June 2026

Maituturing na mabilis pa rin umano ang proseso sa Maguindanao massacre case.

Ito ang binigyang diin ng ilang opisyal ng Department of Justice kasunod ng pambabatikos ng ilang sektor bunsod ng umano’y mabagal na usad ng kaso sa pagkamatay ng mahigit 50 katao sa Ampatuan, Maguindanao noong November 23, 2009.

Paliwanag sa DWIZ patrol ng mga DOJ official na ayaw magpabanggit ng pangalan, kung susuriin lamang umano ng mga kritiko ang proseso ay makikita nila na ginagawa ng DOJ Panel of Prosecutors ang lahat para mapabilis lamang ang paglilitis dito.

By  Jelbert Perdez | Bert Mozo (Patrol 3)  

Kung ang Pilipinas ay handang-handa sa ikalawang sigwada ng pagdinig sa Arbitral Tribunal hinggil sa gusot sa West Philippine Sea, ang China naman ay hindi sumipot sa hearing at muling nanindigang hindi makikiisa rito.

Ayon kay Chinese Foreign Ministry Spokesperson Hong Lei, malinaw ang kanilang posisyon sa kaso at iyon ay ang hindi pakikiisa at pagtanggap sa naturang arbitration.

Ang pahayag ay ginawa ng China matapos ilatag ng pilIPinas sa tribunal ang merito nito sa reklamo laban sa claims ng mga Tsino.

By  Jelbert Perdez | Allan Francisco  

Tinututukan ngayon ng Manila Police District ang posibleng pagdagsa ng sangkaterbang mamimili sa Divisoria.

Ayon kay MPD Director Police Chief Supt. Rolando Nana, pinagsanib nito ang ilang yunit ng lokal na pulisya upang i-monitor ang naturang lugar.

Sinabi ni Nana na sa ganitong paraan ay mabibigyan ng sapat na seguridad ang mga mamimili sa lugar.

May mga ipinakalat din aniyang mga pulis na nakasibilyan para manmanan ang kilos ng mga masasamang loob.

Muli ring nagpaalala ang pamunuan ng MPD sa publiko na mag-ingat sa kanilang pagtungo sa Divisoria na kilalang bagsakan ng mga murang bilihin sa Maynila.

By Jelbert Perdez | Aya Yupangco (Patrol 5)  

Nagpaiwan umano sa Pilipinas ang ilan sa mga delegado ng katatapos na APEC Summit.

Ayon kay Philippine National Police (PNP) Spokesman Police Chief Supt. Wilben Mayor, pinakahuling lalabas ng bansa ay ang isang delegado na nakatakdang umalis sa Disyembre 20, limang araw bago mag-Pasko.

Nilinaw naman ni Mayor na walang ibinibigay na espesyal na seguridad sa mga nasabing delegado dahil hindi naman sila VIP tulad ng ilang world leader na dumalo sa naturang summit.

By Jelbert Perdez | Jonathan Andal  

Malabo umano ang posibilidad na maka-pamasko si dating Pangulong Gloria Macapagal-Arroyo sa kanyang tahanan sa La Vista, Quezon City o ‘di kaya’y sa Pampanga.

Ito’y matapos sabihin ni Sandiganbayan Justice Efren de la Cruz na saklaw ng ’90 days status quo ante order’ ng Korte Suprema ang house arrest motion ni Arroyo na nakabinbin sa unang dibisyon ng Anti-Graft Court.

Paliwanag ni de la Cruz, sa loob ng tatlong buwan ay hindi magkakaroon ng anumang pagdinig sa naturang hirit ng dating Pangulo hanggang sa Pebrero sa susunod na taon.

By Jelbert Perdez | Jill Resontoc (Patrol 7)  

Kinontra ni Senator Alan Peter Cayetano ang pahayag ni Pangulong Benigno Aquino III na na-sensationalize lang umano ang tanim-bala sa Ninoy Aquino International Airport (NAIA).

Ayon kay Cayetano, nagkaroon ng kapabayaan at kapalpakan ang mga airport at transportation official sa paghawak sa isyu kung saan karamihan sa mga umano’y biktima ay mga Overseas Filipino Worker (OFW) at matatanda.

Giit ng senador, karaniwang pinagtutuunan ng pansin ng media ang mga usapin na wala umanong nakukuhang aksiyon mula sa gobyerno.

By  Jelbert Perdez | Cely Bueno (Patrol 19)  

Kumpiyansa si Senate President Franklin Drilon na maaaprubahan na nila sa third at final reading ang proposed 2016 national budget, bukas.

Ito, ayon kay Drilon ay dahil halos kalahati na ng mga ahensya ng gobyerno ang nakalusot sa plenary.

Pagkatapos aniya nilang aprubahan sa Huwebes ang budget ay agad isusunod ang bicameral conference hearing dahil target nilang matapos ang bicam at maaprubahan ang report sa una o ikalawang linggo ng Disyembre.

Kabilang sa mga aprubado na sa plenaryo ay ang budget ng Office of the President, Vice President, Judiciary, Departments of Foreign Affairs, Public Works and Highways; Environment and Natural Resources, Social Welfare and Development, Commission on Audit, Presidential Management Staff, Civil Service Commission at ilan pang ahensya ng gobyerno.

By  Drew Nacino | Cely Bueno (Patrol 19)

Tiniyak ng Department of Foreign Affairs (DFA) na minamadali na ng embahada ng Pilipinas sa Saudi Arabia ang pagpapauwi sa labi ng mga Filipino na nasawi sa car accident sa Al-ahsa Province sa Saudi Arabia.

Ayon kay Foreign Affairs Assistant Secretary Charles Jose, hinihintay na lamang ng Philippine Embassy ang police report bago iuwi ang 13 Pinoy na nasawi.

Samantala, nakalabas na aniya ng ospital ang dalawang OFW na kabilang naman sa nasugatan matapos magtamo lamang ng minor injuries.

Binisita na rin ng Philippine Overseas Labor Office ang mga nasugatang Pinoy.

By  Drew Nacino | Allan Francisco