Arestado ang dalawa katao matapos tangkaing kuhanin ang tatlo’t kalahating kilo ng shabu sa isang courier service company sa Pasay City kahapon.
Ayon kay PDEA-NCR Regional Director Ismael Fajardo, naaresto sina Melvin Solitario Feliciano alyas Michael Cruz Espino at Rachel Dela Cruz sa entrapment operation na isinagawa sa pakikipagtulungan ng Ninoy Aquino International Airport-Inter-Agency Drug Interdiction Task Group.
Dagdag pa ni Fajardo ito rin ay bunga ng pakikipag-ugnayan sa mga international at local courier companies kung saan napag-kasunduang magkakaroon ng isang PDEA agent kasama ng x-ray examiners ng bawat forwading company.
Dito ay kanilang mababantayan kung may kahina-hinalang nilalaman ang isang padala gaya ng nakitang shabu sa padala na nakapangalan kay Feliciano.
Tinatayang nasa 17.5 million Pesos ang halaga ng shabung nakumpiska ng PDEA sa dalawang suspek.
