Balik na sa all domestic flight ang Ninoy Aquino International Airport Terminal 4.
Epektibo ngayong araw ay inilipat na ang lahat ng international flight na nag-ooperate sa Terminal 4 pabalik sa Terminal 3.
Bunga ito ng re-activation ng Runway 31 para sa take off ng mga air bus at maliliit na eroplano.
Apektado nito ang tatlong flight ng Air Asia at 20 Cebu Pacific flights.
Pinayuhan na makipag-ugnayan ang mga apektadong pasahero sa mga airline companies.
By Rianne Briones
Dumating si dating Pangulong Gloria Arroyo sa libing ng kanyang kapatid na si Arturo Macapagal.
Pasado alas-9:00 nang lumabas si Arroyo sa Veterans Memorial Medical Center (VMMC) sa Quezon City.
Naging pribado naman ang ginawang paghahatid sa huling hantungan sa kapatid ng dating pangulo kung saan tanging pamilya at mga kaibigan lamang ang pinayagang pumasok sa lugar.
Bago mag alas-2:00 ng hapon tumulak na ang dating Pangulo para bumalik sa VMMC kung saan siya naka-hospital arrest.
By Rianne Briones | Jill Resontoc (Patrol 7)
Posibleng sa susunod na buwan ay ianunsyo na ng United Nationalist Alliance o UNA ang kanilang senatorial lineup para sa 2016 elections.
Ayon kay UNA Spokesman Mon Ilagan, sa Setyembre 30 ay kukumpletuhin na ng UNA Selection Committee ang 12 mamanukin nito para sa Senado.
Samantala, sinabi ni Ilagan na tatlo ang pinagpipilian ni Vice President Jejomar Binay para kanyang maging running mate.
Ngunit tumanggi naman si Ilagan na pangalanan ang 3 personalidad na pinagpipilian ni Binay.
By Rianne Briones
Natagpuang patay ang isang opisyal ng Technological Institute of the Philippines (TIP) at ang drayber nito sa loob ng isang sasakyan sa isang gasoline station sa Pandacan, Maynila.
Napansin ng security guard na matagal nang naka-park ang sasakyan sa gasolinahan kaya’t tinawag na nito ang barangay upang mabuksan ang sasakyan.
Kinilala ang biktimang si retired Colonel Reynaldo Chinjen Vice President for External Affairs ng nasabing unibersidad habang ang driver naman ay si Claudio Flojo.
Tinitignan ang anggulong foul play at suffocation sa nangyaring insidente.
By Rianne Briones
Nagbabala ang Metropolitan Manila Development Authority (MMDA) ng mas malalang lagay ng trapiko partikular sa Marcos Highway sa susunod na dalawa at kalahating taon.
Ito ay dahil sa ginagawang LRT 2 Masinag Extension Project na maragdag ng dalawa pang istasyon ng LRT sa Emerald Station sa Cainta at Masinag Station sa Antipolo City.
Ayon kay MMDA Chairman Francis Tolentino, noon pang Hunyo nagsimula ang proyekto ngunit lubos na mararamdaman ang impact nito sa trapiko sa Setyembre.
Kabilang sa mga maapektuhan nito ay ang sasakyan na papapuntang Cubao area.
Kaya pinayuhan ang mga ito na dumaan na lamang sa mga alternate routes Sumulong Highway, A. Rodriguez Avenue, J. Rizal Avenue, Felix Avenue, Fernando Avenue, Calle Industria, Kaginhawaan at Ortigas Avenue Extension.
By Rianne Briones
Pumalo na sa 85 ang bilang ng mga nasawi mula sa pagsabog sa Tianjin, China.
Ayon sa report, kabilang sa mga nasawi ang 21 bumbero, habang daan-daang iba pa ang nananatili sa ospital.
Nai-deploy na din sa bahagi ng pagsabog ang 217 na nuclear at biochemical materials specialists mula sa Chinese military.
Bagamat hindi pa matukoy kung anong kemikal ang sanhi ng pagsabog, tiniyak naman ng mga eksperto na nasa normal na lebel ang toxic gas indicators.
By Katrina Valle
Credit: (AP Photo/Ng Han Guan)
Pinagpapaliwanag ni Congressman Jonathan dela Cruz ang Land Transportation Franchising and Regulatory Board (LTFRB), hinggil sa 40 bus na idinagdag sa Edsa upang sumaklolo sa mga mananakay ng Metro rail Transit (MRT).
Sinabi ni dela Cruz na maraming bagay na dapat ipaliwanag ang LTFRB, kabilang na ang kung gaano katagal mananatili ang mga bus sa lansangan, at kung ano ang pabor na ibinigay sa mga operator ng naturang mga bus, para mag “boluntaryo.”
Posible aniyang maraming ipinangako sa mga bus operator dahil maliban sa mas mura ang pasahe sa mga bus, limitado lamang din ang mga bus stop na maaring hintuan ng mga ito.
“Matagal na ninyong ipinapangako ang pagsasaayos ng MRT, may limang taon na kayo ‘yan ang sinasabi niyo palagi na every year na merong ganitong diskusyon eh sinasabi niyo inaayos niyo ang MRT, hindi nga naaayos sabi namin eh, ang panakip butas ninyo ay itong 40 na buses, ang sabi nila hindi naman po mga bagong prangkisa kasi nagvo-volunteer itong mga bus companies para lang tumulong maibsan ang problema n gating mga mananakay sa MRT, ang sabi natin sa kanila ay ganito, o nagvo-volunteer, anong mga terms and conditions ng volunteerism nilang ‘yan.” Pahayag ng kongresista.
By Katrina Valle | Sapol Ni Jarius Bondoc
Tatlong (3) sibilyan ang sugatan kabilang ang 2 estudyante sa nangyaring engkwentro sa pagitan ng mga miyembro ng barangay peacekeeping action team at Abu Sayyaf Group sa Patikul, Sulu.
Ayon kay Brig. General Alan Arrojado, Commander ng Joint Task Group Sulu, kasama rin sa tinambangan ay ang project engineer ng Department of Public Works and Highways o DPWH.
Sinasabing nagbibigay ng seguridad ang mga tauhan ng barangay sa mga cargo truck na kumukuha ng buhangin para sa ginagawang project ng DPWH nang atakihin sila ng mga rebelde.
Agad namang rumesponde ang tropa ng pamahalaan para tugisin ang mga tumakas na rebelde.
By Rianne Briones
Hindi mapigilan na manggigil ni Judy Ann Santos sa pambansang Bae na si Alden Richards.
Sa Instagram post ni Juday, pinost nito ang kanilang picture ni Alden kasabay ang pag-amin na pinaglilihian niya ito.
Aminado si Judy Ann na talaga namang kinikilig siya sa loveteam na Aldub at maging siya ay sumusubaybay sa Kalyeserye ng Eat Bulaga.
Kabilang si Juday sa milyong mga taga-subaybay ng Aldub loveteam na halos araw-araw ay nag-tetrending sa social media.
By Rianne Briones
Nasunog ang isang nakadaong na barko sa Ormoc Port, Leyte kaninang madaling araw.
Sa inisyal na ulat ng Philippine Coast Guard, 3 sa mga crew nito ang kumpirmadong nasugatan habang wala namang napapaulat na nasawi sa insidente.
Higit sa 500 mga pasahero ang sakay ng M/V Wonderful Stars of Robles Shipping Line nang maganap ang insidente.
Patuloy ang ginagawang imbestigasyon upang alamin kung ano ang naging sanhi ng sunog sa naturang barko.
By Rianne Briones