Umalma ang Malacañang sa bintang na manhid ang gobyerno sa isyu ng laglag-bala sa Ninoy Aquino International Airport o NAIA.
Kasunod naman ito ng batikos na inaabot ng pamahalaan sa tila paninisi ni Pangulong Aquino sa media na nag-sensationalize o nagpalaki umano sa nasabing isyu.
Ayon kay Presidential Communications Secretary Sonny Coloma, humirit pa ng konting panahon ang Department of Justice o DOJ para sa resulta ng imbestigasyon.
By Jelbert Perdez | Aileen Taliping (Patrol 23)
Nananawagan ng mabilis na repatriation process at pagpapauwi sa labi ng 13 Pinoy na nasawi sa isang car accident ang mga naulilang kaanak ng mga ito sa Pilipinas.
Ayon kay Robert Nicart, kapatid ng namatay na si Jonathan Nicart, isang linggo na buhat nang mangyari ang aksidente ay wala pa rin silang nakukuhang malinaw na abiso o updates mula sa Department of Foreign of Affairs o DFA.
Ang tanging naitugon lamang umano ng DFA nang kanilang alamin ang sitwasyon ay nakikipag-ugnayan pa rin ito sa ahensya ng biktima para sa repatriation process ng labi nito.
By Jelbert Perdez | Allan Francisco
Binuhat nina Cleveland Cavaliers Forwards Kevin Love at Lebron James ang kanilang koponan para maihatid sa panalo laban sa Orlando Magic sa score na 117-103.
Kumamada si Love ng 34 points habang si Lebron James naman ay nakasama na si Oscar Robertson bilang atleta sa NBA history na nangibabaw sa top 25 sa hanay ng scoring at assists.
Sa unang quarter ay nagpakita agad ng bangis ang Cleveland sa sarili nitong bakuran kung saan ibinaon ng 12 points ang Magic.
Humabol ang Orlando, subalit hindi nito napanatili ang momentum hanggang sa matapos ang laro.
Dahil sa panalo ng Cavs ay taglay na nito ang 11-3 na kartada na siyang pinakamalupit na eastern conference record ngayong taon.
By Jelbert Perdez
Tila mas magiging ‘interesting’ ang labanan sa presidential election sa susunod na taon.
Ito, ayon kay Senator Serge Osmeña, ay dahil sa deklarasyon ni Davao City Mayor Rodrigo Duterte na tatakbo na ito sa pagka-Pangulo.
Ayon kay Osmeña, head ng Senate Committe on Public Services, maaaring makaapekto sa mga political survey ang atras-abante na taktika ni Duterte.
Gayunman, sinabi sa DWIZ ni Osmeña magagamit pa rin umano ni Duterte ang kanyang kasikatan o popularity kung saan posibleng si Senator Grace Poe ang maapektuhan sa pagkakapasok niya sa presidential race.
“Sa past surveys kung kukuha siya ng boto kay Grace Poe, yung pagtanggal sa kanya lang sa last survey na nawala yung pangalan niya biglang tumaas si Grace Poe ng mga 12 percent, that was sizable jump.” Pahayag ni Osmeña.
By Jelbert Perdez | Karambola
Naalarma ang United Nations sa dami ng mga batang nakalantad sa panganib na dala ng climate change.
Ayon sa UNICEF, halos 530 milyong bata ang naninirahan sa mga bansang malimit tamaan ng malalakas na bagyo at malalaking pagbaha.
Maliban dito, may 160 milyong bata rin umano ang lumalaki sa mga bansang nakakaranas ng matinding tagtuyot tulad ng Africa.
Sa report ng Unless We Act Now, sinabi ni Nicholas Rees, policy specialist ng UNICEF na kamatayan, pagkasadlak sa kahirapan at sakit ang dala ng climate change sa halos pitondaang milyong kabataan sa ibat ibang panig ng mundo.
Ito anila ang dahilan kaya’t isang malaking aksyon laban sa climate change ang dapat na pagkasunduan ng may 135 mga world leaders sa climate change summit sa katapusan ng Nobyembre.
By Len Aguirre
Binigyang katwiran ng Malacañang ang paalalang iwasan muna ang mga matataong lugar sa harap ng posibleng banta ng terorismo.
Taliwas kasi ito naging pahayag ng Armed Forces of the Philippines o AFP na walang dapat ipag-alala dahil kontralado naman ng mga otoridad ang sitwasyon.
Ayon kay Presidential Communications Secretary Sonny Coloma, patuloy umano ang paggalaw ng mga threat elements sa bansa kaya’t hindi dapat maging kampante.
Aniya, tingnan na lamang ang nangyari sa Paris kung saan umatake ang mga terorista sa hindi inaasahang pagkakataon.
Giit ni Coloma, kahit walang namomonitor na banta sa kahit na alin mang grupo ay mahalaga pa rin na maging mapagmasid at maging vigilant ang lahat.
By Jelbert Perdez | Aileen Taliping (Patrol 23)
Marami pa ring mga kontrabando ang natuklasan ng mga kagawad ng Bureau of Corrections (BuCor) sa maximum security compound ng New Bilibid Prisons (NBP).
Kabilang sa mga nakumpiskang kontrabando improvised grenade, sharp objects at caliber 45 pistol, at mga bote ng whiskey na nakatago sa gutter.
Bahagi ito ng Oplan Galugad na ilang beses na ring isinagawa sa New Bilibid Prison upang wakasan na ang nakagawiang pagpapasok doon ng mga kontrabando.
By Len Aguirre
Magkakasubukan ang Alaska Aces at Star Hotshots sa PBA Philippine Cup mamayang alas-7:00 ng gabi sa Smart-Araneta Coliseum.
Magaganap ang salpukan ng Alaska at Star pagkatapos ng bakbakan ng NLEX Road Warriors at Meralco Bolts bandang alas-4:15 mamayang hapon.
Kung papalarin laban sa Hotshots ay makakapantay ng Aces ang San Miguel Beermen sa PBA standings na mayroong 5-1 na kartada.
Ang Alaska ay nanalo sa pinakahuli nitong laro kontra sa Globalport Batang Pier habang nalugmok naman ang Star sa dalawang magkasunod na laro.
Tatangkain naman ng Road Warriors na mailista ang ikalawa nitong panalo sa liga laban sa Bolts matapos nilang pataubin ang Talk ‘n Text noong Biyernes.
By Jelbert Perdez
Kaugnay nang ng tumitinding banta ng terorismo matapos ang mga pag-atake sa Paris, France, nagpalabas ngayon ang Estados Unidos ng worldwide travel alert bilang babala sa kanilang mga mamamayan.
Batay sa state department travel advisory, pinapayuhan nito ang kanilang mga mamamayan na maging alerto sa mga pampublikong lugar o transportasyon.
Pinayuhan din ang lahat ng mga Amerikano na iwasan ang mga matataong lugar lalo na ngayong nalalapit na holiday season.
Batay sa impormasyon ng US, nagpaplano pa ng serye ng pag-atake ang Islamic State of Iraq and Syria o ISIS, Boko Haram at iba pang teroristang grupo.
Matatandaang kabilang sa mga inatake nitong mga nakalipas na linggo ay ang Denmark, France, Mali, Nigeria at Turkey.
By Ralph Obina
Arestado ang 2 babaeng Thai nationals na galing ng Maynila dahil sa umano’y tangkang pagpupuslit ng mahigit 2 kilong cocaine sa Krabi Airport sa Thailand.
Sa ulat ng Bangkok Post, nakilala ang mga suspek na sina Siriwan Yodteerak, 32, at Aaew Wijit, 34, na kasalukuyang nakadetine sa Customs Department sa Bangkok.
Ayon kay Wichak Apiraknanchai, Head ng Customs investigative unit, umalis ng Maynila si Siriwan sakay ng Air Asia flight bago lumipat ng ibang eroplano sa Kuala Lumpur at dumating sa Krabi, alas-7:30 ng umaga noong Sabado.
Subalit, sinasabing dumating ang kanyang maleta sa hiwalay na flight sa kaparehong oras.
Matapos isailalim sa x-ray scan ay nakita sa isang secret compartment ng bagahe ang itim na plastic bag na naglalaman ng umano’y 2.6 kilograms na cocaine at tinatayang nagkakahalaga ng 10.4 million baht.
Agad na dinampot ng mga otoridad si Siriwan nang tangkaing kunin ang maleta at ito rin ang naging daan para madakip si Wijit sa isang hotel sa Krabi.
Inamin ni Siriwan na binayaran siya ng 60,000 baht ng umano’y boypren ni Wijit na isang African kapalit ng pag-smuggle ng droga mula sa Pilipinas patungong Thailand.
Tinutunton pa ng mga pulis ang posibleng kinaroroonan ng nobyo ng isa pang nahuling suspek.
MIAA
Samantala, pinabubusisi na umano ng Manila International Airport Authority o MIAA ang mga kuha sa CCTV ng araw na umalis ang dalawang Thailand nationals na sinasabing sumakay ng eroplano patungong Thailand mula sa Maynila.
Matatandaang nahuli sina Siriwan Yodteerak at Aaew Wijit ng Customs department bunsod ng pagkakasangkot sa tangkang pag-smuggle ng 2.6 kilos ng cocaine.
Ayon kay Terminal 3 Manager Octavio Lina, nakarating na sa kanila ang impormasyon hinggil sa pagkakaaresto ng mga naturang suspek kaya’t aalamin pa umano kung paano nakalusot ang mga ito sa paliparan.
By Jelbert Perdez | Raoul Esperas (Patrol 45)