June 2026

Naniniwala ang ina ni Jason Ivler na si Marlene Aguilar na mananaig pa rin ang hustisya at katotohanan sa kaso ng kanyang anak.

Ito ay matapos na ma-convict si Ivler sa kasong pagpatay sa anak ni dating Presidential Chief of Staff Renato Ebarle dahil sa road rage.

Sa kanyang Facebook post, sinabi ni Marlene Aguilar na iaapela ng kanilang mga abogado ang naging desisyon ng korte.

Kumpiyansa si Aguilar na mapapawalang-sala ang kanyang anak tulad ng nangyari kay Hubert Webb, anak ni dating Senador Freddie Webb na nakulong ng 15 taon na kinalaunan ay pinawalang sala rin ng Korte Suprema.

By Rianne Briones  

Nanindigan si Senator Miriam Santiago na tuloy pa rin ang kanyang pagsabak sa 2016 presidential elections.

Taliwas ito sa lumulutang na balita na magbibigay daan ang senadora kay Davao City Mayor Rodrigo Duterte na sinasabing sinusuportahan nito.

Ayon kay Santiago, bilib siya kay Duterte ngunit hindi ito magiging dahilan para umurong siya sa laban hanggang sa tagumpay.

Matatandaang nag-anunsyo ng kanyang intensyong pagtakbo si Duterte dahil sa kanyang pagkadismaya sa ginawang pagbasura ng Senate Electoral Tribunal sa disqualification case laban kay Senator Grace Poe.

By   Rianne Briones 

Nabunyag ang cash reward policy na ipinatutupad ng OTS o Office of Transportation Security sa kanilang mga tauhan na makakasabat ng mga kontrabando tulad ng armas at pampasabog sa security checkpoints.

Nakasaad sa memorandum na may titulong proposed rewards/awards for deserving OTS personnel, ang reward na hanggang P1,000 para sa mga pampasabog, armas, stunning device at dangerous drugs na makikita ng ots personnel o security screening officers.

Kinumpirma ni Transport Security Risk Management Bureau Assistant Administration Director Roberto Almadin ang nasabing memo subalit dalawa o tatlong empleyado pa lamang nila ang nabigyan ng reward.

Nilinaw ni Almadin na walang kinalaman ang naturang memo sa laglag bala controversy.

Binigyang diin naman ni OTS Administrator Roland recomono na isinulong nila ang reward para palakasin ang kalagayan at moral ng OTS personnel.

By  Judith Larino      

Walang dagdag singil sa pasahe na ipatutupad sa Light Rail Transit (LRT) at maging sa Metro Rail Transit (MRT).

Tiniyak ito ng Department of Transportation and Communications (DOTC) sa deliberasyon ng P42 billion peso budget nito para sa susunod na taon matapos tanungin ni Senador Vicente Sotto III ang halos P4 billion peso subsidy para sa mass transport.

Sinabi ni Senador Loren Legarda na siyang nagdedepensa sa DOTC budget bilang Chairman ng Senate Committee on Finance na ang nasabing halaga ay subsidy para sa MRT.

Na kaagad sinundot ng tanong ni Sotto na nangangahulugan itong walang fare increase sa 2016 na positibo namang sinagot ni Legarda.

Ayon kay Sotto, nakita niyang umoo naman si DOTC Secretary joseph Abaya bilang pagkatig sa sagot ni Legarda

Inulit pa ni Senador Grace Poe ang tanong ni Sotto hinggil sa fare hike na pinanindigan naman ni Legarda na hindi mangyayari.

Magugunitang noong isang taon, ilang araw matapos aprubahan ng Kongreso ang 2015 national budget ay inanunsyo ng DOTC ang dagdag pasahe sa LRT at MRT.

By Judith Larino

Pinatutustusan ni Senador Ralph Recto sa gobyerno ang ‘saltwater lamp’ na inimbento ng Pinay engineer na si Aisa Mijeno.

Ito’y sa pamamagitan ng paggamit ng pondo mula sa Malampaya royalties na umabot na sa P168.9 bilyon.

Ayon kay Recto, hindi na kailangan pang humingi ng ehekutibo ng pondo sa Kongreso dahil marami naman silang mga ‘off-budget’ tulad ng Malampaya royalty remittances.

Ang tinutukoy nito ay ang share ng gobyerno sa produksyon ng Malampaya natural gas field off sa Northern Palawan.

Sa kasalukuyan, umaabot sa P168.9 bilyon ang outstanding balance ng Malampaya funds.

Nauna rito, nanawagan si Mijeno na suportahan ang imbensyon para makapag-mass produce sila nito.

By  Mariboy Ysibido 

Sinunog ng mga kawani ng Philippine Drug Enforcement Agency (PDEA) sa Butuan City ang mga iligal na droga na kanilang nasabat.

Nagkakahalaga ng humigit kumulang P1 milyong piso ang mga drogang nasabat.

Ilan sa mga sinunog ay shabu at marijuana na nalikom mula sa mga pursuit operations na kanilang ginawa sa rehiyon.

Pinapakita lamang umano ng PDEA sa publiko na seryoso sila sa pagpuksa ng mga ipinagbabawal na droga kaakibat sa kanilang pinapaigting na anti-illegal drugs campaign.

By  Mariboy Ysibido