June 2026

Tinatayang 7.2 milyong botante ang na-disenfranchised o hindi na makakaboto sa 2016 national and local elections.

Ito, ayon kay Senator Loren Legarda, ay dahil sa hindi nakaboto sa dalawang magkasunod na eleksiyon o kaya’y kulang sa biometrics data.

Sa pagdinig ng senado sa panukalang P15.54 billion budget ng COMELEC, tinukoy na 2.4 million voters ang walang biometric registration habang 6 million ang naalis sa listahan dahil hindi nakaboto noong 2013 elections.

Gayunman, sinasabing sa 6 million deactivated voters ay 1.2 million naman sa mga ito ay nakapag-reactivate ng kanilang registration.

Inihayag naman ng COMELEC na mayroong 54.5 million qualified voters para sa halalan sa susunod na taon.

By Jelbert Perdez  

Huwag pagkaitang makaboto ang mga botante.

Ito ang binigyang diin sa DWIZ ni Kabataan Partylist Rep. Terry Ridon kasunod ng ginawang pagkuwestiyon sa “no bio, no boto policy” ng Commission on Elections o COMELEC sa Korte Suprema.

Ayon kay Ridon, hindi dapat alisan ng karapatan ang milyun-milyong registered voters na bumoto sa susunod na taon dahil lamang sa kawalan ng biometrics data.

Giit pa ng mambabatas, labag sa Saligang Batas ang naturang polisiya ng COMELEC.

“Ang panawagan namin ay ibasura na itong no bio no boto ng Commission on Elections kasi ang tingin namin ay wala po itong constitutional basis.” Pahayag ni Ridon.

By  Jelbert Perdez | Ratsada Balita

Natapos na ang konstruksyon ng pagdarausan ng 51st International eucharistic congress sa cebu city.

Isang turn over ceremony ang idinaos sa pangunguna ng owner ng Duros Development Corporation na nagpatayo ng International Eucharistic Congress Pavillion at Archdiocese of Cebu.

Ayon kay Cebu Archbishop Jose Palma, isang malaking sorpresa ng Diyos para sa kanila ang naturang gusali na may tatlong palapag.

Nagkakahalaga ang pavilion ng P550 million pesos na may anim na function rooms, isang plenary hall at theater at ginastusan ng DDC.

Idaraos sa cebu ang IEC sa Enero 24 hanggang 31 ng susunod na taon.

By  Drew Nacino

Nakatakda nang dumating bukas sa Pilipinas ang dalawa sa labindalawang FA-50 advance trainer at multirole supersonic fighter jet mula South Korea.

Ayon kay Air Force Spokesman Col. Enrico Canaya, lalapag ang dalawang aircraft sa Clark Air Base, sa Pampanga.

Isa anyang seremonya ang idaraos sa pangunguna ni Defense Secretary Voltaire Gazmin bilang pagsalubong sa dalawang bagong asset ng Air Force.

Karagdagang piloto naman ang sasanayin sa pagpapalipad ng mga FA-50 jets sa mga susunod na buwan.

Samantala, ang 10 nalalabing fighter trainer jets ay nakatakda namang i-deliver hanggang taong 2017.

By  Drew Nacino 

Nakapagtala ng halos 300 disasters o kalamidad ang Pilipinas sa nakalipas na 20 taon.

Ito ang naglagay sa pilipinas sa ika-apat na puwesto sa mga bansa sa mundo na nakapag-record ng pinakamalaking bilang ng kalamidad mula 1995 hanggang 2015.

Nangunguna rito ang Amerika na may naitalang 472 kalamidad, China na 441 at ikatlo ang India na may 288 disasters.

Kabilang din ang Pilipinas sa 10 bansang may pinakamataas na naapektuhan ng mga kalamidad na nasa 130 million.

By Judith Larino