Kontrolado na ang chemical leak mula sa isang factory sa Quezon City.
Tiniyak ito ni Quezon City Administrator Aldrin Cunia kaya’t asahan na ng mga residente na mawawala na ang masangsang na amoy.
Nilinaw din ni Cunia ang naunang report na nag drain lamang ng tubig at hindi kemikal sa Pasig River ang mga trabahador ng D and L Industries.
Ayon kay Cunia, tubig lamang ang ibinuhos para lumamig ang makina at wala itong halong kemikal.
By Judith Larino
Hawak na ng Philippine National Police (PNP) ang inisyal na listahan ng election hotspot para sa 2016 elections.
Ayon kay PNP Chief Director General Ricardo Marquez, patuloy ang kanilang trabaho sa inisyal na listahang binuo ng PNP Director for Intelligence dahil kada linggo aniya ay nagbabago ang sitwasyon.
Pero, hindi pa nito matukoy kung kailan nila mailalabas ang kumpletong listahan ng election hotspots sa bansa.
Dagdag pa ni Marquez, nakikipag-ugnayan na rin sila sa COMELEC ukol sa kanilang ilalatag na seguridad sa Halalan 2016.
Sa katunayan aniya, nakipagpulong na sa kanila si COMELEC Chairman Andy Bautista at iba pang opisyal nito kasama ang mga miyembro ng AFP.
By Meann Tanbio | Jonathan Andal
Umaasa ang Palasyo na magkaroon na ng hustisya ang mga biktima ng Maguindanao Massacre bago bumaba sa puwesto si Pangulong Noynoy Aquino sa June 30, 2016, ayon kay Presidential Spokesman Edwin Lacierda.
Ginunita kahapon ng National Press Club (NPC) sa pamamagitan ng isang kilos-protesta sa mendiola ang ika-6 na taon ng maguindanao massacre kung saan ay 32 na mediamen ang nasawi sa naturang insidente.
Ipinaalala ng NPC sa pamamagitan ng pangulo nitong si Joel Egco kay Pangulong Aquino ang pangako nitong makakamit ang hustisya ng mga biktima bago ito bumaba sa poder subalit ilang buwan na lamang ang nalalabi sa termino nito ay wala pang linaw ang kaso.
By: Mariboy Ysibido
Iginiit ngayon ng Armed Forces of the Philippines (AFP) na wala silang natatanggap na anumang banta ng paglulunsad ng terror attack sa bansa.
Ipinabatid ni AFP Spokesman Col. Restituto Padilla na wala silang natatanggap na report na mayroong presensya ng ISIS dito sa Pilipinas at wala rin silang makitang kongkretong ebidensya na mag-uugnay sa ISIS at Abu Sayyaf.
Kasabay nito, umapela si Padilla sa publiko na ituloy lamang ang pang-araw-araw na aktibidad.
Sa harap na rin ito ng nauna nang panawagan ng Malakanyang sa pamamagitan ni Presidential Spokesman Edwin Lacierda na nagsabing iwasan muna ng publiko na magpunta sa matataong lugar.
Paliwanag ni Padilla, kapag hindi lumabas ng bahay ang publiko at umiwas mamasyal sa mga lugar na gusto nilang puntahan ay umiiral na agad ang hangarin ng mga terorista na bulabugin ang pang-araw-araw nating pamumuhay.
By Meann Tanbio | Jonathan Andal
Kumpiyansa si Pangulong Benigno Aquino III na makahahabol ang kanilang pambato na si dating DILG Secretary Mar Roxas sa mga survey.
Ang pahayag ay ginawa ng Pangulong Aquino kasunod na rin ng pagdududa nito na mababa pa rin ang survey rating ni Roxas.
Ayon sa Pangulo, kung susumahin ang margin of error kumpara sa mga katunggali nitong presidentiables, lumalabas na sila ay statistically tie o tabla lamang.
Binangggit pa ng presidente na malayo pa naman ang halalan, sapat pa ang panahon para maipaliwanag ang temang “ituloy ang daang matuwid”.
By Meann Tanbio
Ikinukunsidera na ng Central Luzon Regional Police Office na sarado na ang kaso ng pagpatay kay Bulacan RTC Judge Wilfredo Nieves.
Ito’y matapos maaresto ang gunman na si Arnel Janoras na kinalauna’y napatay sa Malolos City matapos umanong manlaban sa police escort nito habang ibinabyahe para isailalim sa inquest proceding sa prosecutors’ office.
Ayon kay Central Luzon Regional Police Director, Chief Supt. Rudy Lacadin, dead on the spot si Janoras, 43 anyos at residente ng San Jose del Monte city dahil sa tama ng bala.
Naaresto ang suspek noong Sabado matapos salakayin ng special investigation task group “judge Nieves” ang kanyang hideout kung saan narekober ang baril na pinaniniwalaang ginamit sa pananambang at pagpatay sa hukom.
By: Mariboy Ysibido
Nagbabala ang Civil Aeronautics Board (CAB) sa mga airline companies kaugnay sa pagtataas ng pasahe bunga mga cancelled flight noong panahon ng APEC Summit.
Ayon sa CAB, hindi sapat na dahilan ang pagkalugi ng halos 1 bilyong halaga ng mga airline companies para magtaas ng pasahe.
Matatandaang umabot sa higit 1,000 biyahe ng eroplano ang nakansela na nagdulot naman ng 880 milyon ang nalugi sa Philippine Airlines, 40 million sa Airasia at 400 million pesos naman para sa Cebu Pacific.
By Rianne Briones
Gimik lamang para kay si Sen. Antonio Trillanes ang dahilan ni Davao City Mayor Rodrigo Duterte sa pagtakbo sa pagka-pangulo sa 2016.
Sa isang panayam, sinabi ni Trillanes na kumbinsido siyang umpisa pa lang ay may intensyon na si Duterte na kumandidato sa pagkapangulo.
Drama lang aniya ang pagkwestyon ni Duterte sa desisyon ng Senate Electoral Tribunal (SET) na nagsbaing natural born citizen Filipino si Sen. Grace Poe.
Ayon kay Trillanes, unfair umano sa taumbayan ang ginagamit ni Duterte na dahilan sa kanyang pagkandidato.
Plataporma at paglilingkod anya sa bayan ang dapat na batayan ng sinumang nagnanais maging lingkod-bayan.
Kailangan pang hintayin ng PDP-Laban kung papayag ang Commission on Elections (COMELEC) sa substitution.
Unang nakapaghain ng Certificate of Candidacy (coc) para sa pagkapangulo si Martin Diño na miyembro ng PDP-Laban. Sa pag-atras nito ng kandidatura, si duterte naman ang ipapasok ng partido para maging opisyal nitong kandidato sa pagkapangulo.
By: Mariboy Ysibido
Nagbabala ang Food and Drug Administration (FDA) sa naglipanang mga pekeng gamot sa merkado.
Kasunod ito ng pahayag ng FDA na nakakumpiska sila ng higit sa 6 na milyong halaga ng unregistered at pekeng gamot sa merkado ngayon taon.
Ayon kay DOH Undersecretary Kenneth Hartigan – Go, malinaw itong banta sa kalusugan ng mga Pilipino.
Aniya, mas lumala pa ang pagkalat ng pekeng gamot sa merkado ngayong taon kumpara noong 2014 kung saan nakakuha lamang ng 2.9 miyong halaga ng mga unregistered medicines.
Nagmula ang mga pekeng gamot sa China, Pakistan, India at mayroon ding ginagawa mismo dito sa ating bansa.
Karamihan sa mga nakumpiskang gamot ay mula sa Metro Manila, Cavite, Pampanga, Isabela, Cebu, Bohol, Leyte, Davao at Zamboanga.
By Rianne Briones
Sa #SiyasatExpress, paano pinipili ng di umano’y sindikato sa NAIA ang kanilang bibiktimahin?