Patay ang labing isang (11) miyembro ng Bangsamoro Islamic Freedom Fighters o BIFF at sugatan ang marami pang miyembro nito sa magdamag na mortar at rocket assault ng militar sa Maguindanao.
Ayon sa Tactical Command Post ng 601st Brigade, sinalakay ng tinatayang limampung (50) BIFF members ang Kato Detachment ng 57th Infantry Battalion ng Philippine Army at CAGFU sa Mount Firis sa hangganan ng mga bayan ng Datu Hoffer, Datu Unsay at Datu Saudi Ampatuan.
Kaagad rumesponde ang dalawang Agusta 109 helicopter gunship ng Philippine Air Force at binomba ang mga terorista na pinangungunahan ni Kumander Bungos.
Nagpakawala rin ng mga bala ng 105mm howitzers cannon and artillery battalion ng Philippine Army sa posisyon ng BIFF.
Natigil ang putukan alas-2:00 kaninang madaling araw nang umatras ang BIFF.
Magugunitang mahigit 300 pamilyang katutubong Teduray ang lumikas sa Mount Firis dahil sa sunud-sunod na pag-atake ng BIFF sa posisyon ng mga awtoridad at sinunog pa ang 19 na kabahayan ng mga sibilyan.
—-