Inisnab ng mga dating opisyal ng PHISGOC o Philippine Southeast Asian Games Organizing Committee ang pagdinig ng National Bureau Of Investigation-Financial Intelligence Unit kaugnay ng imbestigasyon sa pondo ng 2019 Southeast Asian Games.
Ayon kay NBI-FIU Chief Minerva Sobreviga-Retanal, tanging mga abogado ng mga dating opisyal ang humarap sa mga imbestigador sa isang closed-door meeting.
Kabilang sa mga ipinatawag ng NBI sina dating PHISGOC Chairman at Chief Operating Officer Ramon “Tats” Suzara, dating Chief Financial Officer Dexter Estacio, dating Corporate Secretary John Lester Buenconsejo, at iba pang Board of Members.
Sinisilip ng NBI ang paggamit ng 6.7 billion pesos na pondo ng pamahalaan para sa SEA Games, kung saan nasa 3.7 billion pesos ang sinasabing hindi dumaan sa karaniwang audit at liquidation process.
Samantala, mariing itinanggi ng PHISGOC ang anumang iregularidad dahil na-liquidate na anila ang naturang pondo. | mula sa panulat ni Jordan Gutierrez
