Nananatili pa rin ang babala ng Civil Aviation Authority of the Philippines o CAAP kaugnay ng pag-aalburuto ng bulkang Kanlaon.
Sa isang Notice to Airmen o NOTAM, pinag-iingat ang mga commercial pilots na lilipad sa paligid ng Mt. Kanlaon.
Ayon sa CAAP, simula pa noong Lunes ng umaga ay umiiral na ang restriction matapos magbuga ng abo ang nasabing bulkan.
By Jelbert Perdez | Raoul Esperas (Patrol 45)
Itinanggi ng Kapamilya actor na si Paolo Avelino ang lumabas na balitang nagkabalikan na sila ng anak ni Megastar na si KC Concepcion.
Ayon kay Paolo, nagkaroon muli sila ni KC ng communication nang magkita sila sa show ng ASAP sa London noong September.
Dagdag pa ng aktor, magkaibigan sila ngayon ni KC at hindi naman daw nawawala ang connection nila sa isa’t isa.
Nang tanungin naman kung lumalabas ba sila ni KC, tanging sagot lang ni Paolo ay kapwa sila busy sa kani-kanilang trabaho.
By Krista de Dios
Idineklara na ang 30 araw na state of emergency sa Tunisia matapos ang pagsabog ng isang bus sakay ang mga presidential guard na ikinasawi ng 12 katao.
Kasabay nito, nagpatupad na rin ng curfew sa Tunis Region kasunod ng insidente.
Tiniyak naman ni Tunisian President Beji Essebsi, na kanilang papanagutin ang mga nasa likod ng naturang pag-atake.
Nagdeklara rin ng giyera laban sa terorismo ang Tunisia at nanawagan ng pakikipagtulungan upang supilin ang mga extremist group na pumatay sa daan-daang biktima sa Europa at Gitnang Silangan.
By Ralph Obina
Hindi pa tapos ang laban ng pamilya Ebarle laban kay Jason Ivler, pamangkin ni Freddie Aguilar na hinatulang mabilanggo sa kasong pagpatay dahil lamang sa away sa trapiko.
Ayon kay Boy Evangelista, Spokesman ng VACC o Volunteers Against Crime and Corruption, bagamat nagagalak sila sa hatol kay Ivler, kitang-kita naman kung gaano kabagal ang sistema ng hustisya sa bansa.
Anim na taon anya bago nagkaroon ng conviction kay Ivler at otomatiko pa itong aakyat sa Court of Appeals at hanggang sa Korte Suprema.
“Sinasabi nila kahit may conviction what is certain is hindi na nila maibabalik ang buhay ng anak nila, ang sabi nga nila hindi pa nga natatapos dito kasi yung conviction sa RTC that makes automatic yung appeal sa CA and then after a year or more puwede pa rin silang mag-motion for reconsideration sa Supreme Court.” Pahayag ni Evangelista.
By Len Aguirre | Ratsada Balita
Iginiit ng delegasyon ng Pilipinas ang karapatan nito na malayang makapangisda sa West Philippine Sea.
Ito ang ipinaglaban ng Pilipinas sa Permanent Court of Arbitration sa The Hague, The Netherlands kaugnay ng nine-dash line claim ng China na naglilimita sa Pinoy na makapangisda sa mga pinag-aagawang teritoryo.
Ayon kay Principal Counsel Paul Reichler, kulang ang basehan ng China sa historical claims nito ukol sa nine-dash line.
Nanindigan ang Pilipinas na wala sa anumang probisyon ng United Nations Convention on the Law of the Sea o UNCLOS ang sinasabing nine-dash line claim ng China.
Dahil dito, may karapatan aniya ang Pilipinas na mangisda sa mga pinag-aagawang teritoryo sa loob ng 200 nautical mile exclusive economic zone.
By Ralph Obina
Photo from: gov.ph
Tiwala ang kampo ni dating Pangulong Gloria Arroyo na ma-didismiss ang kasong plunder laban dito bago matapos ang termino ni Pangulong Benigno Aquino III.
Reaksyon ito ni Atty. Larry Gadon, dating Legal Consultant ni Arroyo makaraang palawigin pa ng 90 araw ng Korte Suprema ang status ante order o pagpapatigil sa Sandiganbayan na dinggin ang kaso ni Ginang Arroyo.
Kumbinsido si Gadon na mayroong nakitang matibay na basehan ang Supreme Court para pag-aralan pang mabuti ang mosyon ng kampo ni Ginang Arroyo na i-dismiss na ang kaso.
“Ang ginagawa ng Sandiganbayan kasi ay iniiba nila ang depinisyon ng plunder para patuloy nilang maipiit si dating Pangulong Gloria Macapagal Arroyo, kung ikaw ay isang abogado, at kung talagang ikaw ay sumusunod sa rule of law, ang plunder na yan ay conspiracy na crime, the act of one is the act of all, so kung pinakawalan mo yung iba, dapat pakawalan mo lahat, kung dinismiss mo yung petisyon ng iba for demurrer of the evidence dapat ibigay mo din yun sa lahat.” Pahayag ni Gadon.
By Len Aguirre | Balitang Todong Lakas
Niyanig ng magnitude 7.5 na lindol ang Peruvian-Brazilian border sa Amazon Basin.
Ayon sa US Geological Survey, natukoy ang sentro ng lindol sa layong 296 na kilometro hilagang silangan ng Puerto Maldonado ng Peru at may lalim na 602 kilometro sa ilalim ng lupa.
Naramdaman naman ang 7.1 magnitude na lindol sa katimugang bahagi ng Peru malapit Chilean border habang nakapagtala naman ng ikalawang pagyanig na nasa magnitude 5.9.
Wala namang napaulat na napinsala o nasaktan sa naturang paglindol.
By Ralph Obina
Nasabat ng mga tauhan ng Quezon City Veterinary Office ang may 300 kilo ng kontaminadong frozen meat sa Commonwealth Market.
Ayon kay Quezon City Veterinary Office Chief Dr. Ana Cabel, nasamsam ang mga nasabing karne sa apat na stall sa palengke kung saan ay hindi maayos ang paghawak at pag-iimbak sa mga ito.
Lumalabas na nakalapag lamang sa gilid ng tindahan ang mga frozen meat sa halip na nakalagay ang mga ito sa loob ng freezer.
Sinabi ni Cabel na mapanganib ito sa kalusugan ng mga mamimili dahil sa malaki ang posibilidad na pinamahayan na ito ng mga mikrobyo.
By Ralph Obina
Nagmistulang walang kalaban-laban ang China sa unang araw ng pagdinig sa merito ng reklamo Pilipinas sa International Arbitral Tribunal sa The Hague, Netherlands laban sa mga inaangking teritoryo ng China.
Sa pagharap ni Solicitor General Florin Hilbay, binigyang diin niya sa kanyang argumento ang kawalan ng basehan ng claim ng mga Tsino sa pamamagitn ng nine-dash-line.
Tinalakay naman ni Principal Counsel Paul Reichler ang historic claim ng China sa ilalim umano ng United Nations Convention on the Law of the Sea na aniya ay hindi nag-exist sa ilalim ng probisyon ng convention.
Binigyang-diin din ng mga abugado ng gobyerno sa korte ang pagbabawal ng China sa Pilipinas na mangisda at maglunsad ng exploration activities sa inaangking mga teritoryo pati na kung paano sinaklawan ang karapatan ng bansa.
Nabigo ang China na matugunan at mapatunayan ang claim sa mga inaangking teritoryo sa pamamagitan ng ipinakitang walong mapa mula pa noong panahon ng Ming Dynasty, at hindi kasama ito sa kanilang claim sa ilalim ng nine-dash line.
By Jelbert Perdez | Aileen Taliping (Patrol 23)
Photo from: gov.ph
Huwag namang pahirapan ang mga motorista.
Ito ang binigyang diin ni Senator Ralph Recto kasunod ng panukala ng Department of Transportation and Communications o DOTC na obligahin ang mga tsuper na kumuha ng NBI at police clearance bago magpa-renew ng lisensya.
Una nang iginiit ng DOTC na kailangan ito upang matiyak na walang nakabinbing kaso ang sino mang magre-renew ng driver’s license.
Subalit, sa panayam ng DWIZ, iginiit ni Recto na ang pinakaapektado ng naturang kautusan ay ang mga motorista mula sa mga probinsya.
“Halimbawa kung nasa probinsiya ka pupunta ka sa nearest na syudad para kumuha ng NBI clearance at PNP clearance, bakit dalawa ang hinahanap nila, bakit hindi isa lang? at hindi ganun kadaling kumuha ng NBI clearance.” Pahayag ni Recto.
By Jelbert Perdez | Karambola