Ibinabala ng PHILRECA o Philippine Rural Electric Cooperatives Association na maaaring malugi ang mga Electric Cooperative kung tuluyang aalisin ang system loss charge nang walang subsidiya mula sa pamahalaan.
Iginiit ng PHILRECA na suportado nila ang panukala ni Pangulong Ferdinand Marcos Jr. na alisin ang VAT o Value-Added Tax sa system loss charge, pero dapat anilang sagutin ng gobyerno ang naturang gastos kung tuluyang ipagbabawal ang paniningil nito sa mga consumer.
Nilinaw ng PHILRECA na ang system loss ay dulot ng natural na pagkawala ng kuryente sa mahahabang linya ng distribusyon at mahirap na lokasyon ng mga rural electric cooperative, bukod pa sa pagkawala ng kuryente dahil sa iligal na koneksyon at pagnanakaw ng kuryente.
Binigyang-diin din ng philreca na ang tuluyang pagbabawal sa system loss charge nang walang kapalit na pondo ay maaaring lumabag sa EPIRA o Electric Power Industry Reform Act. | mula sa panulat ni Jordan Gutierrez
