June 2026

Sa harap ng banta ng terorismo sa iba’t ibang panig ng mundo, nanawagan si Senador Grace Poe sa National Security Council na gumawa ng bagong national security strategy.

Iginiit ni Poe na napapanahon na para tutukan ng Pilipinas ang mga isyung may kaugnayan sa pambansang seguridad.

Pinuna rin ni Poe na mula noong 2010, hindi pa nagpupulong ang National Security Council.

Binigyang-diin ng senadora na maiibsan ang takot ng publiko kung ang polisiya ng bansa ay nakatuon sa pambansang interes at pagprotekta sa pambansang teritoryo at soberenya.

By Meann Tanbio | Cely Bueno (Patrol 19) 

Nakatakdang ipagpatuloy ng senado ang pagtalakay sa panukalang Bangsamoro Basic Law o BBL sa susunod na linggo.

Ito, ayon kay Senate President Franklin Drilon ay kapag natapos nilang aprubahan ngayong linggong ito sa third and final reading ang 2016 proposed national budget.

Kabilang sa nakalinyang mag-interpellate sa BBL si Senate Minority Leader Juan Ponce Enrile.

Ipinabatid ni Drilon na kapag natapos na ang period of interpellation, isusunod agad nila ang period of amendments.

Sa tingin ni Drilon, may tiyansa na makalusot sa senado ang BBL subalit malabo itong makalusot sa Kamara dahil sa problema sa quorum.

By  Meann Tanbio | Cely Bueno (Patrol 19) 

Inaasahang mapapasa na ngayong araw ang panukalang P3 trilyong national budget para sa susunod na taon.

Ayon kay Senate President Franklin Drilon, natapos na nila ang deliberasyon ng budget ng lahat ng ahensya dahil sa pagtatrabaho nila dito araw at gabi sa nakalipas na tatlong araw.

Ngayong araw ay maipapasa ito sa second and third reading na posibleng sundan na rin agad ng pagsasalang nito sa bicameral conference para ma-reconcile ang mga bersyon nito.

Habang sa susunod na linggo ay inaasahang matatapos na ito at ganap nang magiging batas.

By Rianne Briones  

“No comment” ang Malacañang sa resulta ng pinakabagong survey ng Pulse Asia kung saan nangulelat sa National Capital Region ang pambato ng administrasyon.

Lumabas sa Pulse Asia survey na 11 percent lamang ang ratings ni Liberal Party standard bearer Mar Roxas at malayo ang diperensiya sa iba pang kandidato sa pagka-Pangulo.

Batay sa survey, nanguna si Davao City Mayor Rodrigo Duterte na nakakuha ng 34%, pumangalawa si Senadora Grace Poe 26% at Vice President Jejomar Binay na nakasungkit ng 21%.

Naunang inihayag ni Presidential Spokesman Edwin Lacierda na hindi personalidad ang batayan sa pagpili ng susunod na lider kundi ang kakayahang maipagpatuloy ang mga nasimulan ng administrasyon.

By  Meann Tanbio | Aileen Taliping (Patrol 23)