridad dahilan upang hindi sila makapag-ikot sa iba pang bahagi ng Kamaynilaan.

By  Jaymark Dagala | Cely Bueno (Patrol 19) 

Nagpasaklolo na ang Indonesia sa iba pang mga bansa sa Asya para lutasin ang kinahaharap nilang problema sa haze o ang makapal na usok dulot ng forest fire sa nasabing bansa.

Sa kaniyang pagdalo bilang kinatawan ni Indonesian President Joko Widodo sa APEC Summit, sinabi ni Vice President Yusuf Kallah, hiniling nito ang pakikiisa ng lahat ng bansa para mapanumbalik ang nasirang ekta-ektaryang kagubatan.

Sinabi ni Kallah, hindi kakayanin ng kanilang bansang mag-isa sa pagresolba sa problema lalo’t umiiral ang EL Niño phenomenon o matinding tagtuyot.

Kasabay nito, personal na humingi ng paumanhin si Kallah sa mga bansang Malaysia at Singapore na matinding naapektuhan ng haze.

By Jaymark Dagala | Aileen Taliping (Patrol 23) 

Nangulelat ang Pilipinas sa listahan ng mga most livable APEC cities batay sa isinagawang pag-aaral ng Price Water House Coopers.

Lumabas sa nasabing pag-aaral na may pamagat na Building Better Cities, nasa ika-22 puwesto ang Maynila habang nasa ika-26 na puwesto naman ang Cebu mula sa 28 APEC cities na kasama sa survey.

Kabilang sa mga ginawang batayan ng pag-aaral ay ang connectivity, environmental sustainability gayundin ang health and welfare.

Ayon kay Guillermo Luz, Co-Chairman ng National Competitiveness Council, malaki ang pagkukulang ng lokal na pamahalaan ng dalawang lungsod kaya’t nakuha nila ang mababang ranggo.

Samantala, nanguna naman sa nasabing listahan ang Toronto at Vancouver sa Canada gayundin ang Singapore bilang most livable APEC cities.

By Jaymark Dagala 

Binisita ni Japanese First Lady Akie Abe ang mga residente ng Payatas sa Quezon City.

Ito’y bilang bahagi ng sidelights ng Asia Pacific Economic Cooperation o APEC Summit.

Partikular na tinungo ng Japanese first lady ang Salt Payatas Foundation Philippines, isang Japanese NGO na nagbibigay edukasyon at kabuhayan lalo na sa mga babae mula pa noong 1995.

Nakipagpulong din si Abe sa mga babaeng benepisyaryo ng nasabing NGO gayundin sa mga kabataan sa nasabing komunidad.

Sinamahan ang Japanese first lady sa nasabing lugar ng kanilang embahador sa Pilipinas na si Kazuhide Ishikawa.

By  Jaymark Dagala  

Isiniwalat ni Pag-asa Island Mayor Eugenio Bito-onon Jr. na ilang araw ding nanatili malapit sa isla ang isang Chinese coast guard vessel.

Ayon kay Bito-onon, dumating ang barko ng China malapit sa kanyang nasasakupan noong Nobyembre 9 at nanatili ito hanggang noong Nobyembre 18.

Ang naturang insidente ay nangyari habang nagaganap ang APEC Summit na dinadaluhan ni Chinese President Xi Jinping at iba pang APEC leaders sa Maynila.

Nakabinbin pa rin sa United Nations Tribunal ang reklamo ng Pilipinas laban sa China kaugnay ng reclamation activities sa West Philippine Sea.

By  Jelbert Perdez      

Dalawang bilateral meetings pa ang dadaluhan ni Pangulong Noynoy Aquino sa pagtatapos ng APEC Summit ngayong araw.

Makikipagpulong ang Pangulo mamayang gabi kina New Zealand Prime Minister John Key at Japanese Prime Minister Shinzo Abe.

Naging mahigpit ang schedule ng Pangulo kahapon dahil sa sunud-sunod na bilateral meetings gayundin ang mga aktibidad sa APEC kaya’t mamayang gabi itinakda ang pulong sa dalawang lider.

Inaasahang tatalakayin ng 3 lider ang mga paraan sa pagpapaigting ng ugnayang panlabas gayundin sa pagpapalakas ng ugnayang pangkalakalan.

By  Jaymark Dagala | Aileen Taliping (Patrol 23)