Panalo si Serbian tennis superstar at World’s Number 1 Novak Djokovic sa ATP World Tour Finals.
Tinalo ni Djokovic si World’s Number 3 Swiss Tennis Superstar Roger Federer sa kanilang final game.
Si Djokovic ang itinuturing na kauna-unahang manlalaro na nakakuha ng titulo sa loob ng apat na taon sa 46 na taong kasaysayan ng torneo.
By Judith Larino
Tiniyak ng Department of Justice (DOJ) sa pamilya ng mga biktima ng Maguindanao massacre na hindi nila pinapabayaan ang kaso.
Ayon kay DOJ Undersecretary at Spokesperson Emmanuel Caparas, nakatutok ang DOJ prosecution team para mapanagot ang mga may sala sa naturang krimen.
Hindi aniya sila tumitigil sa pagsusulong at pag-usig sa mga respondents sa pangunguna ng mga Ampatuan.
Ang reaksyon ni Caparas ay kasunod na rin ng panawagan ng mga miyembro ng mamamahayag sa pangunguna ng National Press Club (NPC) na panagutin ang sinumang naging dahilan ng pagkabalam ng pag-usad ng kaso sa hukuman.
By Meann Tanbio | Bert Mozo (Patrol 3)
Rollback sa presyo ng produktong petrolyo ang sumalubong sa mga motorista ngayong Martes, Nobyembre 24.
Simula 12:01 ng madaling araw kanina, ipinatupad ng Petron ang bawas presyo na P0.75 sa kada litro ng gasolina, P0.50 sa kada litro ng diesel at P0.80 sa kada litro ng kerosene.
Nag-anunsyo na rin ang Caltex epektibo 12:01 din ng madaling araw kanina ang tapyas-presyo na P0.60 sa kada litro ng gasolina, P0.50 sa kada litro ng diesel at P0.75 sa kada litro ng kerosene.
Alas-6:00 naman kanina nagsimula ang rollback sa produktong petrolyo ng Shell.
May kaltas na P0.65 ang kada litro nito ng gasolina, P0.80 sa kada litro ng kerosene at P0.45 sa kada litro ng diesel.
Sa parehong oras din ipinatupad ng Phoenix Petroleum PH at Total PH ang P0.75 na bawas-presyo sa kada litro ng gasolina at P0.50 sa kada litro ng diesel.
By Mariboy Ysibido
Nag-alok na ng tulong ang Britain habang patuloy ang airstrike na isinasagawa ng France sa Syria.
Naghahanda na rin si France President Francois Hollande para hilingin sa iba pang world leaders na tumulong para labanan ang militant group.
Una rito, sinabi ni British Prime Minister David Cameron na handa silang magbigay ng air-to-air refueling services at naniniwala itong kailangan na rin ng Britanya na magsagawa ng military airstrikes kasama ang France.
Nag-umpisa ang pambobomba ng France sa Syria noong nakaraang linggo kasunod ng pag-atake ng mga rebeldeng grupo sa iba’t ibang lugar sa France na ikinamatay ng 130 katao.
By Mariboy Ysibido
Napakalayo at napakaliit lamang ang epekto ng ISIS sa Pilipinas.
Ganito inilarawan ni Col. Restituto Padilla, tagapagsalita ng Armed Forces of the Philippines (AFP) ang banta ng teroristang ISIS sa ating bansa.
Ayon kay Padilla hindi angkop sa mga values at prinsipyo na isinusulong ng ating mga kapatid na Muslim dito sa Pilipinas ang mga ipinaglalaban ng ISIS.
Aniya walang banta ng ISIS sa Pilipinas maliban sa mga private armed groups.
“Ang threat ay sa mga private armed groups na iba-ibang motibo sa paghahasik ng kaguluhan at ang pailan-ilan na nagsasarili, yan po ang tinitignan natin na napakalaking threat kapag ang pinag-usapan natin ay terorismo.” Pahayag ni Padilla.
By Mariboy Ysibido | Balitang Todong Lakas
Kinumpirma na nina Davao City Mayor Rodrigo Duterte at Senador Alan Peter Cayetano ang kanilang tandem sa 2016 elections.
Ito ang inihayag nina Duterte at Cayetano sa opening ng isang Japanese restaurant sa Greenhills, San Juan, kagabi.
Ayon sa alkalde, makikipag-usap siya sa kanilang political party na PDP Laban sa Huwebes upang pormal na ayusin ang kanyang kandidatura kasama ang senador.
Samantala, inaasahan na ni Cayetano na hindi magiging madali ang kampanya ngayong opisyal ng nagdeklara si Duterte ng presidential bid nito.
***
Kaugnay nito, handang harapin ni Davao City Mayor Rodrigo Duterte sa Supreme Court ang anumang hahadlang sa kanyang presidential bid sa 2016 elections.
Tiniyak ni Duterte na handa at desidido na siya sa kanyang pagsabak sa presidential race.
Sakali anyang may magtangka na kumuwestyon sa certificate of candidacy ni PDP-Laban member Martin Diño ay ipauubaya na niya ito sa Commission on Elections (COMELEC).
Sinasabing naghain ng COC si Diño na kinalauna’y umatras sa presidential bid upang magbigay daan kay Duterte na tatayong substitute ng PDP-Laban.
Iginiit ng alkalde na kung may magtangka ay handa naman siyang maghain ng motion for reconsideration bago dumulog sa SC.
Nanindigan naman si Duterte na wala ng rason upang umatras siya sa halalan.
By Drew Nacino
Diretsahang inihayag ni Pangulong Noynoy Aquino na pinalaki ng husto ng media ang isyu ng talaba o tanim laglag bala sa Ninoy Aquino International Airport o NAIA.
Inihayag ito ng Pangulong Aquino matapos mausisa kung ano na ang aksyon nito sa kontrobersyang idinulot ng laglag-bala.
Sinabi ng Pangulo na kung titingan ang datos, milya-milya ang layo ng 34 na milyong pasaherong dumadaan sa NAIA kada taon sa 12 pasaherong nahulihan ng bala.
Tahasan din nitong sinabi na may nakinabang sa pag-sensationalized sa laglag-bala kaya’t hinahanapan na ng pruweba.
By Meann Tanbio | Aileen Taliping (Patrol 23)
Target ng senado na tapusin ang budget deliberations sa Disyembre 8.
Kahapon ay isa-isang isinalang sa deliberasyon sa muling pagbubukas ng sesyon ang budget ng Office of the President, Office of the Vice-President, ARMM, Department of Transportation and Communications, Department of Justice at Department of Environment and Natural Resources.
Isinalang din ang budget para sa DPWH, Department of Agrarian Reform, Department of Health, Department of Foreign Affairs, Commission on Audit at DSWD.
Kaugnay nito, sinabi ni Senate President Franklin Drilon na target nilang mailusot ang panukalang budget ng nasabing mga ahensya sa November 26, samantalang sa November 28 hanggang sa December 1 naman ay inaasahang mapaplantsa ito sa bicameral conference at bago mag-Pasko ay malalagdaan na ito ng Pangulo.
By Meann Tanbio
Wala nang kasiguraduhan kung magkakaroon pa ng conviction sa mga suspek sa Maguindanao massacre case bago matapos ang termino ni Pangulong Benigno Aquino III.
Taliwas ito sa naging pahayag ni dating DOJ Secretary Leila de Lima na posible at kakayaning mapa-convict kahit isa man lang suspek sa panahon ng panunungkulan ni PNoy.
Ayon kay DOJ Undersecretary at Spokesman Alfredo Benjamin Caguioa, hindi kayang ibigay ng ahensya ang kaparehong assurance.
Aniya, ang prosecution team aniya na nakatutok sa kaso ay walang kontrol sa itatakbo at itatagal ng kaso.
Ang sigurado lang aniya sa ngayon ay ginagawa ng prosecution team ang lahat para labanan ang anumang delaying tactics ng defendants.
By Rianne Briones
Nagsalita na ang Kapuso actor na si Rocco Nacino ukol balitang hiwalay na sila ng longtime girlfriend nitong si Lovi Poe.
Sa kanyang Instagram post, itinanggi ni Rocco na nilustay niya ang pera mula sa joint account nila ni Lovi.
Pinabulaan din ni Rocco na mayroon siyang ibang babae na isa sa mga itinuturong dahilan ng hiwalayan nila ng kasintahan.
Gayunman, hindi kinumpirma ni Rocco kung break na nga silang dalawa ni Lovi.
Sa halip himingi ito ng privacy para sa kanilang dalawa ni Lovi Poe.
By Ralph Obina