Ligtas nang nakalabas sa Strait of Hormuz ang nasa tatlong libo pitong daang Pilipinong seafarers sa gitna ng nagpapatuloy na tensyon sa gitnang silangan.
Ayon kay Migrant Workers Secretary Leo Cacdac, patuloy na mino-monitor ng ahensya ang sitwasyon sa rehiyon kasunod ng muling pagsiklab ng mga pag-atake at bakbakan.
Gayunman, may dalawang libo limandaang tripulante pa rin ang nananatili sa persian gulf at naghihintay ng ligtas na pagkakataon upang makaalis sa naturang lugar.
Tiniyak ng DMW ang pakikipag-ugnayan sa mga kinauukulang ahensya at shipping companies upang mabantayan ang kalagayan ng mga Pilipinong marino habang nagpapatuloy ang sigalot sa gitnang silangan. | mula sa panulat ni Jordan Gutierrez
