Isang bangkay ng babae ang natagpuang nakasilid sa isang asul na maleta at nakabalot pa sa itim na garbage bag sa isang creek sa Barangay Tanyag, Taguig City.
Batay sa paunang imbestigasyon ng pulisya, tinatayang nasa pagitan ng 35 hanggang 40 taong gulang ang biktima. Nakasuot ito ng asul na short pants at itim na short-sleeved blouse na may puting disenyo nang matagpuan.
Agad na dinala ang labi sa Loreto Funeral Homes upang isailalim sa autopsy at iba pang forensic examination para matukoy ang eksaktong sanhi at paraan ng pagkamatay.
Sa isinagawang masusing follow-up investigation ng Taguig City Police Station, natukoy ng mga awtoridad ang pagkakakilanlan ng biktima. Sa tulong ng impormasyong ibinigay ng mga concerned citizen, natunton din ang lugar na pinaniniwalaang pinangyarihan ng krimen.
Sa isinagawang ocular inspection sa bahay ng pangunahing suspek, nakarekober ang mga pulis ng ilang ebidensyang may kaugnayan sa insidente, kabilang ang isang sako na hinihinalang ginamit sa pagtatago ng bangkay.
Tatlong katao ang naaresto sa naturang bahay. Sa kanilang pagkakaaresto, nasamsam din ng mga awtoridad ang mga hinihinalang drug paraphernalia na nasa kanilang pag-iingat.
Patuloy ang imbestigasyon ng pulisya upang higit pang mapagtibay ang mga ebidensya at matiyak ang pagsasampa ng naaangkop na mga kaso laban sa mga sangkot sa krimen.
