Naghain ngayong araw, Biyernes, Hulyo 3, ng counter-affidavit sa Quezon City Prosecutor’s Office sina Akbayan Rep. Chel Diokno, Akbayan Rep. Perci Cendaña, at Mamamayang Liberal (ML) Party-list Rep. Leila de Lima kaugnay ng reklamong isinampa laban sa kanila ni Atty. Mans Carpio, asawa ni Vice President Sara Duterte.
Matatandaang nagsampa si Atty. Carpio ng reklamo laban sa tatlong mambabatas, gayundin kina Bangko Sentral ng Pilipinas (BSP) Governor Eli Remolona Jr. at Anti-Money Laundering Council (AMLC) Executive Director Ronel Buenaventura, dahil sa pagsasapubliko ng kaniyang bank records sa pagdinig ng Kamara hinggil sa impeachment complaint laban sa Bise Presidente.
Ikalawang beses nang naghain ng counter-affidavit ang mga mambabatas matapos ilipat sa Hulyo 3 ang preliminary investigation kasunod ng addendum na inihain ng complainant noong Mayo 13.
Sa pagdinig noon ng House Committee on Justice, inihayag ng AMLC na nakatanggap ito ng mga ulat tungkol sa umano’y “suspicious” at “covered” bank transactions na umaabot sa ₱6.77 bilyon na iniuugnay kina VP Sara Duterte at asawang nito sa loob ng halos dalawang dekada.
Iginiit ni REp. Diokno na bahagi ng kanilang tungkulin bilang mga miyembro ng House Committee on Justice ang pagtalakay sa naturang mga dokumento sa pagdinig, alinsunod sa mandato ng Konstitusyon sa impeachment process.
Samantala, sinabi ni Rep. De Lima na wala umanong magiging epekto ang reklamong kinakaharap nila sa nakatakdang impeachment trial ni Vice President Duterte sa Hulyo 6. Bilang miyembro ng House prosecution panel, sinabi rin niyang nagpapatuloy ang paghahanda ng kanilang grupo para sa impeachment trial na magsisimula sa Lunes, Hulyo 3.
Ayon naman kay Rep. Cendaña, ang paghahain nila ng counter-affidavit ay patunay na handa silang harapin ang reklamong isinampa laban sa kanila sa tamang proseso.
