Sinasanay na ng mga security ni PNP Chief Director General Ricardo Marquez ang mga magiging security naman ni incoming PNP Chief Ronald Dela Rosa.
Ayon kay PNP Spokesman Chief Supt. Wilben Mayor, pawang mga U.S. trained ang mga nagbibigay ng training sa security team ni Dela Rosa.
Partikular na sinasanay ang mga pulis sa pagmamaneho, pagbaril at iba pang protocol sa pagbibigay ng seguridad sa hepe ng pambansang pulisya.
Ipinabatid din ni Mayor na may itinakdang sapat na bilang ng mga pulis na bahagi ng security team ng PNP chief, pero sa kaso ni Dela Rosa na nakatatanggap na ng death threat ay maaari namang dagdagan pa ng PNP ang security nito.
Pero, sinabi ni Mayor na si Dela Rosa pa rin ang magpapasya kung nais pa nitong dagdagan ang kanyang mga police detail.
By: Meann Tanbio
