Pinagtibay ng Kamara ang House Resolution No. 1286 bilang pagbati at pagkilala sa karangalang naiuwi ni Filipina tennis star Alex Eala matapos nitong masungkit ang kanyang kauna-unahang Women’s Tennis Association o WTA singles title.
Nagkaisa ang mga mambabatas na kilalanin ang makasaysayang tagumpay ni Eala sa 2026 Mubadala DC Open sa Estados Unidos, kung saan tinalo niya ang World No. 3 at tournament top seed na si Jessica Pegula.
Ayon kay House Majority Leader Sandro Marcos, karangalan para sa buong bansa ang naging tagumpay ni Eala dahil ipinakita nito sa buong mundo ang galing, katatagan at determinasyon ng mga Pilipino.
Aniya, ang pag-angat ni Eala sa pandaigdigang tennis rankings ay bunga ng kanyang sipag at tiyaga sa larangan ng tennis.
Dahil sa ipinamalas na galing, naging kauna-unahang Pilipino si Alex Eala na nakapasok sa Top 20 ng Women’s Tennis Association o WTA singles rankings. | mula sa panulat ni Geli Mendez
