Dumating na sa Clark International Airport sa Pampanga ang kauna-unahang Cessna 408 SkyCourier sa Pilipinas at sa buong Asia-Pacific Region.
Ang eroplano ay pagmamay-ari ng ACDI Multipurpose Cooperative o ACDI MPC, ang pinakamalaking kooperatiba sa bansa na binubuo ng mahigit 230,000 aktibo at retiradong miyembro ng Armed Forces of the Philippines at iba pang uniformed personnel, kasama ang kanilang mga dependents.
Ayon sa ACDI MPC, ang pagdating ng SkyCourier ay bahagi ng kanilang pagpasok sa industriya ng abyasyon sa pamamagitan ng kanilang subsidiary na Leading Edge Air Services Corporation o LEASCOR.
Pinamumunuan ang ACDI MPC ni Retired Major General Gilbert S. Llanto, AFP Retired, na siya ring Pangulo ng National Alliance of Cooperatives at Direktor ng International Cooperative Alliance Asia-Pacific.
Sinabi ng kooperatiba na ang bagong eroplano ay magsisilbing mahalagang bahagi ng kanilang layunin na mapalawak ang transportasyon at logistics services, lalo na sa mga malalayong lugar na limitado ang access sa regular na biyahe.
Ang Cessna 408 SkyCourier ay isang modernong twin-engine turboprop aircraft na maaaring magsakay ng hanggang 19 na pasahero o gamitin sa cargo operations. May kakayahan din itong lumapag at lumipad sa maiikli at hindi gaanong developed na mga paliparan, kaya angkop ito sa inter-island operations sa Pilipinas.
Sa kasalukuyan, may operasyon ang LEASCOR sa iba’t ibang bahagi ng bansa kabilang ang rutang Zamboanga-Jolo, gayundin sa mga charter flights para sa mga kumpanya, resort, at iba pang kliyente.
Ayon sa ACDI MPC, ang pagdating ng SkyCourier ay patunay na ang sektor ng kooperatiba ay maaari nang gumanap ng mas malaking papel sa pambansang kaunlaran sa pamamagitan ng pamumuhunan sa mga estratehikong industriya tulad ng abyasyon.
Inaasahan namang darating sa mga susunod na buwan ang ikalawang SkyCourier na bahagi ng fleet expansion program ng LEASCOR ngayong taon.
