June 2026

Tiniyak ng Overseas Workers Welfare Administration o OWWA na handa silang tumulong sa mga naulilang kaanak ng 13 Pinoy na nasawi sa isang car accident sa Saudi Arabia.

Sinabi ni OWWA Administrator Rebecca Calzado na makatatanggap ang bawat pamilya ng mga nasawi at aktibong miyembro nila ng P200,000 pesos na death benefits lalo’t aksidente ang dahilan ng kanilang pagkamatay.

Para naman sa mga nasugatang Pinoy sa aksidente, sinabi ni Calzado na makakatanggap ang mga ito ng hanggang sa P100,000, depende sa pinsala.

Makatatanggap din ang mga ito ng livelihood assistance sa pamamagitan ng food cart business na katumbas ng P15,000.

By  Jelbert Perdez | Allan Francisco  

Isinailalim na sa state of calamity ang lalawigan ng Basilan dahil sa malawakang pamemeste ng cocolisap.

Kabilang sa mga apektado ng cocolisap infestation ay ang mga siyudad ng Isabela at Lamitan maging ang mga bayan ng Lantawan, Maluso, Sumisip, Akbar at Tuburan.

Sa ilalim ng state of calamity, maipapalabas ang pondo na gagamitin para ayudahan ang mga magsasaka at residenteng apektado ng cocolisap infestation.

By  Ralph Obina  

Naka-heightened alert na ang buong puwersa ng Philippine National Police (PNP) kaugnay ng nalalapit na Kapaskuhan.

Nilinaw ni PNP Chief Director General Ricardo Marquez na ang pagtataas ng alerto ay walang kinalaman sa ipinalabas na worldwide travel alert ng Estados Unidos kahapon.

Ayon kay Marquez, walang namo-monitor na anumang terror threat ang PNP sa gitna ng serye ng mga pag-atakeng ginagawa ng Jihadist Islamic State.

Matatandaang noong nakaraang linggo ay naka-full alert naman ang PNP dahil sa idinaos na APEC Summit.

By  Ralph Obina

Labing isang (11) pagyanig ang naitala ng Philippine Institute of Volcanology and Seismology o PHIVOLCS sa bulkang Kanlaon sa nakalipas na 24 oras.

Matatandaang itinaas na ang alert level 1 sa bulkan kahapon matapos makitaan ng bahagyang pag-aalburuto.

Huling sumabog ang Mt. Kanlaon noong August 10, 1996 kung saan 24 na mountain climbers ang nasawi.

By Jelbert Perdez    

Nagkaroon umano ng price rollback sa Liquified Petroleum Gas o LPG, epektibo kaninang alas-12:01 ng tanghali.

Ayon kay LPGMA Partylist Rep. Arnel Ty, halagang P3.00 per kilogram ang tapyas-presyo sa lpg o P33.00 per cylinder.

Dahil dito, sinabi ni Ty na naglalaro na ngayon sa P460.00 ang presyo o Suggested Retail Price (SRP) ng kada tangke ng LPG.

By Jelbert Perdez | Jill Resontoc (Patrol 7) 

Nagbalikan na ang mga sidewalk vendors sa Baclaran matapos paalisin noong nakaaraang linggo dahil sa APEC Summit.

Puno na naman ng mga vendor ang paligid ng Redemptorist Church na pinaalis ng Metropolitan Manila Development Authority (MMDA) at Parañaque police noong summit para maiwasan ang pagsisikip ng trapiko.

Ang paligid ng simbahan ay bahagi ng mga itinalagang Mabuhay Lanes, subalit hindi madaanan ng mga sasakyan dahil sa mga naglipanang vendors.

Paliwanag naman ng mga sidewalk vendors, kailangan nilang bumalik sa pagtitinda para makabawi sa kita lalo’t isang buong linggo silang nalugi dahil mistulang sarado ang buong Baclaran noong APEC week.

By Jelbert Perdez | Allan Francisco

Kinondena ni Vice President Jejomar Binay ang sunod-sunod na pagpaslang sa mga hukom sa bansa.

Ito’y kasunod ng pagpatay kay Judge Reynaldo Espinar ng Municipal Circuit Trial Court sa Laoang, Northern Samar na pinagbabaril sa loob ng isang sabungan sa nasabing lugar.

Ayon kay Binay, hindi katanggap-tanggap ang mga pag-atake sa hudikatura kaya’t marapat lamang na bilisan ang imbestigasyon sa mga naturang kaso upang mapanagot ang mga salarin.

By  Jelbert Perdez | Allan Francisco