Kinumpirma ng Cotabato Provincial Health Office na nakapagtala na sila ng unang kaso ng Delta variant ng COVID-19.
Ayon kay provincial Health Officer Dr. Eva Rabaya, residente aniya sa bayan ng Aleosan ang Delta carrier matapos magtungo sa Cagayan de Oro City.
Nitong Miyerkules lamang nabatid ng lokal na opisyales ang pagiging positibo sa Delta variant ng pasyente matapos lumabas ang resulta ng kaniyang genome sequencing test.
Sinasabing nagpositibo sa COVID-19 ang naturang pasyente noong Hulyo at gumaling din matapos sumailalim sa quarantine.
Sinabi pa ni Rabaya na tukoy na rin nila ang may dalawang dosenang nakasalamuha nito kung saan ay isinailim na rin sa testing at gamutan.
