Inanunsyo ng Commission on Elections (COMELEC) na isasagawa ang special election para sa bakanteng puwesto sa House of Representatives ng Cavite 4th District sa darating na Agosto 29, 2026.
Ayon kay COMELEC Chairperson George Garcia, nakatakda ring magpulong ang poll body kasama ang mga puwersa ng lokal na pamahalaan, at iba pang ahensya sa Cavite upang tiyakin ang maayos at ligtas na halalan.
Ipinahayag din ng COMELEC na ilalabas nito sa mga susunod na araw ang official calendar of activities, kabilang ang petsa ng filing ng certificate of candidacy, campaign period, election period, at gun ban.
Sinabi pa ni Garcia na humihingi ang ahensya ng tulong mula sa ehekutibong sangay para sa pondong aabot sa humigit-kumulang ₱191 milyon na kailangan para sa naturang halalan. Tinitingnan din ng COMELEC ang sariling pondo nito upang maipagpatuloy ang paghahanda, habang paiiralin ang manual voting system para sa special polls.
