June 2026

Itinaas na ang alert level one sa bulkang Kanlaon matapos itong magbuga ng abo kahapon.

Ang alert level one ayon sa Philippine Institute of Volcanology and Seismology (PHIVOLCS) ay nangangahulugang mayroong abnormal na kondisyon at pagliligalig ang bulkan.

Matatandaang kahapon ay umabot sa isa hanggang isa at kalahating kilometrong taas ang abong ibinuga ng bulkang Kanlaon habang narinig naman ang pagdagundong nito sa mga kalapit na barangay ng Mananawin at Sitio Upper Pantao sa Negros Oriental.

By  Ralph Obina

Sinimulan na ang oral arguments para talakayin ang merito ng kasong isinampa ng Pilipinas laban sa China sa Arbitral Tribunal of the Permanent Court of Arbitration sa The Hague Netherlands o PCA.

Ito na ang ikalawang round sa International Tribunal makaraang makakuha ng paborableng desisyon ang Pilipinas at maideklarang may hurisdiksyon sa kaso ang PCA.

Ayon sa Department of Foreign Affairs (DFA), ang oral arguments ay magtatagal hanggang sa katapusan ng Nobyembre.

Umaabot sa 48 ang delegasyon ng Pilipinas sa pagdinig sa pangunguna ni DFA Secretary Albert del Rosario, Solicitor General Florin Hilbay, Supreme Court Associate Justice Francis Jardeleza, Political Affairs Secretary Ronald Llamas, SC Associate Justice Antonio Carpio, Cong. Rodolfo Biazon at Deputy Executive Secretary Menardo Guevarra.

Una nang sinabi ng DFA na kumpiyansa sila sa lakas ng kanilang mga ebidensya at argumento laban sa China.

By Len Aguirre 

Mga pribadong armadong grupo pa rin ang itinuturing na pinakamalaking banta sa Pilipinas sa harap ng malaking banta ng terorismo sa ibang mga bansa.

Ayon kay Col. Restituto Padilla, laganap pa rin ang mga armas na nasa kamay ng mga grupong may iba’t ibang motibo lalo na sa Mindanao.

Gayunman, tiniyak ni Padilla na patuloy ang pagtutulungan nila ng PNP upang mabuwag ang mga armadong grupo lalo na ngayong malapit na ang eleksyon.

“Pag ang pinag-usapan natin ay terorismo yun po ay challenge na ating hinaharap at sinusubukan nating lutasin dahil laganap po ang pagkakalat ng armas lalo na sa isla ng Mindanao.” Pahayag ni Padilla.

ASG

Samantala, nananatiling malaking hamon para sa Armed Forces of the Philippines (AFP) ang pagsugpo sa Abu Sayyaf Group o ASG.

Ayon kay Col. Restituto Padilla, Spokesman ng AFP, bagamat tinatayang nasa 400 na lamang ang miyembro ng ASG, hirap silang matunton ang mga ito dahil humahalo sila sa mga komunidad.

Pinawi ni Padilla ang mga haka-haka na mga miyembro ng ISIS ang ASG.

“Yun po ang challenge kasi kung magkumpul-kumpol lang po sila at magsama-sama lang sa isang lugar naku napakadali pong lutasin ang problema na yan pero dahil nga po kalat-kalat sila at nasa iba’t ibang karatig lugar ng Jolo, pati Basilan at Tawi-Tawi’t Zamboanga yan po ang pinaka challenge.” Ani Padilla.

Kasabay nito, sinabi ni Padilla na patuloy ang ginagawa nilang paghahanap sa katawan ng Malaysian national na pinugutan ng ASG.

Kumbinsido aniya ang AFP na ang pagpugot sa dayuhang kidnap victim ay bunga ng hindi pagkakasundo sa negosasyon hinggil sa ransom money.

“Ang pakiwari po namin ay hindi nagkaayusan sa usapan, kasi mga 2 linggo bago nangyari yun meron pong naging settlement doon isang bihag na Malaysian din na babae at nai-release po ito na hindi namin alam dahil may direct negotiations po na nangyari doon sa mga humahawak sa biktima at doon sa mga nag-negotiate sa kanila at ang naging katulong at katuwang diyan ay ang ilang miyembro ng LGU na hindi nagbigay ng abiso.” Dagdag ni Padilla.

By  Len Aguirre | Balitang Todong Lakas  

Galit ang reaksyon ni Bayan Muna Partylist Congressman Neri Colmenares sa pahayag ni Pangulong Noynoy Aquino na papogi lamang ang mga nagsusulong ng panukalang ibaba ang sinisingil na buwis sa mga manggagawa.

Ayon kay Colmenares, dapat malaman ng Pangulo na ang isyu ng pagbaba sa income tax ng mga manggagawa ay isyu ng katarungan at hindi isyu ng pagkawala ng kita ng pamahalaan.

Batay aniya sa kanilang pag aaral, 1987 pa ay overtaxed na ng P1.4 trillion pesos ang mga manggagawa.

“1987 ang ating P500,000 na annual income, tinataxan nila yan ng 32 percent pero 2015 na ang P500,000 na annual income ganun pa rin ang tax, 32 percent pa din, eh bumaba na ang value ng pera, tumaas na ang presyo ng mga bilihin, kaya nagtanong ako dati sa Philippine Statistics Authority kung magkano yung P500,000 noong 87 at ang sagot 2.6 million pesos.” Ani Colmenares.

Binuweltahan rin ni Colmenares ang Pangulong Aquino sa hamon nito na puwedeng ipasa ang bawas sa buwis kung makakahanap ang kongreso ng item sa national budget na puwedeng tanggalin.

“Na-budget lang yan for 2016 para pangbayad sa mga income tax ng malalaking concessionaires, o bakit ang hindi yun ang tanggalin mo? O di yun na lang ang sagutin niya kaya na ay hindi ko puwedeng tanggalin yan kasi mas pinapaboran ko ang mayayamang concessionaires kesa ordinaryong tax payers o di tapos, kesa gagawa pa siya ng kuwento na eh gawa-gawa niya lang yan, papogi niya lang, he sidetrack the issue.” Pahayag ni Colmenares.

Congress

Kaugnay nito hinamon din ni Bayan Muna Congressman Neri Colmenares ang Kongreso na aprubahan na ang panukalang bawasan ng buwis ang mga manggagawang Pilipino.

Ayon kay Colmenares, dapat panindigan ng maraming mambabatas na hindi sila sunud-sunuran lamang sa idinidikta ng Pangulong Noynoy Aquino tulad ng mga kaalyado ng Palasyo na nagsusulong sa panukalang bawasan ang ibinabayad na buwis ng mga manggagawa.

“I really hope that the Congress should pass it especially since kami naman ang boboto diyan, ngayon kung gustong i-veto ng presidente eh di i-veto niya para klaro ang lahat, kesa sa ni hindi pa nga naka first base sa Congress hindi na namin aaprubahan dahil ayaw ng presidentena in the first place ang presidente ay hindi naman miyembro ng Kongreso.” Dagdag ni Colmenares.

Matatandaan na tinawag ng Pangulong Aquino na Papogi Bill ang panukalang tax cut.

By Len Aguirre | Ratsada Balita  

Nakatutok na ngayon ang Philippine National Police (PNP) sa paghahanda para sa 2016 elections.

Ito ay matapos ang matagumpay na paglalatag ng seguridad ng PNP sa nagdaang Asia Pacific Economic Cooperaton o APEC Summit noong nakaraang linggo.

Ayon kay PNP Chief Director General Ricardo Marquez, magsasagawa sila ng mga pagpupulong kasama ang mga opisyal ng Commission on Elections (COMELEC) para sa mga ilalargang paghahanda.

Pangunahing tututukan aniya ng PNP ang mga lugar na nasa areas of concern at mayroong mga private armed groups (PAG’s).

By  Ralph Obina