Ilulunsad ng mga nagtutulak na mapababa ang income tax ang tinatawag na black Friday protest.
Kaugnay nito, hinikayat ni Bayan Muna Representative Neri Colmenares ang kanyang kapwa kongresista at iba pang indibiduwal na nagnanais na mapababa ang income tax na magsuot ng itim o kaya naman ay maglagay ng itim na ribbon sa Biyernes.
Matatandaang kinontra ni Pangulong Benigno Aquino III ang pagsusulong ng mas mababang income tax sa pagsasabing pagpapapogi lamang ito.
By Rianne Briones
Napipintong maideklara ang 2015 bilang pinakamainit na taon.
Ayon ito kay Michel Jarraud, pinuno ng World Meteorological Organization, isang linggo bago ang itinakdang Climate Change Summit sa Paris.
Ipinabatid ng WMO na batay sa kanilang record, pumapalo sa pinakamataas o pinakamainit na level ang temperatura sa lupa at dagat sa unang 10 buwan ng taong ito o mas mataas pa sa mga naitala noong 2014.
Lumalabas pa sa mga paunang data ng UN Agency na umabot na sa itinuturing na symbolic at significant milestone ng 1 degree Celsius o 1.8 degree Fahrenheit na mas mataas sa mid-19th Century levels ang global average surface temperature.
By Judith Larino
Nanawagan ang grupo ng mga kababaihan sa pamahalaan na aksyunan ang dumaraming kaso ng Violence Against Women and Children o VAWC.
Ang pahayag ay ginawa ng Gabriela kasabay ng pagdiriwang ng kanilang National Consciousness Day for the Elimination of Violence Against Women and Children kahapon.
Nagtipon sa Bonifacio Shrine ang mga miyembro ng Gabriela kung saan tinuruan ang mga kababaihan ng self-defense.
Base sa mga datos, isang babae o bata ang biktima ng pananakit bawat 16 minuto.
Kaugnay nito, sinabi ni Gabriela Secretary Joms Salvador na sa ilalim ng Aquino Administration ay nakapagtala ng pinakaramaraming kaso ng VAWC.
Mula sa 9,974 na kaso noong 2010, umakyat ito sa 31,937 noong nakalipas na taon.
By Meann Tanbio
Nawalan ng tirahan ang may 1,000 pamilya sa Barangay Addition Hills, Mandaluyong City.
Ayon kay Eastern Manila District Fire Marshal Sr. Supt. Samuel Tadeo, umabot pa sa general alarm status ang sunog sa Block 32, Molave Street sa nasabing lungsod.
Mabilis na kumalat ang apoy dahil pawang yari sa light materials ang bahay ng mga naapektuhan ng sunog.
Kasalukuyan nang namamalagi ang mga nasunugang pamilya sa limang evacuation centers sa Mandaluyong City.
By Meann Tanbio
Kinumpirma ng Department of Trade and Industry o DTI ang pagkakabuo ng isang grupo na tututok sa imbestigasyon sa problema sa isang Mitsubishi Montero na nasangkot sa aksidente kamakailan.
Sa panayam ng DWIZ, sinabi ni DTI Undersecretary Victorio Dimagiba na kabilang sa mga miyembro ng probe team ang tatlong direktor ng ahensya.
Ayon kay Dimagiba, nagpalabas na rin ng imbitasyon ang mga miyembro ng lupon para sa mga eksperto upang matukoy kung anong isyu sa sasakyan at alamin kung may piyesa na naging ugat ng aksidente.
“Nag-volunteer sila mismo, tumawag sila kahapon nung nadinig nila ang balitang nag-create ako ng panel, meron pala tayong Electronic Product Design Center diyan sa DOST under Advance Science Testing Institute, sabi nila kaya nilang inspeksyunin ang sasakyan.” Paliwanag ni Dimagiba.
By Jelbert Perdez | Ratsada Balita
Handa ang Philippine National Police (PNP) na isailalim sa lifestyle check ang ilan sa mga tauhan ng Aviation Security Group sa harap na rin ng hindi matapos-tapos na isyu ng tanim laglag bala sa NAIA.
Ayon kay PNP Chief Director General Ricardo Marquez, isang opsyon ang pagsasagawa ng lifestyle check kung pinaghihinalaan ang isang pulis na sangkot sa isang criminal activity.
Sinabi ni Marquez na sa ngayon, may mga hinihingi pa silang mga dokumento sa Office for Transportation Security o OTS patungkol sa dami ng mga nakumpiskang bala at kung kanino i-tinurn over ang mga ito.
Kapag nakita aniya na ang isang pulis na pinag-tinurn overan ng bala ay walang naihaing na kaso, magiging subject ito sa imbestigasyon.
Iginiit ni Marquez na sa oras na mapatunayang sangkot ito sa laglag bala, mare-relieve at posible pang ma-dismiss ang isang pulis.
By Meann Tanbio | Jonathan Andal
Itinaas na ng Estados Unidos sa 79 million dollars ang military aid nito sa Pilipinas ngayong taon.
Ito ang inihayag ni US Ambassador to the Philippines Philip Goldberg sa gitna ng tensyon sa West Philippine Sea.
Ang military aid anya ay bahagi ng maritime security initiative sa South-East Asia kung saan hindi lamang Pilipinas ang nakatatanggap ng tulong mula sa Amerika.
Idinagdag ni Goldberg na darating sa huling bahagi ng susunod na taon ang ikatlong hamilton-class coast guard cutter na una ng ipinangako ni US President Barack Obama nang bumisita ito sa Pilipinas para sa APEC Summit, noong isang linggo.
Samantala, inihayag ng Department of National Defense na 2 US Marine C-130 transport aircraft at 8 amphibious assault vehicles ang nakatakda ring dumating sa taong 2016.
VFA
Samantala, muling tiniyak sa publiko ni Goldberg ang pagtalima ng Amerika sa Visiting Forces Agreement.
Ito’y sa gitna ng nagpapatuloy na paglilitis kay US Marine Lance Corporal Joseph Scott Pemberton, akusado sa pagpatay sa Filipino transgender na si Jeffrey Laude alyas Jennifer.
Ayon kay Goldberg, gumagawa na ng paraan ang Estados Unidos at Pilipinas upang mailatag ang mga kondisyon na magiging patas para sa magkabilang panig.
Anuman anya ang kahinatnan ng kaso ay nakatitiyak ang publiko na maglalatag ang dalawang panig ng solusyon.
Inaasahang ilalabas ng Olongapo City Regional Trial Court ang desisyon sa unang linggo ng Disyembre kaugnay sa kaso ni Pemberton.
By Drew Nacino
Niyanig kagabi ng magnitude 5.0 na lindol ang Sarangani, Davao Occidental.
Sa report ng Philippine Institute of Volcanology and Seismology (PHIVOLCS), alas-7:23 ng gabi nang ng maramdaman ang pagyanig.
Naitala ito sa layong 125 km silangan ng Davao Occidental na may lalim na 120 kilometro.
Naramdaman naman sa General Santos City at ilang bahagi ng Sarangani Province ang intensity 1.
Ang nasabing lindol ay tectonic in origin.
Wala namang naitalang pinsala at nasaktan bunsod ng naturang pagyanig. Wala ring inaasahang tsunami at aftershocks.
By Mariboy Ysibido
Dumating na sa bansang Kenya si Pope Francis.
Lumapag ang ang kanyang sinakyang eroplano sa Nairobi para sa unang leg ng landmark trip sa Africa.
Masayang sinalubong ni Kenya President Uhuru Kenyatta ang Santo Papa pagdating sa naturang bansa.
Nakatakdang bumisita ang Santo Papa sa Uganda at Central African Republic na mayroong Christian-Muslim conflict.
Nagbiro pa si Pope Francis na hindi ito natatakot sa pagbisita sa Africa at ang lamok lamang ang kanyang kinatatakutan.
By Mariboy Ysibido
Nakaisa na ang Far Eastern University (FEU) Tamaraws kontra sa University of Santo Tomas (UST) Tigers sa kanilang unang paghaharap sa finals ng Season 78 ng UAAP Men’s Senior Basketball Championship.
Naitala ang final score ng Game 1 sa 75-64.
Sinabi ni Tamaraws Team Manager Ritchie Ticzon na naging inspirasyon nila sa laban ang taguring underdog matapos mabigong manalo kontra UST sa kanilang engkuwentro sa elimination round pa lamang.
Ito ang unang paghaharap ng Tamaraws at Tigers sa championship sa torneo matapos ang 36 na taon.
By Judith Larino