Walang mas nakakataas sa batas.
Ito ang pahiwatig ng Palasyo kasunod ng aksyon ng Commission on Human Rights na imbestigahan si Davao City Mayor Rodrigo Duterte kaugnay sa pag-amin nito ng mga pagpatay sa kanyang nasasakupan.
Ayon kay Presidential Communications Secretary Sonny Coloma, bilang isang demokratikong bansa ay kailangang tumalima sa prinsipyo ng rule of law.
Sa ilalim aniya ng saligang batas ay kinikilala ang karapatan ng bawat mamamayan at may karapatang mabigyan ng proteksiyon, kabilang na ang karapatang mabuhay.
Iginiit ng kalihim na karapatan din ng bawat pilipino na mabigyan ng due process sa ano mang aksiyong legal dahil ang bansa ay may sinusunod na batas at hindi libre ang basta na lamang pumatay ng tao.
Sinabi ni Coloma na tungkulin ng chr na alamin ang katotohanan sa umano’y mga paglabag ni duterte sa karapatang pantao, dahil dapat patas ang pagpapatupad ng batas.
Nauna rito tila may pagmamalaki pang inihayag ni Duterte ang mga pinapatay umano sa davao ng walang due process lalo na ang mga itinuturing na salot sa lipunan na sangkot sa illegal drug trade activities.
By: Aileen Taliping (patrol 23)
