June 2026

Nasakote ang 5 most wanted person sa magkakahiwalay na operasyon ng PNP-Criminal Investigation and Detection Group sa loob ng 24 oras.

Kabilang sa mga naaresto ang isang Luisito Gonzales ng Zambales na wanted sa kasong murder at slight physical injuries habang arestado rin ang isang Arnold Ronquillo sa Imus, Cavite.

Huli naman sa Sorsogon sina Amadeo Divina na may kasong frustrated murder at Rommel Avanseña sa Daet, Camarines Norte na may kasong rape.

Natimbog din ng PNP-CIDG ang isang Gilbert Rabina sa Barangay Bunawan, Davao City na nahaharap sa tatlong bilang ng kasong rape.

Hinihintay pang mai-turn over sa mga kaukulang korte ang mga nadakip na most wanted persons.

By  Jelbert Perdez | Jonathan Andal   

Sinang-ayunan ni Vice President Jejomar Binay ang hatol nina Supreme Court Justices Arturo Brion, Antonio Carpio at Teresita de Castro sa disqualification case laban kay Senator Grace Poe.

Ayon kay VP Binay, ang naging resulta kasi sa kaso ni Poe ay isang pagkuwestiyon sa Saligang Batas.

Dahil kung maaalala, ibinasura ng Senate Electoral Tribunal o SET ang reklamo ni Rizalito David laban kay Poe.

Giit ni Binay, bilang abogado ay kailangang masunod ang batas ng bansa.

Dagdag pa ng Bise-Presidente, hindi naman aalisan ng pagka-Pilipino si Poe bagkus ay hindi lamang umano ito natural-born Filipino.

Samantala, binasag na ni Vice President Jejomar Binay ang kaniyang katahimikan kaugnay ng umano’y pag-impluwensiya niya sa anak na si Senator Nancy Binay para bumoto pabor sa disqualification case laban kay Senator Grace Poe.

Pinasinungalingan ni VP Binay ang isyu at iginiit na sariling desisyon iyon ng kanyang anak.

Kung pagbabatayan kasi ang mga naglabasang isyu, sinasabing bumoto pabor sa kaso laban kay Poe si Senator Nancy para mabawasan na umano ang isa sa tinik sa lalamunan ni VP Binay sa 2016 elections.

Ito’y dahil nangunguna umano si Poe sa mga nagdaang survey para sa mga tumatakbong pangulo ng bansa.

Una nang iginiit ni Senator Nancy na walang kinalaman ang kanyang ama sa naging desisyon niya dahil Saligang Batas ang kanyang naging batayan.

By Jelbert Perdez | Allan Francisco

Pinatawan ng Sandiganbayan First Division si dating Pasay City Mayor Wenceslao “Peewee” Trinidad ng 6 hanggang 10 taong pagkakakulong.

Kaugnay sa paglabag ni Trinidad sa Anti Graft and Corrupt Practices Act at Violation 237 ng Revised Penal Code dahil sa maanumalyang transaksyon na pinasok ni Trinidad sa pagpapatayo ng Pasay City Mall at Market noong alkalde pa ito ng lungsod.

Maliban sa kulong, hindi na rin maaaring humawak ng anumang posisyon sa gobyerno si Trinidad.

Kasama nitong napatawan ng conviction si dating Pasay City Councilor Jose Antonio Roxas.

By  Ralph Obina | Jill Resontoc (Patrol 7)  

Umaasa ang Migrante International na makikinabang si Mary Jane veloso sa makasaysayang paglagda ng ilang bansa sa ASEAN Convention Against Human Trafficking in Person o ACTIP.

Ayon kay Migrante Deputy Secretary-General Mic Catuira, dahil isa sa mga signatories ng ACTIP si Indonesian President Joko Widodo ay magandang development ito upang pakinggan ng Widodo ang apela para kay Veloso at iba pang biktima ng trafficking na nasa death row sa naturang bansa.

Umaasa rin si Catuira na magtatakda si Widodo ng magandang halimbawa sa Asya sa pagbibigay ng clemency at pardon kay Veloso na umano’y biktima lamang ng trafficking ng isang sindikato.

By  Jelbert Perdez | Allan Francisco  

Iginagalang ng Malakanyang ang kautusan ng Korte Suprema na nagpalawig ng 90 araw sa pagpapatigil ng pagdinig sa kasong anomalya sa pondo ng Philippine Charity Sweepstakes Office (PCSO) laban kay dating Pangulo at Pampanga Rep. Gloria Macapagal-Arroyo.

Ayon kay Presidential Communications Secretary Sonny Coloma, may orihinal na proseso sa ilalim ng batas at ang Korte Suprema ang magpapasya sa nabanggit na usapin.

Matatandaang pinalawig pa ng mataas na hukuman ang status quo ante order laban sa pagdinig sa kasong plunder ni Arroyo matapos itong mapaso noong Biyernes.

Ang panibagong order ng korte ay magiging epektibo hanggang Pebrero sa susunod na taon.

By  Jelbert Perdez | Aileen Taliping (Patrol 23)